ပရေၚ်အုပ်ဓုပ် ဍုၚ်မသီဂွံလဝ်တံကဵု ပရေၚ်ဂီုကၠီုညးဍုၚ်ကွာန်တံဂှ် ပလေဝ်ပလေတ်လဝ် သာ်လဵုရော

ကဝ်လေန်၊ ဒဳဇြေမ်ဗာ ၅

အခိၚ်ပၞာန်သီအဝဵု ကြပ်ပေၚ်ပိသၞာံဏံ အလုံမွဲကၟိန်ဍုၚ် ဗ္တိုက်သရိုဟ်ဒၟံၚ် ဒပ်ကံၚ်ဇြဳပၞာန် နကဵုပၞာန်ထ္ပက်ဂှ် ဂကောံဒပ်ပၠန်ဂတးတံ သီထိၚ်ဂွံလဝ်ဍုၚ် နူကဵုတွဵုရးပန် ကေုာံ ရးဒေသဇၞော်မွဲဂှ် ဟွံအောန်နူကဵု ၁၈ ဍုၚ်ရ။

အတိုၚ်တၚ်နၚ် နူကဵုသြၚ်လောန်တိုၚ်(မ်) မပ္ကောံပ္ကေဝ်ဂွံလဝ်ဂှ်မ္ဂး ပ္ဍဲရးသက်ကိုၚ်ဂှ် ကဝ်လေန်၊ ခါန်ပါတ်၊ ယှိုဲပျဳဨ၊ ပ္ဍဲတွဵုရးချေၚ်ဂှ် ရိခဝ်ဒါ၊ လိုၚ်လေန်ပဳ၊ ယျေဇြဲ၊ ပ္ဍဲတွဵုရးသေံဇၞော်ဂှ် ချေန်ယှိုဲဟဝ်၊ ဖံၚ်သာၚ်၊ ကျူကုတ်၊ သိန္နဳ၊ ကုန်ကျာန်၊ မုၚ်ကိုဝ်၊ ကောန်လုၚ်၊ ပ္ဍဲတွဵုရးကရေၚ်ဍာဲဂှ် မေဝ်သေအ်၊ ပ္ဍဲတွဵုရးကချေၚ်ဂှ် အေန်ဂျာန်ယာန် ကေုာံ ဍုၚ်နခါမ်တံ ပါလုပ်ရ။

ပ္ဍဲကဵုဏံ ဂကောံဇြဟတ်ပၠန်ဂတးတံ ဟွံဒးဗ္တိုက်မွဲသာ် ဍုၚ်ဒပ်ကံၚ်ဇြဳပၞာန်တံ ဗလးလဝ်တဲဂှ်တှ်ေ နူကဵုတွဵုရးချေၚ်ဂှ် ဍုၚ်နှာရိန်၊ သူခွါ ကေုာံ ဍုၚ်ဝေဘူလတံ ပါလုပ်ဒၟံၚ်ရ။

ညးမၞုံအခေါၚ်ဟီုဂး ရုၚ်သမ္မတ အလဵုအသဳညဳသၟဟ်ဂကူ NUG ဥူကျဝ်ဇြဝ်ဂှ် ပ္ဍဲကဵုဍုၚ်မသီဂွံလဝ်တံဂှ် သွက်ဂွံစဵုဒၞါ ဘဲက္ၜၚ်ကျာတံဂှ်တုဲ ဂကောံပရေၚ်စဵုဒၞါ၊ ပရေၚ်အုပ်ဓုပ်တံ စၞောန်ထ္ၜးကဵုဒၟံၚ် ကုသၞောတ်ဒစးဒုၚ်ကဵုသမ္တီတံ ကေုာံ ၜံက်ခါဲဂဒုၚ်ပါဲဗမ်တံ နွံဂှ် ဟီုရ။

