မတ်မလီု၊ ဒဳဇြေမ်ဗာ (၂၈)
ပ္ဍဲဍုၚ်မတ်မလီု၊ တွဵုရးဍုၚ်မန်ဂှ် ကောန်ဒပ်ကံၚ်ဇြဳပၞာန်တအ် ပ္တဝ်လဝ်ကဵုဖုၚ်တဲ ကောန်ဒေသညးဍုၚ်ကွာန် အာကၠုၚ်အကြာဂၠံၚ်တအ် စၟဳစၟတ်ဒၟံၚ်တုဲ အာတ်မိက်ကေတ်ဒၟံၚ်သြန် လောန်ၜက်နူသၞောတ်ဗ္ၜတ် နွံဒၟံၚ်ရဂှ် ဂွံတီကေတ် အတိုၚ်ကောန်ဍုၚ်မတ်မလီုတအ် ဟီုထ္ၜးလဝ်ရ။
ပ္ဍဲလ္တူဍုၚ်မတ်မလီု ပတေၚ်ဂြတ်လဝ်ပရေၚ်ဂီုကၠီုဂှ် သ္ပတံနူဂိတုဒဳဇြေမ်ဗာ ဒုတိယသတ္တာဟတုဲဂှ် ကောန်ဒပ်ကံၚ်ဇြဳပၞာန်တအ် ဂလိုၚ်ပ္တိုန်လဝ် ပရေၚ်ကၟာတ်လဒဵုစၟဳစၟတ် ပ္ဍဲဒၞာဲအဓိကဍုၚ်တအ်ကဵု ဒၞာဲဂၠံၚ်သွာၚ်တအ်ရ။
ပ္ဍဲအရာစၟဳစၟတ်ဗီုဏံဂှ်လေဝ် ကောန်ဒပ်ကံၚ်ဇြဳပၞာန်တအ် အခိၚ်ကၠာတေံ နူကဵုစၟဳစၟတ်ဒၟံၚ်ကွဳစက်၊ ကွဳလိုန်ဓာတ်ဟေၚ်ဂှ် လ္ပာ်သ္ကုတ်လကြဴဏံ စၟဳစၟတ်ကၠုၚ် သီုကဵုဖုၚ်တဲကောန်ဒေသ ညးဍုၚ်ကွာန်တအ်ရ။
ပ္ဍဲအရာစၟဳစၟတ်ဖုၚ်တဲ ကောန်ဒေသညးဍုၚ်ကွာန်တအ်ဂှ် ကဵုလဝ် Like ညးကၠောန်ပၠန်ဂတးတအ်ကဵု ဌာန်ပရိုၚ်ကံၚ်ဇြဳပၞာန် ဟွံဒုၚ်တဲတအ်ကီု၊ ချူလဝ်တၚ်သမ္တီ သီုကဵုပါ်တြးလဝ် နွံဟၟဲ စၟဳစၟတ်တုဲ ယဝ်ရဆဵုဂဗမမိက်ကဵုမွဲမွဲမ္ဂး အာတ်မိက်ကေတ်ဒၟံၚ်သြန် ကဵုကိုတ်နွံဒၟံၚ်ရဂှ် ကောန်ဍုၚ်မတ်မလီုတအ် ဟီုဂးလဝ်ရ။
မွဲလ္ပာ်ပၠန်ဂှ် ကောန်ဒပ်ကံၚ်ဇြဳပၞာန်တအ် အခိၚ်ကၠာတေံ နကဵုတၚ်ထ္ၜးဟိုတ် ပရေၚ်ဂီုကၠီု နူကဵုစၟဳစၟတ်ဒၟံၚ် ကဠာကွဳစက်၊ ကွဳလိုန်ဓာန်တအ်ဂှ် သ္ကုတ်လကြဴဴဏံ ပါဲနူစၟဳစၟတ်ကၠုၚ် လိုၚ်ဇြေန်ကွဳလိုန်ဓာတ်၊ လိုၚ်ဇြေန်ဒဳယာဉ် ဟွံဆေၚ်စပ်ကဵု ပရေၚ်ဂီုကၠီုတအ်တုဲ သီုစၟဳစၟတ်ကၠုၚ် မပ္တံကဵုတၞးဂၞန်ယာဉ် ဒ္ၚောဝ်ရံၚ်သ္ကဲတအ်တုဲ အာတ်မိက်ကေတ်ဒၟံၚ် သြန်ရ။
သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်တအ်ဂှ် ပ္ဍဲအရာစၟဳစၟတ်ပရေၚ်ဂီုကၠီုအခိၚ်ဗ္တံဂှ်လေဝ် အခိၚ်ဒးတာလျိုၚ်ဂှ် စသုၚ်သၞဗ္ၜူသုရာတအ်တုဲ စၟဳစၟတ်ဒၟံၚ်ကီု ညးဗြဴတအ်ဂှ်လေဝ် ဟီုဂးဒၟံၚ်က္ဍိုက်ဓရိုက် ဂလာန်ပ္ကီုပရာပ်လိၚ်တအ် နွံဒၟံၚ်ရဂှ် ဂွံတီကေတ် အတိုၚ်ကောန်ဒေသ ဒးဂဗလဝ်အလဵုဇကုမွဲတၠ ဟီုထ္ၜးလဝ်ရ။
စပ်ကဵုတၚ်ကောန်ဒပ်ကံၚ်ဇြဳပၞာန် ကၠောန်သ္ပဒၟံၚ်သာ်ဏံတုဲ ၜိုန်ရသြၚ်လောန်တိုၚ်မ် ဆက်စၠောံသၟာန်လဝ် ညးမၞုံအခေါၚ်ဟီုဂး ဂကောံအလဵုအသဳတွဵုရးဍုၚ်မန် ကံၚ်ဇြဳပၞာန်ခါန်ကၞက် ဒံက်တာအောၚ်မျေတ်ကျဝ်သုၚ်ကီုလေဝ် ဒုၚ်တဲဟီုသှ်ကဵုလဝ် ဟၟဲရ။
ပ္ဍဲဍုၚ်မတ်မလီု တွဵုရးဍုၚ်မန်ဂှ် ပ္ဍဲဂိတုဏံ ပါလုပ်သီုဌာန်ဂအုပ်ရးပၞာန်ဒိုဟ်အဂၞဲကံၚ်ဇြဳပၞာန် သ္ၚိဒၟံၚ်ဝန်ဇၞော်တအ်ဂှ် ဂကောံဇြဟတ်ပၠန်ဂတးပံၚ်ကောံတအ် ကၠုၚ်စိုပ်ဗတိုက်လဝ်ကဵုဒရုမ်တုဲဂှ် ပတေၚ်ဂြတ်လဝ် ပရေၚ်ဂီုကၠီု ဗွဲတၟေၚ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai