ပရေၚ်ပၞာန် ၁၀၂၇ ကံၚ်ဇြဳပၞာန် မဒးကျဗြံလဝ်ဂှ် ပေၚ်ကၠုၚ်ၜါဂိတု

လံက်ကိုၚ်၊ ဒဳဇြေမ်ဗာ ၂၈

အခိၚ်ပရေၚ်ပၞာန်သီအဝဵုကြပ်ပေၚ်ကၠုၚ်ပိသၞာံဂှ် ပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ မဗ္တိုက်လဝ်ကံၚ်ဇြဳပၞာန် နကဵုပေါဲဗ္တိုက်သီဗ္ဒိုပ်သီဍုၚ်ဂှ်ဝွံ စိုပ်ကၠုၚ် စဵုကဵုအပြံၚ်အလှာဲပၠန်ဂတးမွဲပ္ၚံက်ရ။

နကဵုတၚ်ရန်တၟံ သွက်ဂွံထိၚ်ဒက်တိဍာ်ဇကုတံမာန်၊ သွက်ဂွံထပိုတ်ရိုဟ်ကၞက်သၞောတ်တၠအဝဵုပၞာန် ကေုာံ သွက်ဂွံဗ္တိုက်သရိုဟ် ပရေၚ်လီဠာန်သြန်လှုဲတံဂှ်တုဲ ပရေၚ်ပၞာန် ၁၀၂၇ မစကၠုၚ်လဝ် ပ္ဍဲကၞောတ်ဂိတုအံက်တဝ်ဗာဂှ် လၟုဟ်မ္ဂး ပေၚ်ကၠုၚ် ၂ ဂိတုဣရ။

အပ္ဍဲပရေၚ်ပၞာန် ပွိုၚ် ၂ ဂိတုဏံ ဂကောံမဟာမိတ်ကောဒေံပိဂကောံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန်ဍောတ်တ်ဇၞော်ဇၞော် ပ္ဍဲရးရခေၚ်ကဵု ရးသေံသ္ကုတ်သၟဝ်ကျာ အပံၚ်ဖအိုတ် လ္တူ ၄၄၀ ဗ္ဒိုပ်တုဲ ဍုၚ် ၁၀ ဍုၚ် နူကဵုရးသေံသ္ကုတ်သၟဝ်ကျာဂှ်လေဝ် MNDAA ကေုာံ TNLA တံ ထိၚ်ဒက်မာန်လဝ်ရ။

နကဵု MNDAA သွက်ဂွံသီဂှ် သှ်ေဒၟံၚ်ဍုၚ်လံက်ကိုၚ်မွဲရတုဲ နကဵု TNLA လေဝ် သွက်ဂွံထိၚ်ဒက် နာမ္မတူ၊ ကောတ်ခိုၚ် ဍုၚ်တံဏံကဵု ဂၠံၚ်တရဴသွံရာန်ဗၞိက်လ္ၚဵုတံဂှ် သှ်ေဒၟံၚ်ဏီကီုလေဝ် AA ဂှ်တှ်ေ သီဂွံလဝ် ဍုၚ်နူကဵု တွဵုရးရခေၚ်တံဂှ် ဟွံမွဲဏီရ။

အကြာပ်ဒပ်ဇၞော် ဇြေယျ မသ္ပလဝ် CDM ဂှ် နကဵုဂကောံမဟာမိတ်ကောဒေံပိဂကောံ ညံၚ်ရဴကာလစကၠုၚ်လဝ် ပရေၚ်ပၞာန်တေံဂှ် ဗီုပြၚ်သီဂွံ ဗ္ဒိုပ်မွဲတုဲမွဲဂှ် ဟွံမွဲရကီုလေဝ် ပေါဲဗ္တိုက်တံဂှ်တှ်ေ ဆက်ဗ္တိုက်ဒၟံၚ်ဏီဏောၚ်ဂှ် သ္ၚဳဂၠိပ်လဝ်ရ။

