ဟိုတ်နူပေါဲဗ္တိုက်သီဗ္ဒိုပ်ဝေန်တာပါန် ပွိုၚ်ဍုၚ်ၜဳကလေၚ်တုဲ ညးဒေသဂၠိုၚ်ကဵုလ္ၚီ ဒးပါဲဒလေတ်ဒၟံၚ်ဘဲပၞာန်

ၜဳကလေၚ်၊ ဒဳဇြေမ်ဗာ ၂၇

ဟိုတ်နူပေါဲဗ္တိုက်သီဗ္ဒိုပ်ဝေန်တာပါန် ကံၚ်ဇြဳပၞာန် မဖျေံလဝ်ဒပ် ဗ္ဒါဲကွာန်ဝေန်တာပါန်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ်တုဲ ညးဒေသ ဗ္ဒါဲ ၁၅၀၀ ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။

တုဲကၠုၚ် နူဂိတုဒဳဇြေမ်ဗာ ၁၃ စဵုကဵု ၂၅ ဂှ် ဂကောံဒပ်ပံၚ်ကောံ စဵုဒၞါညးဍုၚ်ကွာန်တံ ကေုာံ ဂကောံဒပ်စဵုဒၞါကောန်ဂကူကရေၚ် KNDO တံ လုပ်ဒၟံၚ်ပေါဲဗ္တိုက်သီဗ္ဒိုပ် ကုဗ္ဒိုပ်ဝေန်တာပါန်ကံၚ်ဇြဳပၞာန် မဒှ်ဗ္ဒိုပ်မုက်ပၞာန် ခမရ စၟတ် (၄၁၀) ဂှ်ရ။

အပ္ဍဲပေါဲဗ္တိုက်သီဗ္ဒိုပ် လအ်ကၠုၚ် ပွိုၚ်ၜါသတ္တာဟဂှ် နူကဵုဒပ်ကံၚ်ဇြဳပၞာန် ဟိုတ်နူပန်ပှော်ဒၟံၚ်လွဟ်ဇၞော် အပ္ဍဲကဵုကွာန်တံ သီုဗ္တံသီုတ္ၚဲဂှ်တုဲ ညးဍုၚ်ကွာန်ဒေသ ၁၄၆၈ တၠ နူကဵုကွာန်ဝေန်တာပါန်လ္တူကဵု ဝေန်တာပါန်ဇၞော်တံဂှ်ဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။

ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်ဂမၠိုၚ်ဝွံ တ္ၚဲဒးပါဲဒဴဘဲပၞာန်ဂၠိၚ်သ္ၚောဲကၠုၚ်ဗက် နွံပၟိက်ဒၟံၚ်ကဵု ဇွောံမစၞစ၊ ယာတ်လ္တက်၊ ဖ္ဍာန်ဒဒၚ်၊ ဂဥုဲဇဗတံရောၚ်ဂှ် ညးဒုၚ်တာလျိုၚ် လလောၚ်ပရိုၚ် ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အခိၚ်လၟုဟ် ညးဍုၚ်ကွာန်ပါဲဒဴဘဲပၞာန်ဂမၠိုၚ် ဒးအောပ်မံၚ်ဒၟံၚ် ပ္ဍဲကဵုဘာလကျာ်ကွာန်တံကဵု ဒၞါဲဗၠးဘဲတံ ကေုာံ ပ္ဍဲဒဵုဂြိုပ်တံဂှ်တုဲ လ္ပာ် KNU တံ ၜိုန်ရထံက်ပၚ်ရီုဗၚ်ကဵုတံ ကၠောန်ကဵုဒၟံၚ်ကီုလေဝ် ဟွံရုမ်ဂပ်ပုဟ်ဂှ် သ္ဂးရ။

ပရေၚ်ဇီုကပိုက်ချိုတ်ဂျိုၚ်ၜါလ္ပာ် အပ္ဍဲပေါဲဗ္တိုက်သီဗ္ဒိုပ်ဝေန်တာပါန်ဂှ် ဗော်သွးကောန်ဂကူကရေၚ် KNU ကီု လ္ပာ်ကံၚ်ဇြဳပၞာန်တံကီု လလောၚ်ပ္တိတ်လဝ်ဂှ် ဟွံမွဲဏီရ။

တုဲကၠုၚ် ပ္ဍဲဂိတုဒဳဇြေမ်ဗာ ၂၄ တေံဂှ်လေဝ် ပ္ဍဲကဵုပွိုၚ်ဍုၚ်ၜဳကလေၚ် ဗ္ဒါဲကွာန်တပျေနဳဂှ် ရေၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်ဗ္တိုဟ်မာၚ်တုဲ ဟိုတ်နူပန်ပှော်လဝ် နကဵုလွဟ်ဇၞော်၊ လွဟ်ဍောတ်တံဂှ်တုဲ ကောန်ၚာ်သၟတ် ၂ တၠ ချိုတ်တုဲ ၄ တၠ ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−KNU