“ထောံမခတိုဟ်သာ်ဏံတံဂှ် အခိၚ်ဟွံရုဲက္တဵုဒှ်မာန်ဒၟံၚ်။ ဍေံတံ (စကစ) ဂှ် ဗ္တိုက်ဒၟံၚ်ညးဍုၚ်ကွာန်တံ နူကဵုတရဴကျာဂှ် ကၠောန်ဒၟံၚ်တွဵုဏောၚ်။ ဟိုတ်ဂှ်ရ နကဵုသတိနွံနွံ ဒစးဒုၚ်တုဲ ညံၚ်ဂွံတီဂှ် ၜိုတ်သ္ပမာန် ကၠောန်ဒၟံၚ်ရ။ တီပြဟ်တှ်ေ ဒစးဒုၚ်တုဲပါဲဂွံ။ ဆ္ဂး သွက်ဂွံဒစးဒုၚ်စဵုဒၞါ၊ ၜံက်ကတိုၚ်ဂဒုက်ပါဲဗမ်တံ၊ နဲကဲစဵုဒၞါတံဂှ် နူကဵုဂကောံအုပ်ဓုပ်ပိုယ်တံ၊ ပူဂဵုမၞုံကဵုတာလျိုၚ် ပရေၚ်စဵုဒၞါတံ၊ ပူဂဵုကေတ်လဝ်တာလျိုၚ် ပရေၚ်ဂီုကၠီုတံ စၞောန်ထ္ၜးကဵုဒၟံၚ်ပညာဂှ် နွံ။ ရေၚ်တၠုၚ်ဒၟံၚ်တုပ်ပ်ညးသ္ကအ်အိုတ်ရ“ သာ်ဝွံ သ္ဂးရ။

နကဵု NUG အပ္ဍဲဂိတုနဝ်ဝေမ်ဗာတုဲကၠုၚ်တေံ ကရောံဂကောံပံၚ်ကောံမဟာမိတ်ဂမၠိုၚ် ပါလုပ်သီုကဵု ဂကောံဒပ်စဵုဒၞါညးဍုၚ်ကွာန် အပ္ဍဲဒေသ မၞုံသၟဝ်ဌာနဝန်ဇၞော်ကာစဵုဒၞါတံ ဗ္တိုက်သီဂွံလဝ် နူရးသက်ကိုၚ်ဂှ် ဍုၚ်ကဝ်လေန်၊ ခါန်ပါတ် ကေုာံ ယှိုဲပျဳဨ တံမဒှ်ရ။

ပ္ဍဲကဵုဍုၚ်တံဏံဂှ် ဒက်ပ္တန် ဂကောံအုပ်ဓုပ်ညးဍုၚ်ကွာန်တံတုဲ ညံၚ်ညးဍုၚ်ကွာန်ပါဲဒဴဘဲပၞာန်တံ ဂွံကလေၚ်လုပ်စိုပ်ကၠုၚ်မာန် ကဵုအရီုဗၚ်သၟးဟွံက ညံၚ်ယန္တယာအလဵုအသဳဂွံဂေတ်ဂြိပ်မာန်၊ မ္ၚးနူကဵုပရေၚ်ဂီုကၠီု ကေုာံ ပရေၚ်သၞောဝ်ဥပဒေအုပ်လဒံတံဂှ် ပရေၚ်စဵုဒၞါတံဂှ်လေဝ် နူကဵုညးတာလျိုၚ်တံ ရေၚ်တၠုၚ်ဒၟံၚ်ရောၚ်ဂှ် ဥူကျဝ်ဇြဝ် သောၚ်ထ္ၜးလဝ်ရ။

အတိုၚ်တၚ်လလောၚ်တြး အလဵုအသဳညဳသၟဟ်ဂကူ ပ္ဍဲဂိတုဒဳဇြေမ်ဗာ ၃ တေံဂှ်မ္ဂး ပ္ဍဲကဵုပွိုၚ်ဍုၚ်ကဝ်လေန်၊ ခရိုၚ်ကဝ်လေန်၊ ရးသက်ကိုၚ်ဂှ် ဗၠးၜးနူ ပရေၚ်ထိၚ်ဒက်အုပ်လဒံ ဂကောံပၞာန်တံတုဲ ပရေၚ်အုပ်ဓုပ်ညးဍုၚ်ကွာန် စဒၟံၚ်ယျဂှ် ကဵုသမ္တီလလောၚ်တြးလဝ်ရ။

ပ္ဍဲကဵုတၚ်လလောၚ်တြးဏံဂှ် အလဵုအသဳညဳသၟဟ်ဂကူ စုတ်လဝ် သီုပရေၚ်အုပ်ဓုပ်၊ ပရေၚ်စဵုဒၞါ ကေုာံ ပရေၚ်သၞောဝ်အုပ်လဒံ၊ ပရေၚ်ရေၚ်တၠုၚ်ကေၚ်ကာညးဍုၚ်ကွာန်၊ ပရေၚ်စဳရေၚ်ဂဗုတ်၊ ပရေၚ်ကောပ်ကာဲ ကမၠောန်ဗာန်တံ ကေုာံ ပရေၚ်ညးဒုၚ်ကာ Non-CDM တံ မဒှ်ရ။

