ပရူပရေၚ်ၜိုဟ်လလမ် က္ဍိုပ်သ္ကိုပ်ပၞာန် ဟီုဂးကၠုၚ်ဂှ် ဓဝ်ပတှ်ေဟွံမွဲရပုဟ်ဂှ် KNU ခၠေဝ်ပလန်

မတ်မလီု၊ ဒဳဇြေမ်ဗာ ၂၈

ဂလာန်က္ဍိုပ်သ္ကိုပ်ပၞာန် ဟီုဂးကၠုၚ် ဒဒှ်ရဒုၚ်ဒၟံၚ်တၠုၚ် သွက်ပရေၚ်ၜိုဟ်လလမ်လၟိုန်ဂှ် ဓဝ်ပတှ်ေဟွံမွဲလးလးရတုဲ သွက်သၞောတ်တၠအဝဵုပၞာန် ဂွံသရိုဟ်အာဂှ်ဟေၚ် ဆက်ပ္တိတ်အာဇြဟတ်ဏောၚ်ဂှ် ဗော်သွးကောန်ဂကူကရေၚ် KNU ခၠေဝ်ပလန်လဝ်ရ။

တုဲကၠုၚ် ပ္ဍဲဂိတုဒဳဇြေမ်ဗာ ၂၄ ဏံ ပ္ဍဲကဵုအခန်ကၞာဗှ်ဗၞုဟ်ဂုဏ် တ္ၚဲခရေဿမာတ် မကၠောန်ဗဒှ်လဝ် ပ္ဍဲကဵုဘာကျာ် သုက်မိုၚ်ဂဴ ကာတ္တလေတ်၊ ဍုၚ်ပျေန်မနာ၊ နေဗျဳဒဝ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဂးကၠုၚ် အရေဝ်ပရေၚ်ၜိုဟ်လလမ်ရ။

က္ဍိုပ်သ္ကိုပ်ပၞာန်ဂှ် နကဵုကံၚ်ဇြဳပၞာန် ပံက်လဝ်တြၚ်ပရေၚ်ၜိုဟ်လလမ်လၟိုန်တုဲ ဒပ်ပၞာန်ဂှ်လေဝ် သွက်ပရေၚ်ၜိုဟ်လလမ်ဂှ် ဒှ်ဒၟံၚ်ဒတုဲလၟိုန်တုဲ ဒဒှ်ရဒုၚ်ဒၟံၚ်တၠုၚ် ကော်ဘိက်ဒၟံၚ်လၟိုန်ဂှ် ဟီုဂးဏာလဝ်ရ။

ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳဂှ် ဂလာန်ပရေၚ်ၜိုဟ်လလမ် က္ဍိုပ်သ္ကိုပ်ပၞာန်ဂှ်ဝွံ တၞဟ်ခြာဒၟံၚ်ကဵု ကမၠောန်နတဲဏံလၟိုန်တုဲ အခိၚ်လၟုဟ်လေဝ် အရာမဓဇန်ကြမ်ကြ ဒပ်ပၞာန် မကၠောန်ကၠုၚ်ဒၟံၚ်ဟွံပိုတ်သ္ကုတ်ဂှ်ဝွံ ဟွံတုဲဒှ်ဏီပုဟ်ဂှ် ပါ်ပါဲလဝ်ရ။

“နကဵုကံၚ်ဇြဳပၞာန်ပကီုပရာပ် ကမၠောန်တၠအဝဵုပၞာန်တံ ကၠောန်ကၠုၚ်ဒၟံၚ်ဟွံပိုတ်သ္ကုတ်ဂှ်တှ်ေ ထ္ၜးဒၟံၚ်သက်သဳ ကုပြဝမဓဇန်ကြမ်ကြတံရဏောၚ်။ နူကဵုပါၚ်ဂှ် ပရေၚ်ၜိုဟ်လလမ်၊ ဓဝ်မေတ္တာ၊ ၜိုတ်လဵုဟီုဟီု ကဵုကမၠောန်နတဲဏံဂှ် တၞဟ်ခြာဒၟံၚ်လၟိုန်ဏောၚ်။ အခိၚ်လၟုဟ်မ္ဂးလေဝ် အရာမဓဇန်ကြမ်ကြ ဒပ်ပၞာန်တံဂှ် ဟွံအိုတ်အးဏီပုဟ်။ သၞာံ ၂၀၂၃ ရ အိုတ်အာ၊ ပရေၚ်ဓဇန်ကြမ်ကြတံဂှ် ဗွဲတၟေၚ် လ္တူညးဍုၚ်ကွာန်တံဂှ် ပန်ကဵုလွဟ်ဇၞော်တံ၊ ထောံမခတိုဟ်ကဵု က္ၜၚ်ကျာတံဂှ် ဒှ်ဒၟံၚ်အဆက်က်ဏောၚ်” သာ်ဝွံ ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုရ။

