ဂျဳနဳဗာ၊ ဒဳဇြေမ်ဗာ ၁
ကဝ်မယှေန်ပရေၚ်ဂၠိုက်ဂၠါဲကုလ သ္ဂောံဂၠိုက်ဂၠါဲစၟဳတ်အာ အမှုရာဇဝတ်ပၞာန် အေဿရေ−ဟာမာသ် သီုၜါလ္ပာ်ဂှ် စွံအာအရီု လ္တူလၟေၚ်ဒဒှ်ပကီုပရာပ်လိၚ် ဟာမာသ်တံဂှ်ဏောၚ်တုဲ လုပ်ဂရုၚ်ပ္တီအာ သွက်သက်သဳသာဓကတံရောၚ်ဂှ် ဥက္ကဌဂကောံဂှ် ဟီုဂးလဝ်ရ။
နူတမ်တေံ ဟိုတ်နူကုလသမဂ္ဂ သ္ၚိတ်ဒၟံၚ်တုဲ အကြာဂြောဝ်ဂတာအေဿရေ ညးဒးဒုၚ်သ္ပလဝ်ဂၞန်တံ မပါ်ပါဲဒၟံၚ်ဂှ် လှဲပြံၚ်အာ သက်သဳသာဓကတံ ကုရုၚ်ရာဇဝတ်ဍုၚ်သ္အာၚ်တံဏောၚ်တုဲ အာတ်မိက်အာ သွက်ဂွံချပ်ဗ္စာ သ္ဂောံစောဲဂဗုတ်တံဏောၚ်ဂှ် ဥက္ကဌ နာဗဳပဳလေဝ် သ္ဂးလဝ်ရ။
“လၟုဟ် အဲဂှ် နဒဒှ်ဥက္ကဌ ကဝ်မယှေန်ဏံဂှ် သွက်ဂွံဂၠိုက်ဂၠါဲစၟဳတ်အာ ကိစ္စဏံဂှ် ဒှ်ညးအဝဵုနွံမွဲရ။ ဟိုတ်ဂှ်ရ ဟိုတ်ပိုယ်ဟွံကၠောန် မုဟွံမွဲပုဟ်” သာ်ဝွံ ညးဟီုဂးလဝ်ရ။
အခိၚ်လၟုဟ် မၞိဟ်လ္ၚဵုတံဂှ် သွက်ဂွံသ္ပကဵုသက်သဳဂှ် စိုတ်ထတ်ဒၟံၚ်တုဲ ညးတံဂှ်လေဝ် လှဲပြံၚ်အာကဵု ဇရေၚ်ညးရေၚ်တၠုၚ်ဂဗုတ်အလဵုအသဳတံဏောၚ်ဂှ် ညးသ္ဂးလဝ်ရ။
ဆ္ဂး အေဿရေ ဟိုတ်နူပံၚ်တောဲရေၚ်တၠုၚ်လဝ်ကဵု ကဝ်မယှေန် ဟွံမွဲဂှ်ရ သွက်ညးဂှ် ဒှ်ဒၟံၚ်တၚ်ကော်ဆဴမွဲတုဲ သွက်ဂွံပကောံပကေဝ် သက်သဳသာဓကရုမ်မ်ဂပ်ပ် သ္ဂောံထံက်ပၚ် ကုပရေၚ်စောဲဂဗုတ် အနာဂတ်တေံဂှ်လေဝ် ဒးရုန်ဂ္စါန်ဒၟံၚ်ရောၚ် မဒှ်ရ။
မွဲဒမြိပ်ဝၚ်ဍုၚ်အေဿရေ အပ္ဍဲပရေၚ်ဗ္တိုက် မၞိဟ်ချိုတ်ဂျိုၚ်ဂၠိုၚ်ဂှ် ကြဴနူသက်သဳ ညးဒးဒုၚ်ကလိလောန် အမှုရာဇဝတ် စပ်ကဵုလိၚ်တံ ပါလုပ်သီုကဵုဂဗုတ်သ္ပကောန်ဗြဴတံ မံက်တိတ်ကၠုၚ်တုဲဂှ် သၟိၚ်တၠအဝဵုအေဿရေတံလေဝ် ပံက်လဝ် ပရေၚ်ဂၠိုက်ဂၠါဲစၟဳတ် အလဵုညးတံယျ မဒှ်ရ။
ဟာမာသ်ဂှ်တှ်ေ ဒဒှ်မကလိလောန်လဝ်တံဏံဂှ် ကယျာန်ပါဲလဝ်ရ။ သက်သဳသာဓက ဂကောံကုလသမဂ္ဂတံ မပကောံပကေဝ်ဂွံလဝ်ဂှ်ဝွံ သွက်ဂွံစောဲဂဗုတ် ကုအမှုရာဇဝတ်ပၞာန် ပ္ဍဲကဵုပရေၚ်ဗ္တိုက်သီုၜါလ္ပာ်တံဂှ် ဒှ်ကၠုၚ်သ္ဇိုၚ်တုဲ တံၚ်ဂြဲကော်ဏာ စဵုကဵုရုၚ်သၞောဝ်ဓဝ်ရာဇဝတ်ဍုၚ်နာနာတံမာန်ဂှ် ညးရေၚ်တၠုၚ်ဂဗုတ်အလဵုအသဳကဆံၚ်လ္တူ ICC ဂှ် ဟီုလဝ်ရ။
ပဳလေဝ်ဝွံ နူစတ္ၚဲပရေၚ်ဗ္တိုက်က္တဵုဒှ် ဂိတုအံက်တဝ်ဗာ ၇ တေံဂှ်ရ ဆဵုဂဗလဝ်ကဵု ညးရေၚ်တၠုၚ်ဂဗုတ်အလဵုအသဳ ICC တံဂှ်တုဲ ပ္ဍဲအရာပါ်ပရအ် သက်သဳသာဓကတံဂှ် သွက်ဂွံပံၚ်တောဲရေၚ်တၠုၚ်အာဂှ် အာတ်မိက်လဝ်ရောၚ် ဟီုလဝ်ကဵု ရိုက်တာရ။
ပ္ဍဲအရာစန်ဒက် သွက်ဂွံကဵုအခေါၚ်လုပ်စိုပ် ကုကဝ်မယှေန် ပဳလေဝ်တံ မၞိဟ် ၁၈ တၠပါဂှ် သွက်ပရေၚ်ဂၠိုက်ဂၠါဲစၟဳတ် ပ္ဍဲဍုၚ်အေဿရေဂှ် အာတ်မိက်လဝ် အရီုဗၚ်အမေရိကာန် ကေုာံ အဳဂျေပ်တံရ။
ပဳလေဝ်ဝွံ နဒဒှ်ကလေၚ်ခၠေဝ်ပလန် ကုပရေၚ်ဗ္တိုက် ဂိတုအံက်တဝ်ဗာ ၇ တေံဂှ်တုဲ ပရေၚ်ဗ္တိုက်ဂြာတ်ဗုမ် အေဿရေ လ္တူဒေသဂါဇြာဂှ် ဒှ်သ္ဇက်ဒးဖေက်လကိုတ်ကွေံကွေံဏောၚ်ဂှ် ဟီုဂးလဝ်တုဲ လၟိဟ်မၞိဟ်ဒးချိုတ်အာ စဵုကဵု ၁၅၀၀၀ ပြၚ် သၠုၚ်တိုန်ဒၟံၚ်ဂှ်လေဝ် ဟီုဗျိလဝ်ရ။
Ref: Reuters
sanlontai