ပ္ဍဲခရိုၚ်သဓီု KNU ဟိုတ်နူလွဟ်ဇၞော်စှ်ေတုဲ ကောန်အရာပ် ဒးချိုတ်လဝ် မွဲတၠ၊ ဒးလဝ်ဘဲဝပ် မွဲတၠ

သဓီု၊ ဒဳဇြေမ်ဗာ(၁၆)

ပ္ဍဲခရိုၚ်သဓီု တိဍာ်ထိၚ်ဒဝ်ဗော်သွးကောန်ဂကူကရေၚ် KNU ဒပ်မဟာ (၁) ဂှ် ဟိုတ်နူမကမ်လွဟ်ဇၞော်ကံၚ်ဇြဳပၞာန် ပန်ဖျေံနၚ် စှ်ေပါ်ခတိုဟ်လဝ်တုဲ ကောန်အရာပ် ဒးချိုတ်လဝ် မွဲတၠ ဒးလဝ်ဘဲဝပ် မွဲတၠရဂှ် ဂွံတီကေတ် အတိုၚ်တၚ်လလောၚ်တြး KNU ခရိုၚ်သဓီုရ။

ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၇) တုဲကၠုၚ်တေံ နူကဵုဒပ်အမၠံက်ကံၚ်ဇြဳပၞာန် စၟတ် (၃၁၄) ပန်ဖျေံလဝ်လွဟ်ဇၞော် ပ္ဍဲကွာန်ယှိုဲယောၚ်ပျ၊ ပါန်အောၚ်ကုမ် ကဵုဒေါက်ယာတ် မဒှ်ကွာန် မၞုံခရိုၚ်သဓီု KNU ကြပ်ဒှ် သီုအလုံပွိုၚ်မွဲတ္ၚဲရ။

ပ္ဍဲပရေၚ်ဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်ဂှ် ကောန်ကွာန်အဝေါန်ဂျဳ အယုက် (၄၆) သၞာံ သဝ်လာအဝ်ဂှ် ဒးလဝ်ဘဲဝပ်မကမ် ပ္ဍဲက္ဍိုက်ကဵုပ္ဍဲဇိုၚ်တုဲ ပ္ဍဲကဵုဒၞာဲဒှ်ပရေၚ်ပရောဂှ်ဟေၚ် ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲတၚ်လ​လောၚ်တြး KNU ခရိုၚ်သဓီုရ။

သ္အာၚ်နူဂှ်ပၠန် ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ သ္ၚိဒၟံၚ်ညးဒေသ မၞုံကွာန်ယှိုဲယောၚ်ပျ (၆) မ ဒးလီုလာ်လဝ်တုဲ ဂၠဴ (၃) လေဝ် ဇီုကပိုက်ဒးလဝ်ဘဲဝပ်ရဂှ် ဟီုလဝ်ရ။

ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၄) တုဲကၠုၚ်တေံလေဝ် ဟိုတ်နူတံဒပ်ကံၚ်ဇြဳပၞာန် ဖျေံသ္ဇိုၚ်ၜဳကလေၚ် ပန်ဖျေံလဝ်လွဟ်ဇၞော်တုဲ ဥူဝေန်ဖေ ဒၟံၚ်ကွာန်ယှိုဲယောၚ်ပျ အယုက် (၇၀) သၞာံ ဒးလဝ်ဘဲဝပ်မကမ်တုဲ သ္ၚိဒၟံၚ် (၄) မလေဝ် ဇီုကပိုက်ဒးလီုလာ်လဝ်ရ။

သီုပေါဲဗတိုက်ဟၟဲမွဲသာ် ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကဵုကွာန် ဒၞာဲကောန်အရာပ်ညးဍုၚ်ကွာန်တအ် မံၚ်တန်တဴဒၟံၚ် သီုဗ္တံသီုတ္ၚဲတုဲ ညးဒေသ နူကွာန်ဗ္ဒာဲဗ္ဒာဲဂှ် ပါလုပ်သီုကွာန်ယှိုဲယောၚ်ပျ၊ ဒေါက်ယာတ်တအ် ဒးဆုဲပြံၚ်မံၚ်တန်တဴဴဒၟံၚ် ပ္ဍဲဒၞာဲဗၠးဘဲရဂှ် ဂွံတီကေတ် နူညးဒေသတအ်ရ။

ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၂၀) တုဲကၠုၚ်တေံလေဝ် နူကဵုတံဒပ်ပၞာန်တိုက်ကံၚ်ဇြဳပၞာန် စၟတ် (၄၀၄) ပန်ဖျေံနၚ်လွဟ်ဇၞော် ပ္ဍဲကဵုကွာန်နာတ်ဂျဳ၊ ပွိုၚ်ဍုၚ်ၜဳကလေၚ်တုဲ ကောန်ၚာ် (၂) တၠ ဒးလဝ်ဘဲဝပ်ရဂှ် KNU ခရိုၚ်သဓီု လလောၚ်တြးလဝ်ပရိုၚ်ရ။

ပရိုၚ်- သြၚ်လောန်တိုၚ်မ်

ဗီု – KNU