သလိုၚ်ထက်နဳ ညးမၞုံအခေါၚ်ဟီုဂး ဒပ်ပၠတရဴကောန်ဂကူချေၚ် (CNF) ဂှ်လေဝ် စပ်ကဵုပရေၚ်စဵုဒၞါဘဲတရဴကျာဂှ်တုဲ ကၠောန်ဒၟံၚ်ပရေၚ်ဂီုကၠီုအပ္ဍဲဒေသဂှ် အဓိကတုဲ သွက်ဂွံကလေၚ်တဝ်စၞေဟ် ဘဲတရဴကျာတံဂှ် ကရောံဇြဟတ်ဂရိုဟ်ဍုၚ်သ္အာၚ်တံဂှ် ပ္တိတ်ဒၟံၚ်ဇြဟတ် ထ္မံက်ဒၟံၚ်ပရေၚ်ပၞာန်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပ္ဍဲအရာစဵုဒၞါဘဲက္ၜၚ်ကျာအဓိကဂှ်တှ်ေ ဂွံပရိုၚ်ပြဟ်ဟ်ရဏောၚ်။ ပိုယ်တံ ဒးကၠောန်ပရေၚ်ဂီုကၠီုဒေသပိုယ်တံ ပါလုပ်သီုညးဖအိုတ်ဂှ် ဒှ်အဓိကရဏောၚ်။ အလုံဗ္ၜတ်ဍုၚ်မွဲဂှ် ၜိုတ်ကဆံၚ်ဏံရ ကၠောန်ကၠုၚ်မာန်လဝ်။ သွက်ဂွံကလေၚ်တဝ်စၞေဟ် စဵုဒၞါတရဴကျာတံဟီုဂှ် ပိုယ်တံသၟး ကၠောန်ဂွံဟွံသေၚ်။ ဇြဟတ်ဂရိုဟ်ဍုၚ်သ္အာၚ်တံကီု၊ ပိုယ်တံ သာ်လဵုထ္မံက်ရုပ်ရဴ ပရေၚ်ဗ္တိုက်တရဴကျာတံမာန်ရော ဆက်စပ်ကဵုအရာတံဏံတုဲ နဒဒှ်သ္ဂောံထ္မံက်ရုပ်ရဴပရေၚ်ပၞာန်မွဲ ပိုယ်တံစၟတ်ကေတ်သာ်ဏံတုဲ ပ္တိတ်ဒၟံၚ်ဇြဟတ် ဗွဲမသၟဟ်အစောံရ” ဂှ် သ္ဂးရ။

သွက်ဂွံစဵုဒၞါဘဲတရဴကျာ အပ္ဍဲတွဵုရးချေၚ်ဂှ် မ္ၚးနူကဵုပရေၚ်ဆက်စၠောံပရိုၚ်ဂှ် ကဵုလဝ်သမ္တီ ကုညးဍုၚ်ကွာန်ကောန်အရာပ် မသ္ပဒတဴဒၟံၚ် အပ္ဍဲဒေသတံ အရာမထေက်ကဵုဒးကၠောန်တံ နဲကဲဂွံစဵုဒၞါ နူကဵုဘဲတရဴကျာတံဂှ် ညးဟီုလဝ်ရ။

အပ္ဍဲဂိတုနဝ်ဝေမ်ဗာတုဲကၠုၚ်တေံ အပ္ဍဲကဵုဍုၚ် ဂကောံဒပ်ပံၚ်ကောံ CNF ကေုာံ Local PDF တံ မသီဂွံလဝ်ဂှ် ဍုၚ်ရိခဝ်ဒါ၊ လိုၚ်လေန်ပဳ၊ ယျေဇြဲတံ မဒှ်တုဲ ဍုၚ်မကွဳအိၚ်နူဂှ် ဗ္တိုက်သီဂွံလဝ် နူကဵုသၞာံ ၂၀၂၁ ကြပ်အိုတ်တေံ မဒှ်ရ။

ဍုၚ်နှာရိန်၊ သူခွါ ကေုာံ ဍုၚ်ဝေဘူလ နူကဵုတွဵုရးချေၚ်သှ်ေဒၟံၚ်တံဂှ် ဒပ်ပၠတရဴကောန်ဂကူချေၚ် CNF ကေုာံ ဂကောံဒပ်ပံၚ်ကောံ Local PDF တံ ဟွံဒးဗ္တိုက်မွဲသာ် ဒှ်ဍုၚ်ဗ္ဒိုပ်ဒပ်ကံၚ်ဇြဳပၞာန်တံ ထောံလသာဂြိပ်တိတ်အာလဝ်တံရ။

