နေဗျဳဒဝ်၊ ဖေဖဝ်ဝါရဳ ၁
စၞောန်ပျး သၞောဝ်ဒက်ပ္တန်ဗော်ပရေၚ်ဍုၚ်ကွာန် မပတေၚ်ဂြတ်လဝ် ကုဗော်ပရေၚ်ဍုၚ်ကွာန် လုပ်စိုပ်ပြိုၚ်ပ္ကာန်အာ ပ္ဍဲပေါဲရုဲမာဲ မကၠောန်ဗဒှ်အာဂတဏံတံ ဂွံကြပ်မွဲသၞာံတုဲဂှ် ကံၚ်ဇြဳပၞာန် ကၠောန်သ္ပယှအ်ဖျေံကၠုၚ်ရ။
ပ္ဍဲဂိတုဂျာန္နဝါရဳ ၃၀ ဂှ် သၞောဝ်ဒက်ပ္တန်ဗော်ပရေၚ်ဍုၚ်ကွာန်ဂှ် နဒဒှ်သၞောဝ်ပလေဝ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ထ္ပက်စၟတ်တဲ လ္ဂောံကဵုၝောံပိုဒ် ၄၁၉ သၞောဝ်သ္ဇိုၚ်ဒက်ပ္တန်ဂှ်တုဲ ကလေၚ်စၞောန်ပျးပလေဝ်လဝ် ၝောံပိုဒ်လ္ၚဵုတံဂှ်ရ။
လ္ဂောံကဵုၝောံပိုဒ် ၅ (စ) သၞောဝ်ဒက်ပ္တန်ဗော်ပရေၚ်ဍုၚ်ကွာန် ကံၚ်ဇြဳပၞာန် ပလေဝ်ပလေတ်လဝ်ဂှ်မ္ဂး ဗော်ပ္တိုန်စရၚ် အလုံကၟိန်ဍုၚ်မွဲဂှ်ဝွံ အပ္ဍဲပွိုၚ် ၉၀ တ္ၚဲ စၞးဒးစန်ဒက် ကောန်ဗော်မွဲကိုဋ်ဂှ် ကလေၚ်ပလေဝ်လဝ် ကၠာဂွိုအ်ကၠောန်ဗဒှ်ပေါဲရုဲမာဲ စဵုကဵု ၉၀ တ္ၚဲဂှ် ကောန်ဗော် ၅၀၀၀၀ ဒးနွံဏောၚ် မဒှ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် လ္ပာ်ကံၚ်ဇြဳပၞာန် ယှအ်ဖျေံထောံကဵု တၚ်ကