ကံၚ်ဇြဳပၞာန် ပ္တိတ်ကၠုၚ်ဇြဟတ် သွက်ဂွံထ္မံက်ပရေၚ်ပၞာန်ဒရုၚ်

နေဗျဳဒဝ်၊ ဒဳဇြေမ်ဗာ ၂၉

ကံၚ်ဇြဳပၞာန် ပ္ဍဲကဵုပေါဲဗ္တိုက်အလုံဍုၚ်မွဲပြးဇး မကျဗြံဒၟံၚ်ဂှ်ဝွံ သုၚ်စောဲဒရုၚ်ကဆံၚ်သၠုၚ်တံတုဲ ထ္မံက်အာ ပရေၚ်ပၞာန်ဒရုၚ်တံဏောၚ်ဂှ် ထ္မံက်ထ္ၜးဒၟံၚ် ပ္ဍဲအကံက်ထလဳဂရာမ်တြးဝါဒတံရ။

အပ္ဍဲပရေၚ်ပၞာန်သီအဝဵု ဗ္ဒါဲပွိုၚ် ၃ သၞာံဂှ် ဒပ်ကံၚ်ဇြဳပၞာန် မဒးကၠောန်ဒၟံၚ် ပရေၚ်ဗ္တိုက်တရဴကျာ လၟေၚ်တ္ၚဲဂှ်ဝွံ အခိၚ်လၟုဟ် သွက်ဂွံပလေဝ်ပလေတ်ထိၚ်ဒဝ် က္ၜၚ်ကျာတံကဵု သွက်ကၠေၚ်က္ၜၚ်ကျာဂှ် ဒးဆေၚ်ဒၟံၚ်မုက် ကုအခက်အခုဲဂမၠိုၚ်ရ။

ဟိုတ်နူအကာဲအရာသာ်ဏံတုဲ ကံၚ်ဇြဳပၞာန်ဝွံ ကၠောန်ၜိုတ်ကၠုၚ် သွက်သ္ဂောံထောံမခတိုဟ် နကဵုဒရုၚ် ကေုာံ နကဵုက္ၜၚ်ကျာ ပလံၚ်ဗစိုပ်ကပေါတ်သာသာတံဂှ်ရ။

အကြာပ်ဒပ်ဇၞော် ဇြေယျ မသ္ပလဝ်ဇြဳဒဳအာမ်ဂှ် လ္ပာ်ကံၚ်ဇြဳပၞာန် ယဝ်ရဗ္တိုက်ကၠုၚ်ကဵုဒရုၚ်မ္ဂး ဒရုၚ်ဒပ်ပၠန်ဂတးတံလေဝ် လုပ်စိုပ်ပ္ဍဲဒေသကံၚ်ဇြဳပၞာန်တံမာန်ဏောၚ်ဂှ် သ္ၚဳဂၠိပ်လဝ်ရ။

“တၚ်ဍိုန်လျဂှ် ကုန်ဗျူဟာတံ၊ ကုန်ပၞာန်ထ္ပက်တံဂှ် ဍေံတံ တိုန်ကဵုဒရုၚ်မ္ဂး ဍေံတံ ဒးကၟာတ် Anti Drone Jammer ဍေံတံဏောၚ်။ ဗီုဏံတှ်ေ လ္ပာ်ပိုယ်တံလေဝ် လုပ်အာလောဲလောဲဂွံဏောၚ်” သာ်ဝွံ သ္ဂးရ။

ပ္ဍဲကဵုချာန်နေဝ်တြးဝါဒကံၚ်ဇြဳပၞာန်ဂှ် စရပ်စပ်အာ ဒရုၚ်အဇာဇၞော် ဂကူ CZ55 vtol UAV ဏောၚ်ဂှ် ထ္မံက်ထ္ၜးလဝ်နွံတုဲ ပ္ဍဲကဵုမုက်လိက်လ္ၚဵုတံဂှ်လေဝ် ဂကောံပၞာန်ညးဍုၚ်ကွာန် ဝါယျာသောတ် ပ္တိတ်ထ္ၜးဒၟံၚ် ဒရုၚ် CZ 55 UAV တံဂှ်ယျဂးတုဲ ထ္မံက်ထ္ၜးဒၟံၚ်အိုတ်ရ။

ဒရုၚ် CZ 55 UAV ဂှ်ဝွံ ဒှ်ဂကူဒရုၚ် ပ္တိတ်နူဍုၚ်ကြုက်မွဲဂကူတုဲ စဵုကဵုသမၠုၚ်ပေ ၁၄၀၀၀ ပြၚ်ဂှ် ပဝ်ယာန်သၠုၚ်အိုတ်မာန်ကီုလေဝ် လျိုၚ်ဂၠိုၚ်ၚ် ဖ္ဍိုက်ဟွံမာန်တုဲ တန်တဴကဵုရာသဳဥတုတုဲ အခိၚ်လလအ်ပဝ်ယာန်တံ တၞဟ်ခြာမာန်ဂှ် ဂွံတီကေတ် အတိုၚ်တၚ်နၚ် ကမ္ပဏဳရ။

