ရေဝ်၊ ဒဳဇြေမ်ဗာ ၂၈
တွဵုရးဍုၚ်မန်၊ သ္ကုတ်သၠုၚ်ကျာပွိုၚ်ဍုၚ်ရေဝ် ပွဳပွူဗ္ဒါဲကွာန်ဘာဂှ် ရပ်ဂွံလဝ် ကောန်ဒပ်ကံၚ်ဇြဳပၞာန် ၁ တၠ မဗက်ဂၠိုက်ဂၠါဲဒၟံၚ် ပရိုၚ်ချဳဒရာၚ် ကောန်ဂကောံဒပ်ပၠန်ဂတးတံဂှ် ဂကောံဂစေံလနေင်ရေဝ် လလောင်ပ္တိတ်လဝ်ရ။
တုဲကၠုၚ် ပ္ဍဲဂိတုဒဳဇြေမ်ဗာ ၂၆ အခိၚ်ဇိုၚ်သဝ်တ္ၚဲ ၜိုတ် ၄ နာဍဳဂှ် ဂကောံဂစေံလနေၚ်ရေဝ် အခိၚ်ကၟာတ်ဂၠံၚ်စၟဳတ်ဒၟံၚ် လ္ပာ်သ္ကုတ်ဂၠံၚ်ကွာန်ဘာဂှ် ရပ်ဂွံလဝ် ကောန်ဒပ်ကံၚ်ဇြဳပၞာန် မၞုံယၟုနာၚ်လေန် ၜးကယျိုၚ်အရာပ်တုဲ မဗက်ထံၚ်ဒၟံၚ်ပရိုၚ် နကဵုကွဳလိုန်ဓာတ်မွဲဖ္ဍိုက်ဂှ်ရ။
အတိုၚ်စၟဳတ်ဂွံပြဟ်ဟ်ဏံဂှ်မ္ဂး ကောန်သ္ဂံၚ်နာၚ်လေန် အာယုက် ၂၈ သၞာံဂှ်ဝွံ ဒှ်နူကဵုတမ်ဒပ်ကံၚ်ဇြဳပၞာန် ခမရ (၅၉၁) ဖျေံသ္ဇိုၚ်ကွာန်ဘာ ပွိုၚ်ဍုၚ်ရေဝ်ဂှ် ဂွံတီကေတ် အတိုၚ်တၚ်လလောၚ်တြး ဂကောံဂစေံလနေၚ်ရေဝ်ဂှ်ရ။
ကောန်သ္ဂံၚ်ကံၚ်ဇြဳပၞာန် မရပ်ဂွံလဝ်တံဂှ် ကၠောန်ၜိုတ်ဒၟံၚ် ပရေၚ်စၟဳတ်သၟာန်သၟုက်တံတုဲ သွက်ဂွံကေတ်အာအရေဝ် အတိုၚ်စေဝ်ပၞောန်ဂကောံဒပ်တံ နွံဒၟံၚ်ဂှ် ညးတာလျိုၚ်ဂကောံဂစေံလနေၚ်ရေဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်သ္ဂံၚ်နာၚ်လေန်ဝွံ ယိုက်ဂၠေၚ်ဒၟံၚ်တာလျိုၚ် ပ္ဍဲဒပ်ကံၚ်ဇြဳပၞာန် ဂွံဗ္ဒါဲၜါသၞာံညိကီုတုဲ နူကဵုဒပ်ကံၚ်ဇြဳပၞာန်တံ ဗလးလဝ် သွက်ဂွံဂၠိုက်ဂၠါဲပရိုၚ် ဂကောံဒပ်စဵုဒၞါညးဍုၚ်ကွာန် PDF တံဂှ် ဂွံတီကေတ်ရ။
ဂကောံဂစေံလနေၚ်ရေဝ်ဂှ်ဝွံ တုဲကၠုၚ် ပ္ဍဲဂိတုဒဳဇြေမ်ဗာ ၂၅ တေံလေဝ် လုပ်စိုပ်ဗ္တိုက်လဝ် ဗ္ဒိုပ်သၞေဟ်ကၚ်စၟဳတ်ဒဒန်ဇုက် ပွိုၚ်ဍုၚ်ရေဝ်ဂှ်တုဲ အပ္ဍဲပရေၚ်ဗ္တိုက်ဏံဂှ် ကောန်ဂကောံဒပ်မၚ်ပယျဵု သၟဝ်တဲကံၚ်ဇြဳပၞာန် ၁ တၠ ချိုတ်အာလဝ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−ဂကောံဂစေံလနေၚ်ရေဝ်
sanlontai