ဗဒိုပ်ကံၚ်ဇြဳပၞာန် နွံဍုၚ်နာတ်တာန်ကွေန် (၃) ဗဒိုပ် KNLA ကဵု ဒပ်ပၠန်ဂတးပံၚ်ကောံတအ် သီဂွံ၊ ကောန်ဒပ်ကံၚ်ဇြဳပၞာန် ဒးချိုတ်လဝ် (၂၀) တၠ

ကျောက်ဂျဳ၊ ဒဳဇြေမ်ဗာ (၂၈)

ဗဒိုပ်ကံၚ်ဇြဳပၞာန် (၃) ဗဒိုပ် မၞုံဍုၚ်နာတ်တာန်ကွေန်၊ ပွိုၚ်ဍုၚ်ကျောက်ဂျဳ၊ ရးဒေသဗဂေါဂှ် ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပၠန်ဂတးပံၚ်ကောံတအ် ဗတိုက်သီကေတ်မာန်လဝ်ရဂှ် ဗဟဵု KNU လလောၚ်တြးလဝ် ပ္ဍဲအခိၚ်ဒေါဝ်တ္ၚဲ တ္ၚဲဏံရ။ 

ဗဒိုပ်လေဝ်ပါတ်၊ ဗဒိုပ်အုမ်နေဝ်ပေန်ကဵု ဗဒိုပ်နယွာပေန် ကံၚ်ဇြဳပၞာန် မၞုံပွိုၚ်ဍုၚ်မူ၊ တိဍာ်အုပ်ဓုပ်ကဝ်ဒူလေဝ်၊ ဒပ်မဟာ (၃)၊ ဗော်သွးကောန်ဂကူကရေၚ် – KNU တအ်ဂှ် တံဒပ်သၟဝ်တဲဒပ်ပၞာန်ဗၠးၜးကောန်ဂကူကရေၚ် (KNLA) တအ်ကဵု ဒပ်ပၠန်ဂတးပံၚ်ကောံတအ် ဗတိုက်သီကေတ်လဝ် ပ္ဍဲဂိတုဒဳဇြေမ်ဗာ စၟတ်တ္ၚဲ (၂၆) ရ။ 

ပ္ဍဲကဵုပေါဲဗတိုက်သီဗဒိုပ်ဏံဂှ် ကောန်ဒပ်သၟဝ်တဲကံၚ်ဇြဳပၞာန် ဒးချိုတ်လဝ် (၂၀) တၠတုဲ သီဂွံလဝ် လွဟ်လက်နက်ဂကူစုၚ် (၁၉) ဒကိုအ်ကဵု မကမ်လ္ၚဵုတအ်ရဂှ် ဓမံက်ထ္ၜးလဝ်ရ။ 

သ္အာၚ်နူဂှ်ပၠန် လ္ပာ်တံဒပ် ဒပ်သၟဝ်တဲဒပ်ပၞာန်ဗၠးၜးကောန်ဂကူကရေၚ် (KNLA) တအ်ကဵု ဒပ်ပၠန်ဂတးပံၚ်ကောံတအ်လေဝ် ပရေၚ်ဇီုကပိုက် ဒးပြဟ်လလုဲလဝ်လ္ၚဵုဂှ် နွံရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။ 

ကြဴဗတိုက်သီကေတ်လဝ်ဗဒိုပ် (၃) ဗဒိုပ်ဏံတုဲဂှ် ဆက်ထ္ပက်ပၞာန်ဗတိုက်ဒၟံၚ် ဗဒိုပ်ဒပ်ကံၚ်ဇြဳပၞာန် မၞုံဍုၚ်နာတ်တာန်ကွေန်ဖိုဟ်ဏီတုဲ လ္ပာ်ကံၚ်ဇြဳပၞာန်လေဝ် ကဵုဒၟံၚ်ပၞာန်ရီု နကဵုက္ၜၚ်ကျာရဂှ် လလောၚ်တြးလဝ်ရ။ 

ပရိုၚ် – သြၚ်လောန်တိုၚ်မ်

ဗီု – KNU