ကအ်ကြိက်၊ ဒဳဇြေမ်ဗာ ၂၇
သ္ၚိဒၟံၚ်ညးဒေသ လ္တူဍုၚ်ကအ်ကြိက် တွဵုရးကရေၚ် ဗ္ဒါဲ ၄၀ မ ဒၞါဲပရေၚ်ပၞာန်မသ္ကာတ်မြဟ်ဒၟံၚ် ကရောံပေါဲဗ္တိုက်ၜါလ္ပာ်ဂှ်ဝွံ ပ္ဍဲဂိတုဒဳဇြေမ်ဗာ ၂၅ အခိၚ်ဗ္တံဂှ် ဟိုတ်နူဒးဒုၚ်စံၚ်ပလီုပလာ်ထောံဂှ်တုဲ ပၟတ်တူဒှ်အာဆောံဂှ် ဂွံတီကေတ် ဇရေၚ်ညးဒေသတံရ။
စနူဂိတုဒဳဇြေမ်ဗာ ၁ တုဲကၠုၚ်တေံတုဲ လ္တူဍုၚ်ကအ်ကြိက်ဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA တံ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်တုဲ ဟိုတ်နူပေါဲဗ္တိုက်ဂှ်တုဲ ကြပ်အလုံဍုၚ်မွဲ ဒးဂြိပ်ဒဴပါဲဒလေတ်ဒၟံၚ်ရ။
လ္ပာ်အရာပ်လှိုၚ်တၟိ စၟတ် (၅) ဍုၚ်ကအ်ကြိက် ညးဒေသဗွဲမဂၠိုၚ်ဂၠေၚ် မ္ဒးဂြိပ်ဒဴပါဲဒလေတ်ဒၟံၚ်ဂှ် သ္ၚိဒၟံၚ် ဗ္ဒါဲ ၄၀ မ ပၟတ်တူဒှ်အာဆောံတုဲ ဒှ်ပၟတ်စံၚ်ဂှ် ညးဒေသတံ ဟီုရ။
ပရေၚ်ပၟတ်တူဏံဂှ်ဝွံ ဒှ်ပၟတ်စံၚ်ဂှ် ဂွံတီကေတ်တုဲ ဂကောံလဵုကၠောန်မံၚ်ရောဟီုဂှ် ဟွံဂွံတီကေတ်မွဲသာ် လ္တူဍုၚ်ကအ်ကြိက်ဂှ် ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံသၟးရ နွံဒၟံၚ်ဂှ် ညးဒေသကအ်ကြိက်တံ သ္ဂးအိုတ်ရ။
သ္အာၚ်နူဂှ်ပၠန် ဟိုတ်နူပေါဲဗ္တိုက်ဂှ်တုဲ အခိၚ်ညးဍုၚ်ကွာန်ဒေသဗွဲမဂၠိုၚ် ဒးဂြိပ်ဒၟံၚ်ဂှ် ကပေါတ်အရပ်စပ်သှ်ေ မၞုံဒၟံၚ်အပ္ဍဲသ္ၚိ လ္တူဍုၚ်တံဂှ် ကမၠတ်ဂမၠိုၚ် လုပ်စိုပ်ဂၠိုက်ဂၠါဲ ကၠတ်ကေတ်လဝ်တံ နွံဒၟံၚ်တုဲ ကပေါတ်ကၠေံခၞၚ်တံ နွံဒၟံၚ်ရောၚ်ဂှ်လေဝ် ဂွံတီကေတ် ဇရေၚ်ညးဒေသတံရ။
ဟိုတ်နူပေါဲဗ္တိုက်ဍုၚ်ကအ်ကြိက် မစက္တဵုဒှ်လဝ် ပ္ဍဲဂိတုဒဳဇြေမ်ဗာ ၁ တေံဂှ်တုဲ စဵုကဵုဂိတုဒဳဇြေမ်ဗာ ၂၆ ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ပရေၚ်ပၞာန်ကြံၚ်မ္ၚိုဟ် ဆက်က္တဵုဒှ်ဒၟံၚ်တုဲ လ္ပာ်ဒပ်ကံၚ်ဇြဳပၞာန်တံလေဝ် ပန်ကဵုလွဟ်ဇၞော်ကြာန်န်တံဂှ် ကၠောန်ၜိုတ်ဒၟံၚ်မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီု− CJ
sanlontai