လံၚ်လုၚ်၊ ဒဳဇြေမ်ဗာ ၂၆
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ဗ္ဒါဲကွာန်(စပ်ပြဲ) ၊ ပွိုၚ်ဍုၚ်လံၚ်လုၚ်၊ ရးတၞၚ်သဳ ဟိုတ်နူဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ဂှ် ဂွံတီကေတ် အတိုၚ်တၚ်လလောၚ်ပ္တိတ် ဂကောံဇြဟတ်ပၠန်ဂတးတံရ။
ပ္ဍဲဂိတုဒဳဇြေမ်ဗာ ၂၁ တုဲကၠုၚ်တေံ အကြာဒပ်ကံၚ်ဇြဳပၞာန် ပါ်ကရောၚ်ပၞာန် ၃ ကရောၚ်ပၞာန်တုဲ မလုပ်စိုပ်ကၠုၚ် နကဵုဇြဟတ်ပွဳပွူ ၈၀ ဂှ်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဗ္ဒါဲကွာန်(စပ်ပြဲ) ဂှ်ရ။
အပ္ဍဲပေါဲဗ္တိုက် မက္တဵုဒှ်လဝ် လလအ်ပွိုၚ်ကြပ်ဘာ်နာဍဳဂှ် ကောန်ဒပ်ကံၚ်ဇြဳပၞာန် ၂ တၠ ချိုတ်တုဲ မၞိဟ်ဇီုကပိုက်ကလိဂွံဝပ်တံလေဝ် နွံဒၟံၚ်ဂှ် ညးဒုၚ်တာလျိုၚ် လလောၚ်ပရိုၚ် ဒပ်စြေက်(၁) ဒပ်နာ်ထဝါဲ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန်တံ ဟိုတ်နူပန်ပှော်လဝ် နကဵုလွဟ်ဇၞော်၊ လွဟ်ဍောတ် ကြာန်န်တုဲ ညးဍုၚ်ကွာန်ဒေသ နူကဵုကွာန်(စပ်ပြဲ) ဝွံ ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတံရောၚ်ဂှ် ညးဒေသမွဲတၠ ဟီုရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ သီကေတ်ဏာလဝ် ကပေါတ်မၞုံကဵုၚုဟ်မး နူကဵုဆေၚ်ဖျာ ကေုာံ သ္ၚိဒၟံၚ် ညးဍုၚ်ကွာန်ဒေသ ကွာန်(စပ်ပြဲ) တံဂှ်ကဵု ကွဳလိုန်ဓာတ် ၅ ဖ္ဍိုက် အတေၚ်အဓမ္မဂှ် သ္ဂးရ။
တုဲကၠုၚ် ပ္ဍဲဂိတုဒဳဇြေမ်ဗာ ၂၀ တေံ ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက် ဒပ်ကံၚ်ဇြဳပၞာန် မဖျေံလဝ်ဗ္ဒိုပ် လ္တူဍုၚ်လံၚ်လုၚ်ဂှ်တုဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ရ။
ပရေၚ်ဗ္တိုက်ဏံဂှ် ဒပ်စြေက်(၁) ဒပ်နာ်ထဝါဲ ၊ ဂကောံဒပ်စဵုဒၞါ ညးဍုၚ်ကွာန်ပွိုၚ်ဍုၚ်လံၚ်လုၚ် LLPDF ကေုာံ ဒပ်စြေက်(၅) ဒပ်နာ်ထဝါဲတံ ပံၚ်တောဲဗ္တိုက်လဝ်ရ။
အပ္ဍဲပရေၚ်ဗ္တိုက် လ္တူဍုၚ်လံၚ်လုၚ်ဂှ် ကောန်ဒပ်ကံၚ်ဇြဳပၞာန် ၆ တၠ ချိုတ်တုဲ ကောန်သ္ဂံၚ် PDF ၂ တၠ ပြဟ်လလုဲအာလဝ်တုဲ ဗ္ဒိုပ်သၞေဟ်ကၚ် ဒပ်ကံၚ်ဇြဳပၞာန် ၂ ဂှ်လေဝ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ စံၚ်ပလီုပလာ်လဝ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−ပကဖ လံၚ်လုၚ်
လိက်စၞောန်သွက်ဗီု− အခိၚ်ဂကောံဒပ်စဵုဒၞါညးဍုၚ်ကွာန်တံ လုပ်စိုပ်ဗ္တိုက် ဒၞါဲကံၚ်ဇြဳပၞာန်ဖျေံလဝ်ဒပ် အပ္ဍဲပွိုၚ်ဍုၚ်လံၚ်လုၚ် ပ္ဍဲဂိတုဒဳဇြေမ်ဗာ ၂၀ တေံ
sanlontai