ရခေၚ်၊ ဒဳဇြေမ်ဗာ (၂၇)
ကလေၚ်ပလန်အာတဲ ဒပ်ကံၚ်ဇြဳပၞာန် ပလီုပလာ်လဝ် အာဲကၟာဲလုပ်ဝၚ် ကေုာံ ကွတ်တဲယေန်သၞာၚ် ကောန်ဂကူရခေၚ်တအ် သီုတၚ်ရန်တၟံနွံနွံရောၚ်ဂှ် ဒပ်ပၞာန်ရခေၚ် AA ကဵုလဝ်သမ္တီ ပ္ဍဲဂိတုဒဳဇြေမ်ဗာ စၟတ်တ္ၚဲ (၂၅) အခိၚ်ဗ္တံဂှ်ရ။
ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၂၅) အခိၚ်နူဂယး ၜိုတ် (၅) နာဍဳဂှ် နူကဵုတံဒပ် ခမရ (၅၄၀)၊ ခမရ (၃၇၇)၊ ခမရ (၃၇၈) သၟဝ်ဌာနကောပ်ကာဲဒေသပၞာန် ကံၚ်ဇြဳပၞာန်ဖျေံသ္ဇိုၚ်မျောက်ဥူတအ် ပန်ဖျေံလဝ် ပ္ဍဲစမြိုၚ်ယေန်သၞာၚ်အာဲကၟာဲကဵု စမြိုၚ်ပရေၚ်ဘာသာ ဒၞာဲဌာန်ပ္တဝ်ပၞာန်ဟွံသေၚ် ဗတိုက်လဝ် သီုတၚ်ရန်တၟံနွံနွံရဂှ် ဓမံက်ထ္ၜးလဝ်ရ။
ဟိုတ်နူဒပ်ကံၚ်ဇြဳပၞာန် ပန်ဖျေံဗတိုက်လဝ်ကဵုလွဟ်ဇၞော် ဗီုလၟုဟ်ဏံတုဲ ပါဲနူအာဲကၟာဲယေန်သၞာၚ်လုပ်ဝၚ်တြေံတြဟ် ပ္တန်ၚုဟ်မးဟွံမာန် နူတိုက်ထ္ၜးပျးသုတေသနတြေံတြဟ် မျောက်ဥူတအ်တုဲ သီုဘာလကျာ် (၃) ဘာ ဒးလဝ်လွဟ်ဇၞော် ဒးလီုလာ်လဝ်ရဂှ် ဟီုလဝ်ရ။
အာဲကၟာဲယေန်သၞာၚ်လုပ်ဝၚ်တြေံတြဟ် စၟတ်သမ္တီလဝ် နဒဒှ်အာဲကၟာဲတြေံတြဟ် ကောန်ဂကူရခေၚ် သၟးဟေၚ်ဟွံသေၚ် သီုပ္တိုန်ပၠုပ်လဝ်စရၚ်နဒဒှ် အာဲကၟာဲဂၠးကဝ် ဂ္စာန်ပ္တိတ်ဒၟံၚ်ဇြဟတ်ရေၚ်တၠုၚ်ဒၟံၚ် ညံၚ်ဂွံလုပ်စရၚ် အာဲကၟာဲတြေံတြဟ်ဂၠးကဝ်ရဂှ် ဓမံက်ထ္ၜးလဝ်ရ။
ကံၚ်ဇြဳပၞာန်က္လိလောန်လဝ် ဂဗုတ်ရာဇဝတ်ပၞာန် မပ္တံကဵုဒုဟ်ဒဏ်က္လိလောန်လဝ် လ္တူကောန်ဂကူမၞိဟ်၊ ပွမပလီုပလာ်လဝ် အာဲကၟာဲယေန်သၞာၚ် ကောန်ဂကူမွဲမွဲဂှ် နကဵုကောန်ဂကူရခေၚ် အခိၚ်အခါလဵုလေဝ် ဝိုတ်ကၠေံထောံဟွံသေၚ်ကီု သီုက္လေၚ်ပလန်အာတဲရောၚ်ကဵု ဒပ်ကံၚ်ဇြဳပၞာန်ရောၚ်ဂှ် ဒပ်ပၞာန်ရခေၚ် AA လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
ဗီု – Social Media
sanlontai