“ပေါဲဗ္တိုက်ဂှ်တှ်ေ ဆက်ဒးဗ္တိုက်ဒၟံၚ်ဟဂှ်ရဏောၚ်။ ဆ္ဂး ဗီုကဵုတဲကၠာတေံ ဗီုပြၚ်သီကေတ် ဗ္ဒိုပ်မွဲတုဲမွဲ မြက်က်ဇက်က်ဂှ် ဟွံမွဲရပုဟ်။ ဍေံယျေအာညိယျဏောၚ်။ မွဲပၠန်ဂှ် လ္ပာ်ဒပ်ပၞာန်ဂှ်လေဝ် ဗီုပြၚ်ဂကောံသ္ကုတ်သၟဝ်ကျာတံ ဗ္တိုက်ဒၟံၚ်ဂှ် ဍေံတံကၠိုဟ်အာညိညတုဲ ဗီုပြၚ်လဵု ဂွံကလေၚ်စဵုဒၞါ အစဳဇန်တံဏံဂှ်လေဝ် ကၠောန်ဂှ်ကၠောန်ဒၟံၚ်ရ။ ဆ္ဂး ဂွံဗပေၚ်ဇြဟတ်ဂှ် ဍေံတံပဟွံမာန်ပုဟ်။ လၟုဟ်ဂှ် ပေါဲဗ္တိုက်ဂှ် ဒှ်ဒၟံၚ်ဇၟာပ်ပ်ဒၞါဲဏောၚ်ဟီုတှ်ေလေဝ်“ သာ်ဝွံ ညးသ္ဂးရ။

ဒပ်ကံၚ်ဇြဳပၞာန် မစိုပ်ဒၟံၚ်ဒၞါဲပၞာန်ဒုၚ်လၟုဟ် သွက်ဂွံကလေၚ်ထ္ပက်ပၞာန် အကာဲအရာဒှ်ဟွံမာန်ဒၟံၚ်ဂှ် ယဝ်ရဂကောံပၠန်ဂတးတၞဟ်သ္အာၚ်တံ ဗ္တိုက်ဂွံကၠုၚ်တိဍာ် ဗွဲမသၠဲလးမ္ဂး သာတုဲတောတက်ကၠုၚ်မာန်ရောၚ်ဂှ် ညးထံက်ထ္ၜးလဝ်ရ။

အပ္ဍဲပရေၚ်ပၞာန် ၁၀၂၇ ဂှ် တမ်ဒပ်ပရေၚ်ဗ္တိုက် ကံၚ်ဇြဳပၞာန် နူကဵုရးသေံသၟဝ်ကျာ ၜါဒပ်၊ ဂကောံပၞာန်ညးဍုၚ်ကွာန်တံ ကေုာံ ကောန်ဇာတ်ဂြောဝ်ဂတာညးတံပါလုပ်ဂှ် အပံၚ်ဖအိုတ် စဵုကဵု ၄၀၆ တၠ လုပ်စိုပ်ဖျေံကၠုၚ်လွဟ် ဇရေၚ်ဂကောံကဝ်က MNDAA ရ။

မွဲလ္ပာ်ပၠန်ဂှ် အပ္ဍဲပရေၚ်ပၞာန် ၁၀၂၇ ဂှ် ကံၚ်ဇြဳပၞာန် သုၚ်စောဲလွဟ်ဇၞော် ကေုာံ အရီုဗၚ်ပၞာန်တရဴကျာတံတုဲ ပရေၚ်ဗ္တိုက်စွံပွန်ကုကောန်အရာပ်ဒေသ နူကဵုဒေသပရေၚ်ပၞာန်သ္ကာတ်မြဟ်တံသၟးဟွံက သီုကဵုဒေသပေါဲဗ္တိုက်ဟွံက္တဵုဒှ်တံ လၟိဟ်လ္တုန်ဂၠိုၚ်ကဵုကၠံဝါတံလေဝ် နွံဒၟံၚ်ရ။

အတိုၚ်တၚ်နၚ် ဂကောံညးဗြဴတအာၚ် TWO ဖျေံသ္ဇိုၚ်ရးသေံသ္ကုတ်သၟဝ်ကျာဂှ်မ္ဂး အပ္ဍဲကာလ ပရေၚ်ပၞာန် ၁၀၂၇ ပွိုၚ်ၜါဂိတုဂှ် ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် ဒပ်ကံၚ်ဇြဳပၞာန်တံတုဲ ညးဒေသ ၁၂၀ ပြၚ် ဒးချိုတ်အာလဝ်ဂှ် ဂွံတီကေတ်ရ။

အတိုၚ်လိက်ဒုၚ်စဳရေၚ် ဂကောံလ္ၚတ်ပဋိပက္ခ ကေုာံ ကေၚ်ကာဍုၚ်ဗၟာဂှ်မ္ဂး အပ္ဍဲပေါဲဗ္တိုက်သီဗ္ဒိုပ်၊ သီဍုၚ်ဂှ် ကံၚ်ဇြဳပၞာန် ဒးဆောံလေၚ်လဝ် လွဟ်လက်နက်ပရေၚ်ပၞာန် ဂၠိုၚ်ကဵုလ္ၚီ ကေုာံ သီုကဵုမကမ် ဂၠိုၚ်ကဵုဠက် ပါလုပ်သီုကဵုအမၠံက်ဟံၚ်ဝေတ်ဇြာ ပန်က္ၜၚ်ကျာတံရ။