အခိၚ်လၟုဟ် ပ္ဍဲကဵုဍုၚ်ရိခဝ်ဒါ ကေုာံ ဍုၚ်လိုၚ်လေန်ပဳတံဂှ် ညးဍုၚ်ကွာန်ပါဲဒဴဘဲပၞာန်တံ သွက်ဂွံကလေၚ်လုပ်စိုပ်ကၠုၚ် ဗွဲမဂီုကၠီုမာန်၊ သွက်ဂွံကလေၚ်ဖျေံကဵုဒၞါဲဝါဲမာန် ကေုာံ သွက်ဂွံၚးတးတိဍာ်တံဂှ် ပံၚ်တောဲကၠောန်ၜိုတ်ဒၟံၚ် ကုညးဍုၚ်ကွာန်တံတုဲ ဆက်ထ္မံက်အာရုပ်ရဴ ပရေၚ်အုပ်ဓုပ်ညးဍုၚ်ကွာန်တံဏောၚ်ဂှ် ဂကောံဒပ်ပံၚ်ကောံ CNF ကေုာံ Local PDF တံ ကဵုလဝ်သမ္တီရ။

ဂကောံမဟာမိတ်ကောဒေံပိဂကောံ MNDAA မထ္မံက်ဒၟံၚ် ပရေၚ်ပၞာန် ၁၀၂၇ အပ္ဍဲဒေသရးသေံသ္ကုတ်သၟဝ်ကျာ ဒၞါဲပေါဲဗ္တိုက်တံ သ္ကာတ်မြဟ်ဒၟံၚ်လၟေၚ်ဒဒှ်တ္ၚဲဂှ်လေဝ် သွက်ပရေၚ်ဂီုကၠီုညးဍုၚ်ကွာန်တံဂှ် တဝ်စၞေဟ်စဵုဒၞါအာ ဂတအိုတ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

လဳကျာဝေန် ညးမၞုံအခေါၚ်ဟီုဂး MNDAA ဂှ် “ပရေၚ်ထ္ပက်ပၞာန်ဗလးတိဂှ် ပိုယ်တံ စဵုဒၞါတဝ်စၞေဟ်အာ ဂတအိုတ်ဏောၚ်။ တုဲပၠန် ထောံမခတိုဟ်နကဵုက္ၜၚ်ကျာတံဂှ် နကဵုပိုယ် လညာတ်သမ္တီ ထေက်ကဵုဒးတီလဝ်တံဂှ် ဗ္ကန်ဖျန်လဝ် ညးဍုၚ်ကွာန်ဒေသတံ နွံရ။ နကဵုပိုယ်တံ ဍုၚ်မနွံဒၟံၚ် အပ္ဍဲခရိုၚ်ကဝ်ကတံသီုဖအိုတ် ညံၚ်ဂွံဗၠးၜးဂှ် ဆက်ထ္မံက်အာဒၟံၚ် Operation တံဏီဏောၚ်” သာ်ဝွံ သ္ဂးရ။

နကဵုဒပ်ပၞာန်မဟာမိတ် ဒဳမဝ်ကရေတ်တေတ်ကောန်ဂကူဗၟာ MNDAA အပ္ဍဲပရေၚ်ပၞာန် ၁၀၂၇ မွဲဂိတုပြၚ်ဂှ် ဍုၚ်ချေန်ယှိုဲဟဝ်၊ မုၚ်ကိုဝ်၊ ဖံၚ်သာၚ်၊ ကောန်လုၚ်၊ ပါန်သိုၚ် ကေုာံ ဍုၚ်ကုန်ကျာန် နူကဵုအပ္ဍဲဒေသကဝ်က မၞုံရးသေံသ္ကုတ်သၟဝ်ကျာတံဂှ်ကီု သၞေဟ်ကၚ်သွံရာန်ဗၞိက်ပယျဵု ၄ ကေုာံ ဗ္ဒိုပ်ဒပ်ကံၚ်ဇြဳပၞာန်ဍောတ်ဇၞော် ၂၀၀ ပြၚ် သီဂွံလဝ်ရ။