ပ္ဍဲကဵုအခန်ကၞာဂှ် က္ဍိုပ်သ္ကိုပ်ပၞာန်ဂှ် ပပ္တံနူတ္ၚဲခရေဿမာတ်တုဲ ပရေၚ်ၜိုဟ်သြိုဟ်ညိၚ်ဝတ်၊ ပရေၚ်ဂီုကၠီု၊ ပရေၚ်ၜိုဟ်လလမ် မနွံပၟိက်ဒၟံၚ် အပ္ဍဲဍုၚ်အဓိကတံ ညံၚ်ဂွံစိုပ်ကၠုၚ်ဗွဲမပြဟ်မာန် ကေုာံ အခေါၚ်အရာ ဘာသာသီုဖအိုတ် ပံၚ်တောဲမံၚ်တန်တဴမွဲစွံတံဂှ် ဇၟာပ်ပ်ကောန်ဍုၚ် ညံၚ်ဂွံကလိဂွံမာန် သွက်ဂွံဘိုၚ်ပူဗိုၚ်ပ္တိတ်ဇြဟတ်အိုတ်ဂှ် ဖ္တိုက်ဖ္အောဝ်ဏာလဝ်ဏီရ။

စပ်ကဵုဂလာန် က္ဍိုပ်သ္ကိုပ်ပၞာန် ကော်ဘိက်ကၠုၚ်ပရေၚ်ၜိုဟ်လလမ်ဂှ်တုဲ နကဵု KNU သ္ဇက်ဒးဟီု တၟေၚ်ၚ်တၟဟ်ဟ်ဟွံမွဲတုဲ ဓဝ်ပတှ်ေလေဝ် ဟွံမွဲပုဟ်တုဲ သွက်သၞောတ်တၠအဝဵုပၞာန် ဂွံကၠေံဗ္ဒန်အာဂှ်ကီု၊ သွက်သ္ဂောံဂွံအခေါၚ်စၞောန်ပျးအပိုၚ် ကေုာံ ဖေဝ်ဒရာဒဳမဝ်ကရေဇြဳတံဂှ် ပ္တိတ်ဒၟံၚ်ဇြဟတ်ကၠောန်ၜိုတ်ဒၟံၚ်ရောၚ် ပဒိုဝ်သဝ်တဝ်နဳ ခၠေဝ်ပလန်လဝ်ရ။

“ပ္ဍဲကဵုဍုၚ်ပိုယ်ဂှ် ညံၚ်သၞောတ်တၠအဝဵုပၞာန် ဂွံကၠေံဗ္ဒန်အာ၊ ညံၚ်ဂွံသုန်ဂြာံအာဂှ်ကဵု ဖေဝ်ဒရာဒဳမဝ်ကရေဇြဳ ပိုယ်တံနွံပၟိက်ဒၟံၚ် ၜိုဟ်သြိုဟ်သာယာတုဲ အခေါၚ်အရာမၞိဟ် မဒုၚ်ကဵုလျိုၚ်မာန် သွက်ဇၟာပ်မၞိဟ်တံဂှ်ကီု၊ အခေါၚ်စၞောန်ပျးအပိုၚ်တံ၊ သွက်ဂွံဂွံအရာတံဏံဂှ်ဟေၚ် ပိုယ်တံ ပ္တိတ်ဒၟံၚ်ဇြဟတ်ရ။ ဂကောံပၞာန်ဏံကဵု သၞောတ်တၠအဝဵုပၞာန်ဏံ ညံၚ်ရိုဟ်ကၞက်ဂွံပိုတ်အာဂှ် ပၟိက်ဇၞော်ဒၟံၚ်ဏောၚ်။ ညအ်မှ ကၠောန်ဟွံမာန်ပုဟ်ဟီုမ္ဂး အရာပိုယ်တံ စၟဳစလဝ်တံဂှ် မုမွဲမှ ဒှ်ကၠုၚ်မာန်ဟွံသေၚ်ပုဟ်။ အရာဍေံတံဟီုဂှ်လေဝ် ပိုယ်တံ ဂွံဒးစုတ်ပ္ဍဲက္ဍဟ် တၟေၚ်ၚ်တၟဟ်ဟ်ဂှ် ဟွံမွဲပုဟ်။ သွက်သၞောတ်တၠအဝဵုပၞာန် ဂွံဟောံဗြံအာဂှ်ဟေၚ် ပိုယ်တံ သ္ဇက်ဂွံဒးကၠောန်အာ လၟေၚ်ၚ်ဂှ်နွံ” သာ်ဝွံ ပဒိုဝ်သဝ်တဝ်နဳ သ္ဂးရ။