ပရေၚ်ပၞာန် ၁၀၂၇ မစလဝ် နူကဵုဂကောံမဟာမိတ်ကောဒေံပိဂကောံဂှ်ဝွံ ကၠောံထၞာန်ကၠုၚ် သီုကဵုရးသက်ကိုၚ်၊ ကရေၚ်ဍာဲ၊ ချေၚ်၊ မန်၊ ဗဂေါ ကေုာံ ကရေၚ်တံဂှ်တုဲ ပေါဲဗ္တိုက်သီဗ္ဒိုပ် သီဍုၚ်တံ က္တဵုဒှ်လဝ် အဆက်က်တုဲ လ္ပာ်ကံၚ်ဇြဳပၞာန် ဒးဗလးလဝ်တဲ ဗ္ဒိုပ်ဒပ်ကဵုစှော် ကေုာံ ဍုၚ်ဟွံအောန်နူကဵု ၈ ဍုၚ်ရ။

ကံၚ်ဇြဳပၞာန် မကျဗြံကၠုၚ် ပ္ဍဲကဵုပရေၚ်ပၞာန်တံဂှ်ဝွံ ကေတ်အရီုဗၚ်ကြုက်တုဲ ဆဵုဂဗသဳကၠဳလဝ် ကုဂကောံမဟာမိတ်ကောဒေံပိဂကောံ ပ္ဍဲကဵုဍုၚ်ကြုက်၊ ဍုၚ်ကူမေန် ဂိတုဒဳဇြေမ်ဗာ သတ္တာဟဒုတိယ အလန်ပထမတုဲ ပ္ဍဲကဵုဂိတုဒဳဇြေမ်ဗာ သတ္တာဟလက္ကရဴအိုတ်ဏံဂှ်လေဝ် ထပ်သဳကၠဳလဝ် အလန်ဒုတိယရ။

ဆ္ဂး စပ်ကဵုကိစ္စသဳကၠဳလဝ်ဂှ်တုဲ ကံၚ်ဇြဳပၞာန်ကီု ဂကောံမဟာမိတ်ကောဒေံပိဂကောံတံကီု လလောၚ်ပ္တိတ်ကဵုလဝ် ဗွဲမလုပ်သၞောဝ် ဟွံမွဲကီုလေဝ် တၚ်တုပ်စိုတ် ပြေပြံၚ်သီုၜါလ္ပာ်တံဂှ် ဟွံကလိဂွံလဝ်ပုဟ်ဂှ် ပရိုၚ်ဂမၠိုၚ် မံက်တိတ်ဒၟံၚ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် သ္ပပဓာန်ကုကြုက်တုဲ ပရေၚ်ချဳဒရာၚ်ပရေၚ်ၜိုဟ်လလမ်ဂှ် ဆက်အာဂတဟွံမာန်တုဲ ပေါဲဗ္တိုက်တံ ဆက်တုဲသ္ကာတ်မြဟ်ကၠုၚ်ဏောၚ်ဂှ် သ္ၚဳဂၠိပ်လဝ်ရ။

“ပ္ဍဲပေါဲသဳကၠဳ ဆဵုဂဗအလန်ဒုတိယဂှ် မုတၚ်သ္ဂုတ်သွာတ်မှ ဖျေံဟွံမာန်မွဲသာ် ဒှ်အာအကာဲအရာ ပေါဲသဳကၠဳဂှ် လီုအာရ။ အေ ဂှ်တှ်ေ ပရေၚ်ချဳဒရာၚ်ပရေၚ်ၜိုဟ်လလမ် ညံၚ်ပၞာန်ဂွံဒေါအ်ဒေၚ် သ္ပပဓာန်ကဵုကြုက်တုဲ မကၠောန်ဒၟံၚ်ဂှ်ဝွံ ဆက်အာဂတမာန်ဟွံသေၚ်ပုဟ်။ မူဟိုတ်ရောတှ်ေ ဂကောံကောဒေံပိဂကောံဂှ် ဟွံယှအ်ဖျေံအသိၚ်ပေါဲဗ္တိုက်တံမွဲသာ် ဟိုတ်နူဆက်လုပ်အာ ပေါဲဗ္တိုက်ဏောၚ်ဂှ်တုဲ တၠုၚ်လအာဏံဝွံ သွပ်လ္ပအ်မေန်အံၚ်လှာၚ် ဂွံဒေါအ်ဒေၚ်ပေါဲပၞာန် နူကဵုပေါဲသဳကၠဳပရေၚ်ၜိုဟ်လလမ်မွဲကဆံၚ်ဂှ်ဝွံ ဒှ်ဟွံမာန်လးလးရ။ ပေါဲဗ္တိုက်တံဂှ်တှ်ေ ဆက်ဒှ်အာဒၟံၚ်ဏီဏောၚ်။ ဆက်တုဲ သ္ကာတ်မြဟ်ကၠုၚ်ဏောၚ်“ သာ်ဝွံ သ္ဂးရ။

