ပ္ဍဲပေါဲဗတိုက်နောၚ်ဂျဳအိုၚ် လ္ပာ်ဒပ်ကံၚ်ဇြဳပၞာန် ဒးချိုတ်လဝ် ၁၈ တၠတုဲ ထောံဗဒိုပ် ဂြိပ်တိတ်အာ

အယျာတဝ်၊ ဒဳဇြေမ်ဗာ (၂၆)

​ပ္ဍဲကဵုပေါဲဗတိုက်နောၚ်ဂျဳအိုၚ်၊ ပွိုၚ်ဍုၚ်အယျာတဝ်၊ ရးဒေသသက်ဂါၚ်ဂှ် လ္ပာ်ကံၚ်ဇြဳပၞာန်ဒးချိုတ်လဝ် (၁၈) တၠတုဲ ​ထောံဗဒိုပ် ဂြိပ်တိတ်လဝ်ရဂှ် အလဵုအသဳညဳသၟဟ်ကောန်ဂကူ NUG လလောၚ်တြးလဝ် ပ္ဍဲအခိၚ်ဒေါဝ်တ္ၚဲ တ္ၚဲဏံရ။

သ္ပတံနူဂိတုနဝ်ဝေမ်ဗာ စၟတ်တ္ၚဲ (၂) တေံတုဲ ဗဒိုပ်ဗၠာဲသၟိၚ်နောၚ်ဂျဳအိုၚ် ဗၠာဲသၟိၚ်ကဵု ကောန်ဒပ်ကံၚ်ဇြဳပၞာန် ၜိုတ် (၃၂) တၠ ဖျေံလဝ်ဗဒိုပ်ဂှ် ဂကောံဇြဟတ်ပၠန်ဂတးတအ် ဗိုၚ်ကၟာတ်ဗတိုက်လဝ်တုဲ ပေါဲဗတိုက်ဒှ်လဝ် သီုတ္ၚဲသီုဗ္တံအဆက်က်ကီု ကောန်ဒေသ ညးဍုၚ်ကွာန်တအ် ဒးဆုဲပြံၚ်မံၚ်တန်တဴဒၟံၚ် ဒၞာဲဗၠးဘဲရဂှ် ဓမံက်ထ္ၜးလဝ်ရ။

ဟိုတ်နူဂကောံဇြဟတ်ပၠန်ဂတးတအ် ဗိုၚ်ကၟာတ်ဗတိုက်လဝ်တုဲ ဗၠာဲသၟိၚ်ကဵု ကောန်ဒပ်ကံၚ်ဇြဳပၞာန် ၜိုတ် (၁၈) တၠ ဒးချိုတ်လဝ်တုဲ ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၂၃) ဂှ် ထောံဗဒိုပ်ဂြိပ်တိတ်အာလဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပရေၚ်ဗတိုက်ပန်လဝ်ဏံ (ပကဖ) ပွိုၚ်ဍုၚ်အယျာတဝ် ပွိုၚ်တိုက် ၁၊ ၂၊ ၃၊ ၄၊ ၅၊ ၆၊ ၇၊ ၈ ညးတာလျိုၚ်တအ်ကီု သီုသ္ဂံၚ်တအ်၊ ဒပ်ပၞာန်စဵုဒၞာညးဍုၚ်ကွာန် (PDF) ခရိုၚ်မုမ်ယွာ သ္ဂံၚ် နူတံဒပ် ၆၊ ၁၈၊ ၁၉၊ ၂၄၊ ၂၆ တအ် ပံၚ်တောဲဗတိုက်လဝ်ရ။

ဗဒိုပ်ဗၠာဲသၟိၚ်နောၚ်ဂျဳအိုၚ်၊ ပွိုၚ်ဍုၚ်အယျာတဝ်ဂှ် ကြဴနူဒပ်ပၞာန်သီအဝဵုတုဲ သ္ပတံနူဂိတုသေပ်တေမ်ဗာ သၞာံ ၂၀၂၂ ဒုတိယသတ္တာဟတေံတုဲဂှ် ကောန်ဒပ်ကံၚ်ဇြဳပၞာန်တအ် ကၠုၚ်ဖျေံသ္ဇိုၚ် ဖျေံလဝ်ဗဒိုပ်တုဲ စံၚ်ပလီုဒၟံၚ်ကွာန်ကီု၊ ရပ်ဒက်ပြိုက်ဂစိုတ်ဒၟံၚ် ကောန်အရာပ်ညးဍုၚ်ကွာန်တအ်ကီု သီုကဵုကၠတ်ဂၠံက်ကေတ်ဒၟံၚ် ကပေါတ်နွံကဵုၚုဟ်မးးတအ်ရဂှ် ဓမံက်ထ္ၜးလဝ်ရ။

ပရိုၚ် – သြၚ်လောန်တိုၚ်မ်

ဗီု – NUG