ဒၞါဲသိုၚ်ခၞံ ထံၚ်စာတ်ထဝါဲတၟိ ဒးဒုၚ်စံၚ်ပလီုပလာ်

ထဝါဲ၊ ဒဳဇြေမ်ဗာ ၅

ဒၞါဲသိုၚ်ခၞံထံၚ်စာတ်ထဝါဲတၟိ မဒက်ပ္တန်လဝ်တၟိ ပ္ဍဲဗ္ဒါဲကွာန်ဇြဳကျ၊ ပွိုၚ်ဍုၚ်ထဝါဲ၊ ရးတၞၚ်သဳဂှ် ဒးဒုၚ်စံၚ်ပလီုပလာ်လဝ်တုဲ သၟာကမၠောန် ၆ တၠလေဝ် ဒးဒုၚ်ရပ်ဒက်လဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဒဳဇြေမ်ဗာ ၃ အခိၚ်နူဂယးၜိုတ် ၉ နာဍဳဂှ် ကောန်ဒပ်ရပ်လွဟ် ဗ္ဒါဲ ၅၀ စိုပ်ကၠုၚ်တုဲ စံၚ်ပလီုပလာ်ဏာလဝ် ဒၞါဲကမၠောန်သိုၚ်ခၞံထံၚ်စာတ်ထဝါဲတၟိဂှ်ရ။

ဟိုတ်နူဒးဒုၚ်စံၚ်ပလီုပလာ်လဝ်ဂှ်တုဲ စမြိုၚ်ယာယဳ ဒၞါဲသၟာကမၠောန်တံ မံၚ်ဂှ်ကဵု ကာတုက်တိမွဲဖ္ဍိုက် ပၟတ်တူလီုလာ်အာလဝ်တုဲ သီုကဵုရပ်ကော်ဏာလဝ် မၞိဟ် ၆ တၠ ပါလုပ်သီုကဵုက္ဍိုပ်သ္ကိုပ်သၟာကမၠောန်တံဂှ်ရောၚ် သ္ဂးရ။

အတိုၚ်ဂလာန် ညးဒေသတံဂှ်မ္ဂး ဂကောံရပ်လွဟ်တံ ကဵုဏာသတိ ညံၚ်ဂွိုအ်ဆက်သိုၚ်ခၞံထံၚ်စာတ်တၟိဂှ်တုဲ သၟာကမၠောန်သှ်ေတံဂှ်လေဝ် သွက်ဂွံကလေၚ်စဴဌာန်ဒၟံၚ်အိုတ်ဂှ် ဟီုဂးဏာလဝ်ရောၚ် ဟီုရ။

တုဲကၠုၚ် ပ္ဍဲဂိတုသေပ်တေမ်ဗာ ၃၀ တေံဂှ်လေဝ် ဂကောံဒပ်ပၠန်ဂတးဒမၠုက်ထဝါဲ DGRF တံ ရပ်ဒက် ကောန်ထံၚ် ၅ တၠကဵု ညးဒုၚ်ကာထံၚ်စာတ်ထဝါဲ ၂ တၠ မကၠုၚ်ဗာ်အှော် ဗ္ဒါဲဒၞါဲကမၠောန်ထံၚ်စာတ်ထဝါဲတၟိဂှ်တုဲ ပသောၚ်ထောံလဝ် ညးဒုၚ်ကာထံၚ် ၂ တၠဂှ် လလောၚ်ပ္တိတ်လဝ်ရ။

ထံၚ်စာတ်ထဝါဲတၟိဂှ် ကံၚ်ဇြဳပၞာန် ရပ်စပ်လဝ် သြန်ဗွဝ် သၞာံဘဏ္ဍာ ၂၀၂၃−၂၀၂၄ အပံၚ်ကိုဋ်ဒ္ကေဝ် မွဲကိုဋ်ပြၚ်တုဲ သိုၚ်ခၞံဒၟံၚ်ဂှ် ဂွံတီကေတ်ရ။

အတိုၚ်တၚ်လလောၚ်တြး ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုဏံ ပ္ဍဲရးတၞၚ်သဳ ညးဍုၚ်ကွာန်ကောန်အရာပ် ဗ္ဒါဲ ၂၀၀၀ ဒးဒုၚ်ရပ်လဝ်တုဲ ဗွဲမဂၠိုၚ်ဝွံ ဒးဒုၚ်ဖျေံလဝ်ထံၚ် ပ္ဍဲကဵုထံၚ်စာတ်ထဝါဲဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