ပ္ဍဲကဵုဒေသဏံ ဍုၚ်ပါန်သိုၚ်၊ မုၚ်ကိုဝ်၊ ဖံၚ်သာၚ်၊ ကုန်ကျာန်တံဂှ် ညးဍုၚ်ကွာန်ဒေသ ဗွဲမဂၠိုၚ်ဂၠေၚ် ကလေၚ်လုပ်စိုပ်မံၚ်စံၚ်ဒၟံၚ်အိုတ်တုဲ ပ္ဍဲကဵုဍုၚ်ချေန်ယှိုဲဟဝ် ကေုာံ ဍုၚ်ကောန်လုၚ်ဂှ် ညးကလေၚ်စဴကၠုၚ်ဌာန်ဒၟံၚ်တံ အောန်ဒၟံၚ်ဏီဂှ် လဳကျာဝေန် ဟီုရ။

သ္အာၚ်နူဂှ်ပၠန် ပါဲနူဍုၚ်ဖံၚ်သာၚ်တုဲ ပ္ဍဲကဵုဒေသပါန်သိုၚ်၊ မုၚ်ကိုဝ် ကေုာံ ဍုၚ်ကုန်ကျာန် သ္ကုတ်သၟဝ်ကျာတံဂှ် ပရေၚ်အုပ်ဓုပ်ဂေတ်ဂြိပ်ဒၟံၚ်ယျတုဲ ကိုပ်ကၠာအိုတ် ဘာဗ္တောန်လိက် ကေုာံ ရုၚ်ဂဥုဲတံ ပံက်လဝ် ဗွဲမပြဟ်တုဲ စထ္မံက်ဒၟံၚ်ရုပ်ရဴ ကမၠောန်ဒတုဲဖဵုညးဍုၚ်ကွာန်တံယျဂှ် ညးဆက်ဟီုရ။

ဍုၚ်မေဝ်သေအ် ကရေၚ်ဍာဲဂှ်တှ်ေ သီုကဵုဒပ်စဵုဒၞါကောန်ဂကူကရေၚ်ဍာဲ KNDF, ဒပ်ပၞာန်ကရေၚ်ဍာဲ KA ၊ ကလလတ မဒှ်ဂကောံဒပ်ပံၚ်ကောံကရေၚ်ဍာဲတံ ကေုာံ ဒပ်ပံၚ်ကောံ PDF တၞဟ်ဟ်တံ ဗ္တိုက်သီဂွံလဝ် ပ္ဍဲဂိတုဂျောန် ၂၄ တေံရ။

ဍုၚ်အေန်ဂျာန်ယာန် တွဵုရးကချေၚ်ဂှ် ဒပ်ပၞာန်ဗၠးၜးကချေၚ် KIA ဟွံဒးဗ္တိုက်သီမွဲသာ် ပ္ဍဲဂိတုနဝ်ဝေမ်ဗာ အပ္ဍဲသတ္တာဟတတိယဂှ် ဒပ်ကံၚ်ဇြဳပၞာန်တံ ထောံလသာအာ ဗ္ဒိုပ်ဒပ်ပၞာန်ပိဗ္ဒိုပ် သီုကဵုဗ္ဒိုပ်ဗၠာဲသၟိၚ် ကေုာံ ရုၚ်ဆက်စပ်ကဵုပရေၚ်အုပ်ဓုပ်တံဂှ်ရ။

နူကဵုဒပ်ကံၚ်ဇြဳပၞာန် သွက်ဂွံကလေၚ်ကေတ် ဍုၚ် မဒးထောံလသာလဝ် စပ်ကဵုပရေၚ်အုပ်ဓုပ်တံ ကေုာံ ဗ္ဒိုပ်ဒပ်ပၞာန် ပါလုပ်သီုကဵုဍုၚ် ဗ္တိုက်သီဂွံလဝ် နူကဵုသၟဝ်ယန္တယာကံၚ်ဇြဳပၞာန်တံဂှ်ကဵု သွက်ဂွံကလေၚ်ဖျေံဒပ်တံဂှ် ထ္ပက်ပၞာန်ဗလးတိဏံ ဟွံမာန်ဏီဖိုဟ်ရ။

ဆ္ဂး ဍုၚ်မဒးဆောံလေၚ် ဗလးလဝ်တဲတံဂှ် အခိၚ်ဟွံရုဲ ကလေၚ်ကေတ် နကဵုပရေၚ်ဗ္တိုက်တရဴကျာ မွဲဒမြိပ်သီအဝဵုဏံ ဒပ်ကံၚ်ဇြဳပၞာန် မ္ဒးသ္ပပဓာန်လဝ်ဂှ် အကာဲအရာဏံလေဝ် နွံဒၟံၚ်ရ။

