ကအ်ကြိက်၊ ဒဳဇြေမ်ဗာ (၃၁)
ကေတ်အာအရေဝ် ကွဳစက် သၠာ ၁၀ လ္ပာ်လ္တူ တတ်ကၠောံအာကၠုၚ် ပ္ဍဲသ္ကုတ်ဂၠံၚ် ထိုအ်ကဝ်ကိုဝ်-ကျဝ်ခိုအ် ဆက်စၠောံလဝ် အကြာကအ်ကြိက်-ဗြဝတဳ တွဵုရးကရေၚ် မဒှ်ဂၠံၚ်သ္ကုတ် ကူသာန်ဗၞိက် သေံ-ဗၟာ ၜါကၟိန်ဍုၚ်ရောၚ်ဂှ် ကံၚ်ဇြဳၜိုဟ်လလံကရေၚ် PC လလောၚ်တြးပ္တိတ်လဝ် အမိၚ်ရ။
ညံၚ်ကွဳစက်သၠာ ၁၀ လ္ပာ်လ္တူ ဟွံဂွံတတ်ကၠောံအာကၠုၚ် ပ္ဍဲသ္ကုတ်ဂၠံၚ် ထိုအ်ကဝ်ကိုဝ်-ကျဝ်ခိုအ်ဂှ် ၜိုန်ရတာဒၞာ ပ္တိတ်လဝ်လိက် အတိုၚ်တၚ်သ္ဂုတ်သွာတ် ကဝ်မတဳပရေၚ်ညဳသၟဟ် ဒပ်ရပ်လွဟ်ကောန်ဂကူကရေၚ် ပ္ဍဲကဵုဂိတု ဒဳဇြေမ်ဗာ စၟတ်တ္ၚဲ (၉) ဂှ်ကီုလေဝ် လ္ပာ်သၟာကွဳစက်တအ် ဒ္ဂေတ်ဗက်လဝ်ဟၟဲရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ကွဳစက်တောဲ ပါလုပ်သီုယာဉ်ပ္ဍိုက်ဗၞိက် ယာဉ်ကွဳစက် သၠာ ၁၀ လ္ပာ်လ္တူလ္ၚဵုတအ်ဂှ် ဟွံသ္ပရှ်ေသှ်ေဒ္ဂေတ်ဗက် ပ္ဍဲလ္တူတၚ်ဆေဝ်တာ အခေါၚ်အာကၠုၚ်တရဴဂှ်တုဲ ဟိုတ်နူအာကၠုၚ်ဒၟံၚ် နကဵုဓဝ်ကၠိုဟ်ခၠၚ်ဂှ်ရ ဒဒှ်ရဂၠံၚ်ဍာန်၊ ဒဒန် ဃောသိုၚ်ခၞံ လးဒၟံၚ်တအ် ဇီုကပိုက်လီုလာ် ဒှ်ကၠုၚ်ဒၟံၚ် စၟဳစၟတ် ဂွံညာတ်ကေတ်ဒၟံၚ်ရဂှ် ဟီုဂးလဝ်ရ။
ဟိုတ်ဂှ် သ္ပတံနူ ဂိတုဂျာန္နဝါရဳ စၟတ်တ္ၚဲ (၁) ကၠုၚ်စိုပ်ဂတဏံတုဲ ညံၚ်ပရေၚ်ကွဳစက် သၠာ ၁၀ သီုယာဉ်သၠာ ၁၀ လ္ပာ်လ္တူတအ် ဟွံဂွံတတ်ကၠောံအာကၠုၚ် ပ္ဍဲဂၠံၚ်သ္ကုတ်ထိုအ်ကဝ်ကိုဝ်-ကျဝ်ခိုအ်ကီု သီုသွက်သ္ဂောံဆက်ကဵုအာသမ္တီ အတိုၚ်တုဲတဴဴကဵုအာဲအရာနွံပၟိက်ဂှ် ဒုဥက္ကဋ္ဌ ကံၚ်ဇြဳၜိုဟ်လလံကရေၚ် KNU/KNLA/PC ဒုသ္ကိုပ်ဗိုလ်ဇၞော် နဝ်ကပဝ်ထူ ထ္ပက်စၟတ်တဲတုဲ ပ္တိတ်လဝ်အမိၚ် ပ္ဍဲဂိတုဒဳဇြေမ်ဗာ စၟတ်တ္ၚဲ (၂၇) ရ။
