သၞေၚ်ကၚ်စၟဳစၟတ်ဒဒန်ဇုက်ရေဝ် ဒးဒုၚ်ဗတိုက်တုဲ BGF ဒးချိုတ်လဝ် မွဲတၠ၊ ညးဗြဴမွဲတၠ ဒးလဝ်ဘဲဝပ်

ရေဝ်၊ ဒဳဇြေမ်ဗာ (၂၇)

သၞေဟ်ကၚ်စၟဳစၟတ်ကံၚ်ဇြဳပၞာန် မၞုံအကြာကွာန်တၟံကနေၚ်ကဵု ကွာန်စဳပျး၊ ပွိုၚ်ဍုၚ်ရေဝ် တွဵုရးဍုၚ်မန်ဂှ် ဟိုတ်နူဒးဒုၚ်ဗတိုက်လဝ်တုဲ ကောန်ဒပ်ပၞာန်မၚ်ပယျဵု BGF မွဲတၠ ဒးချိုတ်လဝ်တုဲ ညးဗြဴမွဲတၠ ဒးလဝ်ဘဲဝပ်ရဂှ် ဂွံတီကေတ် နူညးဒေသတအ်ရ။

သၞေဟ်ကၚ်စၟဳစၟတ်ဒဒန်ဇုက် ဒပ်ကံၚ်ဇြဳပၞာန်ကဵု ကောန်ဒပ်ပၞာန်မၚ်ပယျဵု BGF သၟဝ်တဲကံၚ်ဇြဳပၞာန်တအ် ဖျေံလဝ်ဗဒိုပ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ် ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၂၅) အခိၚ်နူဂယး ၜိုတ် (၈) နာဍဳရ။

ဟိုတ်နူလုပ်ဗတိုက်လဝ်ဏံတုဲ ကောန်ဒပ်ပၞာန်မၚ်ပယျဵု BGF သဝ်တဳ ဒးချိုတ်လဝ် ပ္ဍဲဒၞာဲဒှ်ပရေၚ်ပရောဂှ်တုဲ ကောန်ဒေသဂှ် ဒဝ်ယမေန် ကၠုၚ်သွံဒၟံၚ်ဖျာ ဗ္ဒာဲသၞေဟ်ကၚ်ဂှ် ဒးလဝ်ဘဲဝပ်မကမ်ရဂှ် ဟီုလဝ်ရ။

ညးဗြဴဒးလဝ်ဘဲဝပ်ဂှ်မ္ဂး နူကဵုရုၚ်ဂဥုဲပွိုၚ်တိုက်လမိုၚ် ဂကောံရီုဗၚ်ဟံၚ်ပြာ်မၞိဟ်တအ် ပလံဗစိုပ်ဏာလဝ် ရုၚ်ဂဥုဲဇၞော်ညးဍုၚ်ကွာန် မတ်မလီု လွဳလွတ်ကဵုလဝ်ရဂှ် ဂွံတီကေတ်ရ။

ကြဴနူသၞေဟ်ကၚ်စၟဳစၟတ်ဒဒန်ဇုက် ဒးဒုၚ်ဗတိုက်လဝ်တုဲဂှ် ဒပ်ကံၚ်ဇြဳပၞာန် ပတေၚ်ဂြတ်လဝ် ပရေၚ်စၟဳစၟတ် ညးတတ်ကၠောံအာကၠုၚ်ဒၟံၚ် ပ္ဍဲဒဒန်တအ်တုဲ ရပ်စပ်စၟဳစၟတ်ဒၟံၚ် ညးဒးဒှ်သၠေဟ်ပၟာတအ်ရဂှ် ညးဒေသတအ်ဟီုလဝ်ရ။

စပ်ကဵုပရေၚ်ဗတိုက်လဝ်ဏံတုဲ လ္ပာ်ဂကောံဇြဟတ်ဒပ်ပၠန်ဂတးတအ်လေဝ် လလောၚ်တြးပ္တိတ်လဝ် မမိက်ကဵုမွဲမွဲ ဟွံဂွံဆဵုကေတ်လဝ်ဏီရ။

ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၂၄) တုဲကၠုၚ်တေံလေဝ် ပ္ဍဲကဵုသ္ကုတ်ဂၠံၚ်​ရေဝ်ထဝါဲ အကြာကွာန်တၟံကၞေၚ်ကဵု ကွာန်အောၚ်တာယာဂှ် ကွဳစက်ပ္ဍိုက်နၚ်ကပေါတ်ပဆုဲပြံၚ်ဒပ် ခမရ-၄၀၆ ဖျေံသ္ဇိုၚ်ပွိုၚ်ဍုၚ်ဍာ်ဗုမွဲဖ္ဍိုက်ဂှ် ဒပ်စဵုဒၞာညးဍုၚ်ကွာန်တအ် ရပ်သီဂွံလဝ်ရဂှ် ဂွံတီကေတ်အတိုၚ်တၚ်လလောၚ်တြးရ။

ပ္ဍဲဂၠံၚ်ဇၞော်ကၟိန်ဍုၚ် စၟတ် (၈) ပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ဂကောံဇြဟတ်ပၠန်ဂတးတအ် သွက်ဂွံထိၚ်ဒဝ်တိဍာ်ဂှ် ကၟာတ်ဒၞာစၟဳစၟတ်ဒၟံၚ် အရိုဟ်ဒဒှ်တ္ၚဲ နွံတုဲ လ္ပာ်ကံၚ်ဇြဳပၞာန်လေဝ် ပန်ဖျေံဒၟံၚ်လွဟ်ဇၞော်ရ။

ပရိုၚ် – သြၚ်လောန်တိုၚ်မ်

ဗီု – CJ