ဂကောံဒပ် PDF တံဝွံ ဟိုတ်နူရပ်စပ်ဒၟံၚ် သၞောတ်ဒပ်ပၞုက်ဂှ်တုဲ နကဵုကံၚ်ဇြဳပၞာန် ဗ္တိုက်အာ ဗွဲမစိုပ်တရဴမာန်ဟွံသေၚ်ပုဟ်ဂှ် ညးဒုၚ်တာလျိုၚ် ဂကောံဒပ်မဟာမိတ် ရေၚ်ဒဵုချေန်တွေန် မဒှ်ဂကောံစဵုဒၞါညးဍုၚ်ကွာန် ဖျေံသ္ဇိုၚ်ရးသက်ကိုၚ်ဂှ် ဟီုရ။

“ပရေၚ်ပါ်ထ္ကး သွက် PDF တံဂှ် ကဵုဒရုၚ်လေဝ် ပရေၚ်ဇီုကပိုက်တံ နွံအာဟွံသေၚ်ပုဟ်။ ညအ်ဂှ် ဟွံသ္ပဂရုတုဲ ဍေံတံသၟးရ ဗ္ဒိုပ်ဖျေံလဝ်သ္ဇိုၚ်ဇၞော်ဇၞော်တံ နွံ။ ပ္ဍဲကဵု PDF ပိုယ်တံဂှ် ဗ္ဒိုပ်ဖျေံလဝ်သ္ဇိုၚ်ဟီုဂှ် ဟွံမွဲပုဟ်။ ပၞုက်လဝ်ဖအိုတ်ဏောၚ်။ ဟိုတ်နူပၞုက်လဝ်ဒပ်သီုဖအိုတ်ဂှ်တုဲ လ္ပာ်ဍေံတံ ဗ္တိုက်ကၠုၚ်လေဝ် လ္ပာ်ပိုယ်တံဂှ် ဟွံဒးသ္ပဂရုပုဟ်“ သာ်ဝွံ သ္ဂးရ။

အခိၚ်လၟုဟ်ဂှ် ပ္ဍဲရးသက်ကိုၚ်ဂှ် ကံၚ်ဇြဳပၞာန် ၜိုန်ရသုၚ်စောဲဒၟံၚ် ဒရုၚ်ထံၚ်ပရိုၚ်တံ ကြပ်အရိုဟ်ဗ္တံကီုလေဝ် ထောံမခတိုဟ် ဗ္တိုက်တံဂှ် ဟွံမွဲဏီပုဟ်ဂှ် ဂွံတီကေတ်တုဲ ပ္ဍဲကဵုတွဵုရးကရေၚ်ဍာဲဂှ် သၞာံတုဲကၠုၚ်တေံ ကၠောန်သ္ပဗ္တိုက်လဝ် ကဵုဒရုၚ်တံ သၠဲသၠဲလးလးဂှ် ဂွံတီကေတ် အတိုၚ်တၚ်နၚ်ပရိုၚ်ဗလးတိတံရ။

ဒပ်ကံၚ်ဇြဳပၞာန်ဝွံ ခယျကေတ် ဌာန်ဂအုပ် ဒပ်ပၠန်ဂတးကရေၚ်ဍာဲတံတုဲ ကၠုၚ်စိုပ်ထောံဒၟံၚ်မခတိုဟ် ကုဗ္ဒိုပ်ပါဲဒဴဘဲပၞာန်တံ နကဵုဒရုၚ် မွဲဏှမွဲဏှ နွံဒၟံၚ်ဂှ် ဂွံတီကေတ်ရ။

ဒပ်ပၠန်ဂတးတံဝွံ ဟိုတ်နူဍိုဟ်ကေက်စိုန်သ္ကီုတဴတိဍာ်တံဂှ်တုဲ ဒရုၚ်ကံၚ်ဇြဳပၞာန်ဝွံ စိုပ်တရဴဟွံသေၚ်ပုဟ်ဂှ် ညးအုပ်ကာ ဗော်တောတက်ကောန်ဂကူကရေၚ်ဍာဲ KNPP ခူဒါန်နဳယဴ ဟီုရ။

“တၟေၚ်ကၠုၚ်ဂှ်လေဝ် ဟွံသေၚ်ပုဟ်။ ကဵုက္ၜၚ်ကျာရဂှ် ဍေံတံဗ္တိုက်ကၠုၚ်တုဲယျ။ ကဵုဒရုၚ်ဂှ်တှ်ေ ဒဵုၜိုတ်ဏံ စိုပ်တရဴဏောၚ်ဂှ် ဟီုဟွံဂွံပုဟ်။ တုဲပၠန် ပိုယ်တံသာမွဲဂှ်တှ်ေ အရာမဍိုဟ်ကေက်ပ္ဍဲဗလးတိဏံဂှ် ပိုယ်တံ တီဂၠိုၚ်တုဲ ဍေံတံဂှ် တီကေတ် ၜိုတ်ပိုယ်တံဟွံမာန်ပုဟ်“ သာ်ဝွံ ဟီုဂးလဝ်ရ။