မၚ်ရံၚ်ကျောဝ်ရပ်စပ်အာ ကွဳစက်သၠာ ၁၀ လ္ပာ်လ္တူတအ် တတ်ကၠောံအာကၠုၚ် ပ္ဍဲဂၠံၚ်သ္ကုတ်ထိုအ်ကဝ်ကိုဝ်-ကျဝ်ခိုအ်ဂှ်တုဲ ကေတ်အာအရေဝ် သၟာကွဳစက် ဟွံဒ္ဂေတ်ဗက်စေဝ်ပၞောန်တအ် ဗွဲမစိုပ်တရဴရောၚ်ဂှ် ညးအုပ်ကာကံၚ်ဇြဳၜိုဟ်လလံကရေၚ် သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အခိၚ်လၟုဟ်ဏံ ဟိုတ်နူသၟာကွဳစက်တအ် ဟွံဒ္ဂေတ်ဗက်စေဝ်ပၞောန်တုဲ ဂၠံၚ်တိဗဝ် ပ္ဍဲသ္ကုတ်ဂၠံၚ်ထိုအ်ကဝ်ကိုဝ်-ကျဝ်ခိုအ်တအ် ဒှ်ကၠုၚ်ခလံက်ကတိုၚ်ကီု၊ ဒဒန်ဟွံအောန်နူ (၃) တၞုၚ် သဝ်စှ်ေအာလဝ်ကီု၊ ဟိုတ်နူအာဒၟံၚ်အရိုဟ်ဒဒှ်တ္ၚဲ ဆက်က်တုဲ ယောၚ်ယာလီုလာ်ကၠုၚ်ဒၟံၚ်ဂှ်ရ ဒးကၠောန်ဒၟံၚ် ပရေၚ်ပလေဝ်ပလေတ်ရဂှ် ဟီုဂးရ၊
ဂၠံၚ်သ္ကုတ်ထိုအ်ကဝ်ကိုဝ်-ကျဝ်ခိုအ်ဂှ် ဟိုတ်နူပေါဲဗတိုက်ၜါလ္ပာ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး ဒှ်ဒၟံၚ် လ္တူဍုၚ်ကအ်ကြိက် တွဵုရးကရေၚ်တအ်တုဲ ဒၟာနူဒးဒုၚ်ပိုၚ်ခြာလဝ် အခေါၚ်တတ်ကၠောံအာကၠုၚ် ပ္ဍဲဂၠံၚ်ဇၞော်အာယှ မဒှ်ဂၠံၚ်ကူသာန်ဗၞိက် သေံ – ဗၟာ ၜါကၟိန်ဍုၚ်အဓိကဂှ်ရ က္လေၚ်သုၚ်စောဲကၠုၚ် ဂၠံၚ်သ္ကုတ်ထိုအ်ကဝ်ကိုဝ်-ကျဝ်ခိုအ်ရ။
ဆ္ဂး ဂၠံၚ်သ္ကုတ်ထိုအ်ကဝ်ကိုဝ်-ကျဝ်ခိုအ်ဂှ် ဟိုတ်နူကွဳစက်ဇၞော် ပ္ဍိုက်နၚ်လဝ်ဗၞိက် လျိုၚ်ဟွံသၟဟ်ကဵုယာဉ်တအ်တုဲ ပရေၚ်ဂၠံၚ်ခက်ခုဲဆိုအ်ဗ က္တဵုဒှ်လဝ်တုဲ ပရေၚ်တရဴလဇုဲလဇတအ် နွံဒၟံၚ်ကီု ယာဉ်ကွဳစက်ဍောတ်တ်တအ် ဒတုံစှ်ေဒၟံၚ်ပ္ဍဲဇြဟ် နွံဒၟံၚ်ရဂှ်ဂွံတီကေတ်ရ။
ဂၠံၚ်သ္ကုတ်ထိုအ်ကဝ်ကိုဝ်-ကျဝ်ခိုအ်ဂှ် နွံဒၟံၚ် ပ္ဍဲတိဍာ်ထိၚ်ဒဝ် ကံၚ်ဇြဳၜိုဟ်လလံကရေၚ် KNU/KNLA/PC မဒှ်ဂကောံရပ်လွဟ်ကောန်ဍုၚ်အရၚ် ကရေၚ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai