စောဲဂဗုတ် ကုသၟာရပ်လွဟ် ပ္ဍဲပရေၚ်ပန်ပှော်က္ၜၚ်ကံက်ဂှ် ဟွံမာန်ဏီ

ၜၚ်ကံက်၊ ဒဳဇြေမ်ဗာ (၃၁)

ပ္ဍဲကဵုအခိၚ်လွဳလွတ်ဒၟံၚ် ယဲစိုတ်ဓာတ် သၟတ်သၟာရပ်လွဟ် က္လိလောန်လဝ်ဂဗုတ်ပန်ပှော် တိုက်ဗၞိက်ဇြဳယာမ်ပါရာဂွောန် ဍုၚ်ၜၚ်ကံက်၊ ကၟိန်ဍုၚ်သေံဂှ် နကဵုဒပ်ဗၠာဲသၟိၚ် စောဲဂဗုတ်စုတ်ဂလာန် ဟွံမာန်ဏီရဂှ် ရုၚ်ဂအုပ်နာဲဗ္စာသေံ ဟီုဂးလဝ်ရ။

ပရေၚ်ပန်ပှ်ောက္တဵုဒှ်လဝ် ပ္ဍဲဂိတုအံက်တဝ်ဗာ တုဲကၠုၚ်တေံဂှ် ပါလုပ်သီုကောန်ကၟိန်ဍုၚ်ဗၟာမွဲတၠ ဒးချိုတ်လဝ် (၃) တၠတုဲ ဇီုကပိုက်ဒးလဝ်ဘဲဝပ် (၄) တၠရ။

ညးမၞုံအခေါၚ်ဟီုဂး ရုၚ်ဂအုပ်နာဲဗ္စာသေံဂှ်မ္ဂး သၟာရပ်လွဟ် အယုက် (၁၄) သၞာံဂှ် ဟိုတ်နူဒုၚ်လွဳလွတ်ဒၟံၚ်ဂဥုဲဂှ်ရ သွက်ဂွံစစၟဳစၟတ် ပ္ဍဲဗွိုၚ်သၞောဝ်ဓဝ် ဒှ်ဟွံမာန်ဏီရဂှ် ဟီုဂးလဝ်ရ။

လိက်ဒုၚ်စဳရေၚ်ဂဗုတ် ဒပ်ဗၠာဲသၟိၚ် ပ္တိုန်ထ္ၜးလဝ် ဒဒှ်ရပရေၚ်စၟဳစၟတ်ယဲ ဌာနလွဳလွတ်ယဲ သွက်ကောန်ဒုဟ် အာစိုပ်ဒတုဲ တုဲဂှ်လေဝ် နာဲဗ္စာအလဵုအသဳတအ် တးပါဲလဝ်ရ။

“သ္ကိုပ်စၟဳစၟတ် လ္ပာ်ဒပ်ဗၠာဲသၟိၚ်တအ်ဂှ် ညံၚ်ဂွံဒှ် ပရေၚ်ညိၚ်ဝတ် စိုတ်ဓာတ်ဍေံ ဒးမၚ်ရံၚ်ဏောၚ်” ဂှ် ညးမၞုံအခေါၚ်ဟီုဂး ဂအုပ်ရုၚ်နာဲဗ္စာသေံဂှ် ဟီုဂးလဝ်ရ။

ဂဗုတ်သၟာရပ်လွဟ်ဂှ် တၚ်အပိုၚ်အခြာ စဵုကဵုပွိုၚ် (၂၀) သၞာံ နွံဒၟံၚ်ရဂှ် ဂွံတီကေတ်တုဲ သွက်ဗွိုၚ်သၞောဝ်ဓဝ် တၚ်သ္ပလဝ်အခေါၚ် က္လိဂွံလဝ်ဂှ် ပရေၚ်ပရဟ်ဒုၚ်ရပ်ဒက်ဂှ်မ္ဂး အာစိုပ်လအိတ် ပ္ဍဲကဵုဂိတုဒဳဇြေမ်ဗာစၟတ်တ္ၚဲ(၃၁) ဏံ​ရဂှ် ဂွံတီကေတ်ရ။

ညးရေၚ်တၠုၚ်ဖိုလ်ကောန်ဒုဟ်တအ်ဂှ် သွက်ဂွံက္လေၚ်ကၠောန်ရေၚ်တၠုၚ် တၚ်သ္ၚဳဂၠိပ် သွက်ပရေၚ်စိုတ်ဓာတ်ဍေံ မွဲတန်ပၠန် ထပ်ဆဵုဂဗအာ ပ္ဍဲဂိတုဂျာန္နဝါရဳ မွဲအလန်ပၠန် နွံရဂှ် ဂွံတီကေတ်ရ။

