ကွဳစက်မွဲဖ္ဍိုက် မဖ္ဍိုက်နၚ် ကပေါတ်ပြံၚ်ဒပ် ခရမ ၄၀၆ ပ္ဍဲကဵုသ္ကုတ်ဂၠံၚ်ရေဝ် ဒးဒုၚ်ရပ်

ရေဝ်၊ ဒဳဇြေမ်ဗာ ၂၆

တွဵုရးဍုၚ်မန်၊ ပွိုၚ်ဍုၚ်ရေဝ် အကြာကွာန်ကမအ်ကၞေၚ် ကေုာံ ကွာန်သာယာ သ္ကုတ်ဂၠံၚ်ရေဝ်−ထဝါဲဂှ် ကွဳစက်မွဲဖ္ဍိုက် မဖ္ဍိုက်ပ္တိုန်နၚ် ကပေါတ်ပြံၚ်ဒပ် ခမရ ၄၀၆ ဖျေံသ္ဇိုၚ်ဍုၚ်ဍာ်ဗုဂှ် ရပ်ဂွံလဝ်ရောၚ် ရုၚ်ဒုသ္ကိုပ်ကောပ်ကာဲဒေသပၞာန်၊ ဒေသပၞာန်ပါ် စၟတ် ၃၊ ဒေသပၞာန်သၠုၚ်ကျာ လလောၚ်ပ္တိတ်လဝ်ရ။

ပ္ဍဲဂိတုဒဳဇြေမ်ဗာ ၂၄ အခိၚ်နူဂယး ၜိုတ် ၉ နာဍဳကဝိုက် ပ္ဍဲကဵုဂၠံၚ်ဇၞော်ပျဳထံၚ်သု ရေဝ်−ထဝါဲဂှ် ဒပ်ပၞာန်ဗၠးၜးကောန်ဂကူကရေၚ် KNLA ကဵု ဂကောံဒပ်ပံၚ်ကောံ PDF တံ အဃောစၟဳတ်ဒၟံၚ် သွက်တိဍာ်အုပ်လဒံဂှ် ရပ်ဂွံလဝ်ရ။

ပ္ဍဲကဵုလ္တူကွဳစက်ထရက် ရပ်ဂွံလဝ်ဂှ် ဂွံဆဵုကေတ်လဝ် ကပေါတ်ဆုဲပြံၚ်ဒပ် ဒပ်ခမရ ၄၀၆ ဂမၠိုၚ် မပ္တံကဵုကယျိုၚ်ပၞာန်၊ ကဠာဍာ်ကလောံ၊ ကွဳလိုန်ဓာတ်ၜါဖ္ဍိုက်၊ ဂၠိက်ယာတ်၊ ထၟာဲပုၚ်ထၟာဲသွ ကေုာံ လိက်တၞးစၟတ်သမ္တီ စပ်ကဵုလ္ပာ်ပၞာန်တံဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

ကြဴနူဂှ်တုဲ ကြဴနူစၟဳတ်သၟာန်သၟုက် ညးဒဳယာန် ကေုာံ ညးဗက်ယာန်လက္ကရဴ ဒၟံၚ်ပွိုၚ်ဍုၚ်အၚ်စိၚ် ကေုာံ ပွိုၚ်ဍုၚ်ဥက္ကလာပသၠုၚ်ကျာ၊ ရးလ္ဂုၚ်တုဲဂှ် ဒၟါနူဟွံဆက်စပ်ကဵုညးတံဂှ်ရ ကလေၚ်ဗလးကဵုလဝ်တုဲ သီထောံလဝ် ကပေါတ်ပြံၚ်ဒပ်တံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

မွဲဒမြိပ်ဂၠံၚ်ဇၞော်ပျဳထံၚ်သု စၟတ် ၈ ရေဝ်−ထဝါဲဂှ် ကောန်ဂကောံဒပ်ပံၚ်ကောံဂမၠိုၚ်ဝွံ လၟေၚ်ဒဒှ်တ္ၚဲ သွက်ပရေၚ်တိဍာ်အုပ်လဒံတံဂှ် စၟဳတ်ရေၚ်တၠုၚ်ဒၟံၚ်တုဲ ဒပ်ကံၚ်ဇြဳပၞာန်ဝွံ အရပ်စပ်ကပေါတ်ပၞာန်တံရဂှ် ဒးဆုဲပြံၚ်ဒၟံၚ် နကဵုကွဳစက်ဖ္ဍိုက်ညးအာတရဴတံ၊ နကဵုကွဳစက်ကောန်အရာပ်ရပ်စပ်တံဂှ် ဟီုဂးလဝ် ပ္ဍဲကဵုတၚ်လလောၚ်တြးဂှ်ရ။

ဟိုတ်ဂှ်ရ နကဵုကွဳစက် အာကၠုၚ်ဒၟံၚ် လ္တူဂၠံၚ်မတ်မလီု၊ မုဟ်ဍုၚ်၊ ရေဝ်၊ ဇြပ်ဗု၊ ထဝါဲ၊ ဗိက်တံဂမၠိုၚ် လ္ပဖ္ဍိုက်ပ္တိုန်ကပေါတ်ဗၞိက်၊ မၞိဟ် မဆက်စပ်ကဵုကံၚ်ဇြဳပၞာန်တံဂှ်ကီု၊ နကဵုညးဍုၚ်ကွာန်တံ လ္ပဍိုက်ဗက် ကွဳစက်ဒပ်ကံၚ်ဇြဳပၞာန်တံအိုတ်ဂှ် ထပ်ဖ္တိုက်ဖ္အောဝ်လဝ်ရ။

တမ်ဒပ်တိုက် စၟတ် (၄၀၆) ဖျေံသ္ဇိုၚ်ပွိုၚ်ဍုၚ်ဍာ်ဗုဂှ်ဝွံ နွံဒၟံၚ် သၟဝ်ကောပ်ကာဲ ဌာန်ဂအုပ်ကောပ်ကာဲပရေၚ်ပၞာန် စၟတ် (၈) ၊ ဌာန်ဂအုပ်ပၞာန်ရးရေၚ်ၜဳတုဲ အပ္ဍဲတွဵုရးကရေၚ်ကဵု ခရိုၚ်ထဝါဲဂှ် ဒှ်တမ်ဒပ် ဒးတိတ်ဒၟံၚ်မုက်ပၞာန်လၟိုန်မွဲရောၚ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု− PDF (နွေဦး)