ကိဗ်၊ ဒဳဇြေမ်ဗာ ၂၇
အတိုၚ်သၞောဝ်ဥပဒေမူအပြောံ မပ္တိုန်လဝ် ပ္ဍဲဝါပ်သာ် ပါလဳမာန်ယူကရုၚ်ဂှ်မ္ဂး တၚ်သၞောတ်ဗ္ၜတ် အာယုက်စန်ဒက် သ္ဂောံလုပ်ပေါဲဗ္တိုက်ဂွံဂှ် နူကဵု ၂၇ သၞာံ သွက်ဂွံဖအောန်ဖျေံ စဵုကဵု ၂၅ သၞာံ ပ္တိုန်လဝ်ဂလာန်ဂှ် ဒဒှ်ရဂွံဆဵုကေတ်ဂှ် ဌာန်ပရိုၚ်ရာ်တာ ထ္မံက်ထ္ၜးလဝ်ရ။
အခိၚ်ပေါဲဗ္တိုက်ယူကရုၚ် ကုရုယှာ ပွိုၚ် ၂၂ ဂိတုဏံ အသိၚ်သ္ကာတ်မြဟ်ကၠုၚ်ဂှ် အပြံၚ်အလှာဲ ပ္တိုန်ကၠုၚ်ဂလာန်သာ်ဏံ မံက်တိတ်ကၠုၚ်လဝ်ရ။
စပ်ကဵုက္ၜၚ်ကျာပၞာန် လီုစှ်ေ ပ္ဍဲဂိတုဒဳဇြေမ်ဗာ ၂၄ တုဲကၠုၚ်တေံတုဲလေဝ် ယူကရုၚ် ကေုာံ ရုယှာတံ စောဲစောတ်လဝ်ညးသ္ကအ်ရ။
ဂလာန်ရုယှာသ္ဂးလဝ် သီဂွံ မာရေန်ကာ ဌာနဗဟဵုစပ်ကဵုဒေသ မၞုံသ္ကုတ်ဗၟံက်ယူကရုၚ်ဂှ်တုဲလေဝ် လ္ပာ်ဂကောံဒပ်ယူကရုၚ်တံ ကယျာန်ပါဲလဝ်ရ။
ပ္ဍဲကဵုမူအပြောံ ကောန်ဍုၚ်ယူကရုၚ်တံ ဒးစုတ်စရၚ် သွက်ဂွံလုပ်ပၞာန်ဂှ် ပြံၚ်လှာဲအာ လိက် “ညးအာယုက်ပေၚ် ၂၅ သၞာံတုဲတံဂမၠိုၚ်” တုဲ ပလေဝ်ပလေတ်အာဏောၚ် မဒှ်ရ။
ပ္ဍဲကဵုစၟတ်သမ္တီတၚ်သောၚ်ကလး နူကဵုဝန်ဇၞော်ကာစဵုဒၞါ ထ္ပက်လဝ်စၟတ်တဲဂှ် ထ္မံက်ထ္ၜးလဝ် တၚ်စၞောန်ပျးအဓိက မူအပြောံဂှ် ဗွဲခမၞောန်တုဲ ပ္ဍဲကဵုဏံလေဝ် ပရူ “ပွမပြံၚ်လှာဲအာယုက်ယိုက်ဂၠေၚ်လျိုၚ်ပၞာန် နူ ၂၇ သၞာံ ဒှ်အာ ၂၅ သၞာံ” ဂှ် ပါလုပ်ရောၚ် သ္ဂးရ။
သမ္မတဇြဳလာန်သကဳဂှ် ပ္ဍဲကဵုပေါဲသောၚ်ကလးလိက်ပရိုၚ် ကၞောတ်သၞာံ မကၠောန်ဗဒှ်လဝ် ပ္ဍဲဂိတုဒဳဇြေမ်ဗာ ၁၉ ဂှ် သွက်ဂွံယိုက်ဂၠေၚ်တာလျိုၚ်ပၞာန်ဂှ် ထပ်သ္ဂောံကော် ကောန်ဍုၚ်ယူကရုၚ် နူကဵု ၄ ကိုဋ်ဘာ် စဵုကဵု ၅ ကိုဋ်နွံဂှ် ပ္တိုန်လဝ်ဂလာန်ရ။
ဆ္ဂး ကၠာဂွိုအ်ပ္တိုန်ဂလာန် ကၠတ်ထဝ်ဏီဂှ် ပ္ဍဲကဵုကိစ္စ ဒပ်ပၞာန် ကေုာံ အလဵုအသဳတံ ဒးသဳကၠဳဂှ် ဒဒှ်ရဒှ်ဒၟံၚ်ပရူ ဟွံဒုၚ်လုက်ဒွံဂှ်လေဝ် ဟီုဂးလဝ်ရ။
လၟိဟ်ကောန်ဒပ်ယူကရုၚ်လၟုဟ်ဂှ် ဟွံဂွံတီကေတ်ဏီကီုလေဝ် ကၠာတေံ မၞိဟ်ရပ်လဝ်လွဟ် အပ္ဍဲဍုၚ်ဂှ် ဗ္ဒါဲ ၁ ပြကောဋိကိုဋ်နွံဂှ် သ္ဂးလဝ်ရ။
နူစရုယှာ သၠိုၚ်လုက်ၜက်ၜေတ် ယူကရုၚ်တုဲဂှ် မၞိဟ်ဂၠိုၚ်ကဵုကိုဋ် ချိုတ်တုဲ ကလိဂွံလဝ်ဝပ်ရောၚ် သၞာဲဒဴအမေရိကာန်တံ ချိၚ်ခယျလဝ်ကီုလေဝ် ကၟိန်ဍုၚ်လဵုဟွံဟီု စရၚ်ချိုတ်ဂျိုၚ် ကောန်ဍုၚ်ညးတံ မယိုက်ဂၠေၚ်ဒၟံၚ်လျိုၚ်ပၞာန်တံဂှ် ဂွံလလောၚ်ပ္တိတ်ဂှ် အောန်တဴရ။
ဒေဝေတ် အာရာခါမဳယျာ မဒှ်ဇၞော်သ္ကိုပ်ဗော် ဇြဳလာန်သကဳ ပ္ဍဲကဵုပါလဳမာန်ဂှ် အလဵုအသဳဝွံ အတိုၚ်တၚ်အာတ်မိက် ဒပ်ပၞာန်ဂှ် ကၠောန်ၜိုတ်ဒၟံၚ် သၞောဝ်ဥပဒေမူအပြောံဂှ်တုဲ ဖန်ဇန်လဝ် သွက်ဂွံပၠောပ်ဂလာန် ပ္ဍဲဂိတုဒဳဇြေမ်ဗာ ၂၆ ဂှ် ဟီုဂးလဝ်ရ။
Ref: CNA
sanlontai