ဂကောံလွဳလွတ်ကဵုဒၟံၚ်ဂဥုဲဇဗဂှ်မ္ဂး စဵုကဵုအကာဲအရာပရေၚ်ထတ်ယိုတ် ဂွံဍိုက်ပေၚ်ရုမ်ဂပ် သွက်ဂွံစၟဳစၟတ် ပ္ဍဲဗွိုၚ်သၞောဝ်ဓဝ်ဂှ် လိက်ဒုၚ်စဳရေၚ် ပရေၚ်က္တဵုဒှ်တဴတက်ဒၟံၚ် ပရေၚ်လွဳလွတ်ဂဥုဲ အပံၚ်လၟိဟ် (၁၈၀) တ္ၚဲဂှ် ဒးပၠုပ်အာ ဇရေၚ်သ္ကိုပ်စၟဳစၟတ်ဗၠာဲသၟိၚ်တအ်ရ။

ဒပ်ဗၠာဲသၟိၚ်ဂှ်မ္ဂး ပ္ဍဲကဵုဂဗုတ်စောဲလဝ် သၟတ်သၟာရပ်လွဟ်ဏံ (၅) ဂဗုတ်တအ်ဂှ် ဒှ်ဂဗုတ်ပရဟ်ဒုၚ်ပလေဝ်ပလေတ်လဝ် သွက်ဂွံဂစိုတ်မၞိဟ်ကီု၊ ဂဗုတ်ပ္တိတ်လဝ်ဇြဟတ် သွက်ဂွံဂစိုတ် လမျီုမၞိဟ်ကီု၊ ဂဗုတ်ပန်ပှော်လဝ် ပ္ဍဲဒၞာဲညးဍုၚ်ကွာန်တအ်ကီု၊ ဂဗုတ်ဂိုၚ်စွံလဝ်လွဟ် ပ္ဍဲတဲ သီုဟၟဲကဵုအခေါၚ်ကီု၊ သီုအခေါၚ်ဟၟဲမွဲသာ် ဂဗုတ်ရပ်လဝ်လွဟ် ပ္ဍဲဒၞာဲဗလးမတ်မၞိဟ်တအ်ရဂှ် ဂွံတီကေတ်ရ။

လိက်ဒုၚ်စဳရေၚ်စၟဳစၟတ်ဂဗုတ် ဒပ်ဗၠာဲသၟိၚ် ပ္ဍဲကဵုဂိတုဒဳဇြေမ်ဗာ စၟတ်တ္ၚဲ (၂၀) ဂှ် ၜိုန်ရပ္တိုန်ထ္ၜးလဝ် ဇရေၚ်နာဲဗ္စာအလဵုအသဳကီုလေဝ် ဟိုတ်နူပ္တိုန်လဝ်တၚ်စောတ်စောဲ စၟဳစၟတ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၃) ကိုပ်ကၠာနူဟွံဂွံခါတ်အကာဲ အကာဲအရာယဲစိုတ်ဏီဂှ်ရ နာဲဗ္စာအလဵုအသဳတအ် ပါဲတးလဝ်ရ။

တၚ်နာဲဗ္စာတအ် ခါတ်အကာဲလဝ်ဂှ်မ္ဂး ပ္တိုန်ထ္ၜးလဝ် ပ္ဍဲဒပ်ဗၠာဲသၟိၚ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၂၁) ဂှ်တုဲ သၟတ်ဏံဂှ် စပ်ကဵုဂဗုတ်စောဲစပ်လဝ် လ္တူညးတေံဂှ်တုဲ ပရေၚ်ကၠိုဟ်ခၠၚ်ဟၟဲကီု သွက်ဂွံထိၚ်ဒဝ်ဒ္ဂေတ်စရိုတ် ဆေၚ်စပ်ကဵုသွာၚ်စိုတ်ဓာတ်ဍေံ ဒှ်ဟွံမာန်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် ပ္ဍဲကဵုလိက်ဒုၚ်စဳရေၚ် နာဲဗ္စာအလဵုအသဳ ပလံၚ်ဗစိုပ်လဝ် ဒပ်ဗၠာဲသၟိၚ်ဂှ်မ္ဂး သၟတ်ကောန်ဒုဟ် သွက်ဂွံလုပ်စိုပ် ဗွိုၚ်သၞောဝ်ဓဝ် ဟွံထေက်ကြိုက်ဏီရဂှ် ဓမံက်ထ္ၜးလဝ်ရ။

Ref: THE NATION/ASIA NEWS NETWORK