ပ္ဍဲပေါဲဗတိုက်ကအ်ကြိက် ကောန်အရာပ်တအ် ဇီုကပိုက် ဒးချိုတ်လဝ်နွံ

ကအ်ကြိက်၊ ဒဳဇြေမ်ဗာ(၂)

ပ္ဍဲပေါဲဗတိုက်လ္တူဍုၚ်ကအ်ကြိက် တွဵုရးကရေၚ်ဂှ် ပါဲနူလွဟ်ဇၞော်တုဲ ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာဂှ်ရ ကောန်အရာပ်ညးဍုၚ်ကွာန်တအ် ဒးချိုတ်လဝ် နွံဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

သ္ပတံနူဂိတုဒဳဇြေမ်ဗာ စၟတ်တ္ၚဲ (၁) အခိၚ်နူဂယး (၄) နာဍဳတုဲ ပ္ဍဲကဵုခေန်နုၚ်မူ၊ တပျေကုမ်၊ မျိုအ်တဝ်ဥူ၊ ချောၚ်တောၚ်ကဵု လ္ဒောဝ်ဍုၚ်ဒၞာဲဗွဲမဂၠိုၚ် လ္တူဍုၚ်ကအ်ကြိက်ဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက် သ္ကာတ်မြဟ်ဒၟံၚ်ရ။

ပ္ဍဲပေါဲဗတိုက်ၜါလ္ပာ်ဏံ ပါဲနူလွဟ်ဇၞော်တုဲ ဟိုတ်နူဒပ်ကံၚ်ဇြဳပၞာန် ပန်ပှော်ဗတိုက်လဝ်ကဵုက္ၜၚ်ကျာ အဆက်ဟွံပိုတ်သ္ကုတ်ဂှ်ရ ကောန်အရာပ်ဗွဲမဂၠိုၚ် ပါလုပ်သီုညးဍုၚ်ကွာန်အာတရဴတအ် ဒးဒုၚ်ကၟာတ်ဂွံလဝ်ရ။

အတိုၚ်ညးဒေသ သီုကဵုဂကောံရီုဗၚ်ဟံၚ်ပြာ်မၞိဟ်တအ် ဟီုလဝ်မ္ဂး ကောန်အရာပ်ညးဍုၚ်ကွာန် ဒးလဝ်ဘဲဝပ်တုဲ ဒးဒုၚ်ကၟာတ်ဂွံလဝ် ပ္ဍဲကဵုပေါဲဗတိုက်ဂှ် ဟွံအောန်နူ (၁၀) တၠ နွံတုဲ ညးဗြဴမွဲတၠ ဒးချိုတ်လဝ်ရဂှ် ဟီုလဝ်ရ။

ပေါဲဗတိုက်ကအ်ကြိက်ဂှ် ဆက်က္တဵုဒှ်ဒၟံၚ် စဵုကဵုတ္ၚဲဏံ အခိၚ်ဇိုၚ်သဝ်တ္ၚဲတုဲ နူလ္ပာ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ ဟွံအောန်နူ (၆) အလန်ရ။

ပ္ဍဲကဵုပေါဲဗတိုက်ဂှ် ဒပ်ပံၚ်ကောံ KNLA တအ် ဗတိုက်သီကေတ်လဝ် ဗဒိုပ်ကအ်နွ(ကော့နွဲ့) မၞုံဗ္ဒာဲဍုၚ်ကအ်ကြိက်ရဂှ် ဂၠိုက်ဂၠာဲဂွံတီကေတ် နူတံရိုဟ်ပရိုၚ်ဗလးမုက်တိတအ်ရ

ပ္ဍဲပေါဲဗတိုက်ကအ်ကြိက်ဂှ် ကောန်ဒပ်ကံၚ်ဇြဳပၞာန် ဂၠိုၚ်ကဵုစှ်ော ပ္တူအလာံဗုတုဲ ထံက်က္ၜံၚ်ဒုၚ်ကျလဝ် နွံရဂှ် ၜိုန်ရပရိုၚ်တိတ်ဒၟံၚ်ကီုလေဝ် နကဵုသြၚ်လောန်တိုၚ်မ် သ္ပဒ္တန်တၞဟ်ခြာဟွံမာန်ဏီရ။

အခိၚ်လၟုဟ်ဏံ ဟိုတ်နူပေါဲဗတိုက်ၜါလ္ပာ်တုဲ ကၟာတ်လဝ်အခေါၚ်သုၚ်စောဲ ဂၠံၚ်ဇၞော်အာယှ မြဝတဳ-ကအ်ကြိက်တုဲ ကွဳစက်အာတရဴ ဂၠိုၚ်ကဵုကၠံ ဒးဒုၚ်ကၟာတ်ဒၟံၚ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု -Social Media