ပ္ဍဲကဵုဗ္ဒိုပ်ဖျေံသ္ဇိုၚ်ကံၚ်ဇြဳပၞာန် မၞုံပ္ဍဲဒေသပေါဲပၞာန်သ္ကာတ်မြဟ်တံဂှ် ဒးဗ္ဂပ်စုတ်လဝ်ဂျန်မာတံတုဲ ဒှ်ဒၟံၚ်အကာဲအရာ ဒးတြးဒၟံၚ် လိက်ဆဝ်မ္ၚုဟ် သွက်အန္တရာယ်ဒရုၚ်တံဂှ်ရ။

ဂကောံဒပ်ဒရုၚ်ပၠန်ဂတး Federal Wings မက္တဵုဗဒှ်ကဵုဓဝ်ဖေက် ကုဒပ်ကံၚ်ဇြဳပၞာန်ဂှ်ဝွံ ပ္ဍဲကဵုရးသက်ကိုၚ်၊ ရးမာန္တလေဝ်၊ ရးဗဂေါ၊ တွဵုရးကရေၚ် ကေုာံ တွဵုရးကရေၚ်ဍာဲတံပါလုပ်ဂှ် ပ္ဍဲကဵုဒေသပေါဲပၞာန်သ္ကာတ်မြဟ်တံဂှ် ကၠောန်သ္ပဒၟံၚ် ပရေၚ်ပၞာန်ဒရုၚ် မစိုပ်တရဴတံရောၚ်ဂှ် ဂွံတီကေတ်ရ။

ဒရုၚ် ဒပ်ပၠန်ဂတးတံဂှ်ဝွံ ဟိုတ်နူလၟေၚ်ဒဒှ် ဗ္တိုက်လဝ် စဵုကဵုဌာန်ဂအုပ်ပၞာန်ရး ကေုာံ ဒၞါဲပၟိက်ဇၞော် ကံၚ်ဇြဳပၞာန်တံဂှ်တုဲ ပရေၚ်ပၞာန်ဒရုၚ်တံဝွံ သွက်ကံၚ်ဇြဳပၞာန်ဂှ် ဒှ်တဴဓဝ်ဖေက်မွဲဂှ် သ္ဂးလဝ်ရ။

လ္ပာ်ကံၚ်ဇြဳပၞာန် မဒးဂိဒၟံၚ်သာ်ဏံဂှ် လလောၚ်ပ္တိတ်ကၠုၚ် ဒရုၚ်တံဂှ်ဝွံ ဒှ်သဘဴ ညံၚ်ဂကောံဒပ်ပၠန်ဂတးတံ ဂွံဖေက်တုဲ ဘပဠလဝ်ဏောၚ်ဂှ် သ္ကိုပ်ပရေၚ်ပၞာန် KNDF ခူရဳဒူ သ္ၚဳဂၠိပ်လဝ်ရ။

လ္ပာ်ကံၚ်ဇြဳပၞာန်တံ သွက်ဂွံကလေၚ်ဗ္တိုက် ကုဒပ်ပၠန်ဂတးတံ နကဵုဒရုၚ်ဂှ် ပလေဝ်ပလေတ်ဒၟံၚ်ကီုလေဝ် ဒှ်ဒၟံၚ်အကာဲအရာ ပွမစိုပ်တရဴနွံ၊ ဟွံမွဲဂှ် ဒးမၚ်ကျောဝ်ဒၟံၚ်ရောၚ် ညးလ္ၚတ်ဂမၠိုၚ် သ္ဂးလဝ်ရ။

ဂကောံပၠန်ဂတးတံဂှ် အပ္ဍဲကာလကၠုၚ်စိုပ်ဏံ ပွမပကောံမၞိဟ်တံဂှ် သွက်ဂွံဝေၚ်ပါဲကဵုဂှ်ကဵု သွက်ဂွံစွံသတိ ကုပရေၚ်ဗ္တိုက်တရဴကျာ ကံၚ်ဇြဳပၞာန်တံ ဗွဲတၟေၚ်ဂှ် ဆဝ်မ္ၚုဟ်လဝ်ရ။

အတိုၚ်လိက်ဒုၚ်စဳရေၚ် ဂကောံသုတေသန ညာန်လေန်တေတ်ဂှ်မ္ဂး အပ္ဍဲသၞာံ ၂၀၂၃ ဏံ ဒပ်ကံၚ်ဇြဳပၞာန်ဝွံ ကၠောန်သ္ပလဝ် ပရေၚ်ဗ္တိုက်တရဴကျာ ဗ္ဒါဲ ၁၀၀၀ ဝါဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−ချာန်နေဝ်တြးဝါဒကံၚ်ဇြဳပၞာန်