ပ္ဍဲကအ်ကြိက် ဟိုတ်နူလွဟ်ဇၞော်စှ်ေတုဲ ကျာ်ဇၞော်မွဲဇကု စဴအာသွဝ်

ကအ်ကြိက်၊ ဒဳဇြေမ်ဗာ ၁၅

အပ္ဍဲပေါဲဗ္တိုက် လ္တူဍုၚ်ကအ်ကြိက် တွဵုရးကရေၚ်ဂှ် ဟိုတ်နူလွဟ်ဇၞော် ဒတုံဗ္တိုဟ်ထ္ကးတုဲ ကျာ်ဇၞော်မွဲဇကု စဴအာသွဝ်ဂှ် ဂွံတီကေတ် အတိုၚ်တၚ်လလောၚ်တြး ဂကောံဇြဟတ်ပၠန်ဂတး ကေုာံ ညးဒေသတံရ။

စနူဂိတုဒဳဇြေမ်ဗာ ၁ တုဲ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဒၞါဲဒပ်ကံၚ်ဇြဳပၞာန်တံ မဖျေံလဝ်ဒပ် လ္တူဍုၚ်ကအ်ကြိက်ဂှ်တုဲ ပေါဲဗ္တိုက်ၜါလ္ပာ်တံ ဆက်က္တဵုဒှ်ဒၟံၚ် စဵုကဵုဂိတုဒဳဇြေမ်ဗာ ၁၄ ရ။

အပ္ဍဲပေါဲဗ္တိုက်ဂှ် ပ္ဍဲဂိတုဒဳဇြေမ်ဗာ ၁၃ အခိၚ်နူဂယး ၜိုတ် ၁၀ နာဍဳဂှ် နူကဵုဒပ်အမၠံက် သၟဝ်တဲဒပ်ကံၚ်ဇြဳပၞာန် စကခ ၁၂ ပန်ပှော်စုတ်လဝ် နကဵုလွဟ်ဇၞော်ကြာန်န်ဂှ်ရ ဒတုံဗ္တိုဟ်ထ္ကးအာလဝ် လ္တူဘာလကျာ် (မြို့တော်ဥ◌ီး) အရာပ် စၟတ်(၂) ဍုၚ်ကအ်ကြိက်ဂှ်ရ။

ဟိုတ်နူမကမ်လွဟ်ဇၞော် ဒတုံဗ္တိုဟ်ထ္ကးအာလဝ်ဂှ်တုဲ ကျာ်ဇၞော်မွဲဇကု စဴအာသွဝ်တုဲ ၂ ဇကု ကလိဂွံလဝ်ဝပ်သ္ကာတ်မြဟ်ဂှ် ကရောၚ်ပၞာန်ကၠဗု လလောၚ်ပ္တိတ်လဝ်ပရိုၚ်ရ။

ပ္ဍဲကဵုပေါဲဗ္တိုက်ဍုၚ်ကအ်ကြိက်ဂှ် ဒပ်ကံၚ်ဇြဳပၞာန် ဟိုတ်နူစွံပွန်ပန်ပှော်ဗ္တိုက်လဝ် ဒၞါဲညးဍုၚ်ကွာန်ကောန်အရာပ်တံ မမံၚ်တန်တဴဒၟံၚ်တံဂှ်တုဲ ဒးဂြိပ်ဒဴပါဲဒလေတ်ဒၟံၚ် ကြပ်အလုံဍုၚ်မွဲရောၚ်ဂှ် ညးဒေသတံ ဟီုဂးလဝ်ရ။

ပ္ဍဲကဵုပေါဲဗ္တိုက်ဍုၚ်ကအ်ကြိက် ပွိုၚ် ၂ သတ္တာဟဂှ် ဗ္တိုက်သီလဝ် ဗ္ဒိုပ်ဒပ်ကံၚ်ဇြဳပၞာန်သီအဝဵုတံတုဲ ထိၚ်ဒက်လဝ် ဂၠံၚ်ဇၞော်အာယှ မဒှ်ဂၠံၚ်တရဴသွံရာန်ဗၞိက် သေံ−ဗၟာဂှ်ရောၚ် ကရောၚ်ပၞာန်နဂါဖျူ လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−ကရောၚ်ပၞာန်ကၠဗု