နကဵုသြၚ်လောန်တိုၚ်(မ်) စပ်ကဵုဂကောံမဟာမိတ်ကောဒေံပိဂကောံကဵု ကံၚ်ဇြဳပၞာန်တံ သဳကၠဳလဝ် အလန်ဒုတိယ ပ္ဍဲကဵုဍုၚ်ကြုက်ဂှ်တုဲ ၜိုန်ရဆက်စၠောံလဝ် ဇရေၚ်ညးမၞုံအခေါၚ်ဟီုဂး ဂကောံဂှ် နူကဵုထလဳဂရာမ်ကီုလေဝ် ကလေၚ်လဝ်ပရိုၚ်ဂှ်ဟွံမွဲရ။

ပြဟ်ဟ်ဏံ ပ္ဍဲကဵုရးသေံသ္ကုတ်သၟဝ်ကျာ အပ္ဍဲဂိတုဒဳဇြေမ်ဗာ ၂၆ ဂှ် TNLA လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မၞုံပွိုၚ်ဍုၚ် နာမ္မတူ၊ ကောတ်ခိုၚ် ကေုာံ ပွိုၚ်ဍုၚ်ကျံက်မေဝ်တံဂှ်တုဲ ဗ္ဒိုပ်ဗၠာဲသၟိၚ် ခရိုၚ်မျံက်ဥူ ရခေၚ်ဂှ်လေဝ် ပ္ဍဲကဵုအခိၚ်ဗ္တံ ၜိုတ် ၉ နာဍဳဂှ် AA သီဂွံလဝ်ရောၚ် ဂကောံကောဒေံပိဂကောံ လလောၚ်ပ္တိတ်လဝ်ရ။

ဟိုတ်နူပရေၚ်ပၞာန် ဂကောံမဟာမိတ်ကောဒေံပိဂကောံဂှ်တုဲ ဒပ်ကံၚ်ဇြဳပၞာန် မဒးကျဗြံဒၟံၚ်ဂှ်ဝွံ မွဲလ္ပာ်ဏံဂှ် ဇြဟတ်ဍိုန်လျကၠုၚ်ဒၟံၚ် စဵုကဵုဒးကလေၚ်ဒုၚ်ဒၟံၚ်တဲ ရဲဂြိပ်နူပၞာန်တံ၊ ကောန်ပၞာန်ဒေါအ်ဇူတြေံတြေံတံကဵု မၞိဟ်ကေတ်လဝ်အခေါၚ်ဂဥုဲတံ မဒှ်ရ။

ပရေၚ်ပၞာန် ၁၀၂၇ မစလဝ် ပ္ဍဲကဵုရးသေံသ္ကုတ်သၟဝ်ကျာဂှ် ဂလာန်ကမြဴဒပ်ပၞာန် “အဲဟွံချိုတ် ဗ္ဒိုပ်အဲဟွံကဵုစှ်ေ” ဂှ်ဝွံ သှ်ေၜက်အာပ္ဍဲဝၚ်ယျဂှ် ဂကောံမဟာမိတ်ကောဒေံပိဂကောံ လလောၚ်ပ္တိတ်လဝ် ပ္ဍဲဂိတုဒဳဇြေမ်ဗာ ၁၇ တေံရ။

ညးခါတ်အကာဲပရေၚ်ပၞာန်တံဂှ် ကရောံပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံတံဂှ် ဟိုတ်နူပရေၚ်ပၞာန်ထ္ပက် ဂကောံဇြဟတ်ပၠန်ဂတး အလုံဍုၚ် မွဲအခိၚ်ဓဝ်တံဂှ်တုဲ ဒပ်ပၞာန်ဗၟာ သရိုဟ်ထ္ကးအာမာန်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−The Kokang