အပ္ဍဲပရေၚ်ဗ္တိုက်ၜါလ္ပာ် ၜဳကလေၚ်ဂှ် ကောန်ၚာ်သၟတ် ၂ တၠ ချိုတ်တုဲ ၄ တၠ ကလိဂွံဝပ်

ၜဳကလေၚ်၊ ဒဳဇြေမ်ဗာ ၂၆

တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ အကြာကွာန်အလူ ကဵု ကွာန်ဒံက်ယာတ် (ဒေါက်ရပ်) ဂှ် ကြဴနူဒပ်ကံၚ်ဇြဳပၞာန်တံ ဒးဒုၚ်ဗ္တိုက်ဗ္တိုဟ်မာၚ်တုဲ အပ္ဍဲပရေၚ်ပန်ပှော်ၜါလ္ပာ် မက္တဵုဒှ်လဝ်ဂှ် ကောန်ၚာ်သၟတ် ၂ တၠ ချိုတ်တုဲ ၄ တၠ ကလိဂွံလဝ်ဝပ်ရောၚ် ဂွံတီကေတ် အတိုၚ်ဂလာန် ညးဒေသတံကဵု ဂကောံဒပ်စဵုဒၞါညးဍုၚ်ကွာန်တံရ။

တုဲကၠုၚ် ပ္ဍဲဂိတုဒဳဇြေမ်ဗာ ၂၄ အခိၚ်နူဂယး ၜိုတ် ၁၀ နာဍဳ ရေၚ်ကွဳစက်ကံၚ်ဇြဳပၞာန် ကွဳစက် ၈ ဖ္ဍိုက်ပါဗက်ကၠုၚ် နူကဵုပွိုၚ်ဍုၚ်သဓီု ဒဳကၠုၚ် လ္ပာ်ပွိုၚ်ဍုၚ်ကျာ်ထဝ်ဂှ် ဒပ်ပံၚ်ကောံ PDF တံကဵု KNLA တံ ဗ္တိုဟ်ဗ္တိုက်လဝ်မာၚ် စဵုကဵုၜါဝါရ။

ကြဴနူဒးဒုၚ်ဗ္တိုဟ်ဗ္တိုက်မာၚ်တုဲဂှ် နူကဵုဒပ်ကံၚ်ဇြဳပၞာန် ဟိုတ်နူလုပ်စိုပ်ပန်ပှော်ဗ္တိုက်လဝ် အပ္ဍဲကွာန်တပျေနဳ နကဵုလွဟ်ဇၞော်၊ လွဟ်ဍောတ်တံဂှ်တုဲ ကောန်ၚာ်သၟတ် အာယုက် ၁၃ သၞာံမွဲတၠ ချိုတ်တုဲ ညးဍုၚ်ကွာန်ကောန်အရာပ်ဒေသ ၄ တၠ ကလိဂွံလဝ်ဝပ်ရ။

အခိၚ်ဒပ်ကံၚ်ဇြဳပၞာန် လုပ်စိုပ်ဗ္တိုက် ပ္ဍဲကွာန်တပျေနဳဂှ် နူကဵုဒပ်ကံၚ်ဇြဳပၞာန် ကွာန်ဖိုဝ်ဝါတုၚ် (ဖိုးဝါသိမ်ကျေးရွာ) ပန်ပှော်စုတ် လွဟ်ဇၞော်ဂှ် ကောန်ၚာ်သၟတ်မွဲတၠ ဒးအာကဝေက်မာၚ် ချိုတ်အာလဝ်တုဲ မၞိဟ်ကလိဂွံဝပ်တံလေဝ် နွံဒၟံၚ်ဂှ် ညးဒေသတံ ဟီုရ။

အတိုၚ်ဂလာန် ညးဒေသတံဂှ်မ္ဂး အပ္ဍဲပရေၚ်ပန်ပှော်ၜဳကလေၚ်ဂှ် ကောန်အရာပ် ဟွံအောန်နူကဵု ၂ တၠ ချိုတ်မာန်တုဲ ဟိုတ်နူတိဍာ်ဟွံညိၚ်ဝတ်ဏီတုဲ သွက်ဂွံဂွံတၚ်နၚ်စရၚ် ချိုတ်တ်ပၠိုတ်တ်ဂှ် ဟွံဂွံတီကေတ်ဏီပုဟ်ဂှ် သ္ဂးရ။

အပ္ဍဲလၟေၚ်ဒဒှ် ရေၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်ဗ္တိုဟ်မာၚ်ဂှ် ကွဳစက်ပၞာန်မွဲဖ္ဍိုက် လီုတုဲ ဟွံအောန်နူကဵု ၅ တၠ ဇီုကပိုက်ချိုတ်မာန်ဂှ် ကောန်ဂကောံဒပ်ပံၚ်ကောံဇြဟတ်ပၠန်ဂတးတံ ဟီုဂးလဝ်ရ။

ကြဴနူလၟေၚ်ဒဒှ်ဏံတုဲ နူကဵုဒပ်ကံၚ်ဇြဳပၞာန် စနူကဵုဂိတုဒဳဇြေမ်ဗာ ၂၅ အခိၚ်နူဂယးဂှ်တုဲ ဟိုတ်နူထ္ပက်ကၠုၚ်ကရောၚ်ပၞာန် ပ္ဍဲကွာန်တပျေနဳကဵု ကွာန်အလူလေဝ် ပွိုၚ်ဍုၚ်ၜဳကလေၚ်ဂှ်တုဲ ညးဒေသတံ ဒးဂြိပ်ဒဴပါဲဒလေတ်ဒၟံၚ်ဂှ် ဂွံတီကေတ်ရ။

လၟေၚ်ဒဒှ်ဏံဝွံ ပ္ဍဲပွိုၚ်ဍုၚ်ၜဳကလေၚ် မဒှ်တိဍာ်အုပ်ဓုပ် ဒပ်မဟာ (၁) ဗော်သွးကောန်ဂကူကရေၚ် KNU ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ အပ္ဍဲကာလဗ္ဒါဲပန်ဂိတုဏံ ပရေၚ်ပန်ပှော်ကလေၚ်မွဲဝါပၠန်တံ က္တဵုဒှ်ကၠုၚ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media