မွဲလ္ပာ်ပၠန်ဂှ် က္ဍိုပ်သ္ကိုပ်ပၞာန်ဝွံ ၜိုန်ရဟီုဂးဒၟံၚ် အရေဝ်ပရေၚ်ၜိုဟ်လလမ်ကဵု တၚ်ကော်ဘိက် ပရေၚ်ၜိုဟ်လလမ်တံ ဂၠိုၚ်ၚ်ကဵုဝါကီုလေဝ် ဒပ်ကံၚ်ဇြဳပၞာန် စွံပွန်ဗ္တိုက် လ္တူညးဍုၚ်ကွာန်ကောန်အရာပ် အလုံကၟိန်ဍုၚ်မွဲဂှ် ကလိလောန်ဒၟံၚ်အိုတ်ဍာ်ရ။

အတိုၚ်စရၚ် ဂကောံသုတေသန ညာန်လေန်တေတ်တံဂှ်မ္ဂး စနူအခိၚ်ဒပ်ပၞာန်သီအဝဵုတုဲ စဵုကဵုဂိတုအဝ်ဂါတ် သၞာံဏံ အလုံဍုၚ်မွဲ ဂကောံပၞာန်တံ ကလိလောန်လဝ် ပရေၚ်ဂစိုတ်ဂယိုၚ် နကဵုဂအုံဗွဝ် မၞိဟ်လ္တူ ၅ တၠဂှ် အောန်အိုတ် ၁၇၅ ဝါနွံတုဲ ညးဍုၚ်ကွာန်ကောန်အရာပ် စဵုကဵု ၁၇၉၄ တၠ ဒးဒုၚ်ဂစိုတ်လဝ်ရ။

အပ္ဍဲကာလဏံ အပ္ဍဲလၟေၚ်ဒဒှ်ပရေၚ်ဗ္တိုက်တရဴကျာ ကံၚ်ဇြဳပၞာန်တံ ၉၀၂ ဝါဂှ် စမြိုၚ်ဘာသာ ၈၆ မ၊ ဘာဗ္တောန်လိက် ၅၄ မ၊ ရုၚ်ဂဥုဲ ၂၆ မ ကီု၊ ကောန်အရာပ် ၆၈၀ ပြၚ် ချိုတ်အာလဝ်တုဲ မၞိဟ်ကလိဂွံဝပ် ဗ္ဒါဲ ၄၆၀ တၠနွံလဝ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

စနူအခိၚ်သီအဝဵုတုဲ ပ္ဍဲကဵုတိဍာ်အုပ်ဓုပ် KNU မဒှ်ဂကောံရပ်လွဟ်ကောန်ဍုၚ်အရၚ်ဝှ်ကြံၚ် ပေါဲဗ္တိုက်ကုကံၚ်ဇြဳပၞာန် မသ္ကာတ်မြဟ်ဒၟံၚ်ဂှ် ပေါဲဗ္တိုက်အပံၚ် မွဲဠက်ဝါပြၚ် က္တဵုဒှ်လဝ်ရောၚ် KNU ဗဟဵု လလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာမံက်တေံရ။

ပရိုၚ်−သြၚ်လောန်တိုၚ်(မ်)

ဗီု−MOI