နမ္မတူ ၊ ဒဳဇြေမ်ဗာ (၂၉)
ခိၚ်အပြုအပြေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ ပေၚ်ၜါဂိတုဂှ် ဍုၚ်ဏာမ်သာန်၊ ဏာမ်ခါမ်၊ မာန်တုမ်၊ မိုၚ်လုမ်ကဵု နမ္မတူ မၞုံတွဵုရးသေံသၟဝ်ကျာတအ်ဂှ် TNLA သီကေတ်မာန်လဝ် ပေၚ်ၚ်ရဂှ် ဂွံတီကေတ် အတိုၚ်တၚ်လလောၚ်တြး TNLA ရ။
နူကဵုဒပ်ပၞာန် တအာၚ် TNLA ဗတိုက်လဝ် ဍုၚ်နမ္မတူ ပွိုၚ်ပန်တ္ၚဲဂှ် အခိၚ်လၟုဟ်ဏံ သီဂွံလဝ် တူတူလဴလဴတုဲ ပၞောဝ်ကဵုဍုၚ်သီဂွံလဝ် ပ္ဍဲတွဵုရးသေံသၟဝ်ကျာတအ်ဂှ် ဒှ်ကၠုၚ် ဍုၚ်မရနုက်ကဵု ပဉ္စမရ။
အတိုၚ်တၚ်လလောၚ်တြးမ္ဂး ဗဒိုပ်ဒပ်ပၞာန် သ္ကိုပ်ဗျူဟာကံၚ်ဇြဳပၞာန် ဖျေံသ္ဇိုၚ်ကောပ်ကာဲဒၟံၚ် မၞုံဍုၚ်နမ္မတူဂှ် TNLA စဗတိုက်လဝ် ပ္ဍဲဂိတုဒဳဇြေမ်ဗာ စၟတ်တ္ၚဲ (၂၅) ဂှ်တုဲ ပ္ဍဲဂိတုဒဳဇြေမ်ဗာ စၟတ်တ္ၚဲ (၂၈) ဂှ်မ္ဂး ဗတိုက်သရိုဟ် သီကေတ်လဝ် ပေၚ်ၚ်မာန်ရဂှ် TNLA ဟီုသ္ဂးလဝ်ရ။
ပ္ဍဲပေါဲဗတိုက်ဂှ် ပါလုပ်သီုကုန်ဗျူဟာ ကံၚ်ဇြဳပၞာန် ခမရ – ၃၂၄ ဗဒိုပ်ဒပ်ပၞာန်မာန်သာန်၊ ဗဒိုပ်ဒပ်ပၞာန်ပါန်တပျေ၊ ဗဒိုပ်ကၚ်နောၚ်သိုၚ်၊ ဗဒိုပ်ဗၠာဲသၟိၚ်ကဵု ရုၚ်ဌာနဆက်စပ်ကံၚ်ဇြဳပၞာန် မဒှ်ဒပ်ပၞာန်တအ်ဂှ် သီကေတ်လဝ် ပေၚ်ၚ်မာန်ရ
ပ္ဍဲကဵုပေါဲဗတိုက်သီဗဒိုပ် ဍုၚ်နမ္မတူ ပွိုၚ် (၄) တ္ၚဲဂှ် နူကဵုဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာ အပံၚ်လၟိဟ် (၆၁) ဝါ၊ ဂြာတ်ထောံဖျေံလဝ်ဗုမ် ၂၁၈ ဝါ၊ ပန်ဖျေံလဝ်လွဟ်ဇၞော် ဟွံအောန်နူ ၉၃ ဝါ ဗတိုက်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး TNLA ရ။
ဟိုတ်နူဗတိုက်လဝ်ဏံတုဲ ညးဒေသ ကောန်ဍုၚ်နမ္မတူ ဒးချိုတ်လဝ် (၂) တၠ ဒးလဝ်ဘဲဝပ် (၈) တၠတုဲ ပါလုပ်သီုဘာဗလဳ၊ စမြိုၚ်ပရေၚ်ဘာသာ ကျာ်ကၟာတအ် သ္ၚိဒၟံၚ် (၇) မ ဒးလဝ်ကဝေက်လွဟ်ဇၞော် သီုကဵုကဝေက်ဗုမ်က္ၜၚ်ကျာ ဒးလီုလာ်လဝ်တုဲ သ္ၚိဒၟံၚ်မွဲမဂှ် တူပၟတ် ဒးလီုလာ်လဝ်ရ။
အတိုၚ်တၚ်လလောၚ်တြး TNLA မ္ဂး ပ္ဍဲမွဲကာလပေါဲဗတိုက်ဏံ သီဂွံလဝ် လွဟ်လက်နက်မကမ် ကံၚ်ဇြဳပၞာန်၊ ပါလုပ်သီုအမၠံက်ဟောၚ်ဝေန်ဇြာ၊ လွဟ်လက်နက်ဂကူစုၚ်၊ မာၚ်၊ မကမ်ဂကူစုၚ် သီုကဵုကပေါတ်အရပ်စပ်ပၞာန်တအ်ရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
ဗီု – TNLA
sanlontai