ဇြေယျ အကြာပ်ဒပ်ဇၞော် ဒပ်ကျာ မသ္ပလဝ် CDM ဂှ် အထံက်အပၚ်ကံၚ်ဇြဳပၞာန်လၟုဟ်ဂှ်ဝွံ ဟိုတ်နူဒပ်ကျာမွဲရ နွံဂှ်တုဲ နကဵုဂကောံဒပ်ပၠန်ဂတးတံ ယဝ်ရကလေၚ်ခၠေဝ် ကုဒပ်ကျာဂှ်မာန်မှဟေၚ် ပၠန်ဂတးဏံလေဝ် တုဲဒှ်အာ ဗွဲမပြဟ်မာန်ဏောၚ်ဂှ် ထံက်ထ္ၜးလဝ်ရ။

“အထံက်အရီုအဓိက ပ္ဍဲပရေၚ်ပၞာန်ကံၚ်ဇြဳပၞာန်လၟုဟ်ဂှ်တှ်ေ သ္ပဒၟံၚ်အထံက်အပၚ် ကုပၞာန်ဒုၚ်ဍေံတံကီု လ္ပာ်စိုတ်ဓာတ်တံကီုဂှ် ဒပ်ကျာမွဲရနွံ။ ယဝ်ရသရိုဟ်အာ သီုဒပ်ကျာတှ်ေ ဂကောံပၠန်ဂတးပိုယ်တံလၟုဟ် သာတုဲသီကၠေံ ဍုၚ် မြက်နူဏံမာန်ဏောၚ်။ တုဲပၠန် ဍုၚ်ပိုယ်တံသီလဝ်တုဲတုဲတံဂှ်လေဝ် ဗၠးဘဲဏောၚ်။ အေ ဂှ်တှ်ေ ပိုယ်တံသ္ဇက်ဒးကၠောန်မွဲရနွံ။ ညအ်ဂှ်တှ်ေ သွက်ဂွံခၠေဝ်ပလန် ကုဒပ်ကျာရဏောၚ်။ ယဝ်ရဒပ်ကျာ သရိုဟ်စှ်ေအာမ္ဂး ပ္ဍဲကဵုဍုၚ်ပိုယ်တံသီဂွံလဝ်တံဂှ် လုပ်မံၚ်ၜိုဟ်ဟ်သြိုဟ်ဟ်ဂွံယျ။ ပၠန်ဂတးလေဝ် တုဲဒှ်အာ မြက်နူဏံဏောၚ်ဂှ် အဲဒုၚ်ဂိုၚ်ကေတ်ရ“ သာ်ဝွံ သ္ဂးရ။

ဒပ်ကံၚ်ဇြဳပၞာန်ဝွံ အပ္ဍဲကာလသီအဝဵု စနူကၞောတ်ဂိတုအံက်တဝ်ဗာ သၞာံဏံဂှ်တုဲ စဵုကဵုဂိတုဒဳဇြေမ်ဗာ သတ္တာဟပထမဂှ် ဟိုတ်နူဒးဂိဒၟံၚ် ပ္ဍဲကဵုပရေၚ်ပၞာန်ဗလးတိတံဂှ်ရ သွက်ဂွံယိုပ်ယာကၠုၚ် ဒှ်ဒၟံၚ်အကာဲအရာ အိုတ်ဒၟံၚ်ဍာ်ဂှ်တုဲ သာတုဲသုၚ်စောဲကၠုၚ် ပရေၚ်ဗ္တိုက်တရဴကျာတံရ။

အပ္ဍဲပရေၚ်ပၞာန် ၁၀၂၇ ဂှ် ဒပ်ကံၚ်ဇြဳပၞာန် ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော်တံဂှ်တုဲ ပ္ဍဲကဵုဒေသတအာၚ် ကေုာံ ဒေသတၟေၚ်ကဝ်က (၁) နူကဵုရးသေံသၟဝ်ကျာတံပါလုပ်ဂှ် ပ္ဍဲကဵုဒေသရခေၚ်တံဂှ် ကောန်အရာပ်ချိုတ် ၁၄၀ ပြၚ်၊ မၞိဟ်ကလိဂွံဝပ်ဇီုကပိုက်တံ စဵုကဵု ၂၀၀ ပြၚ် နွံလဝ်ဂှ် ဂွံတီကေတ် အတိုၚ်တၚ်လလောၚ်တြး ဂကောံကောဒေံပိဂကောံတံဂှ်ရ။

ပရိုၚ်−သြၚ်လောန်တိုၚ်(မ်)

ဗီု−The Kokang/ CIC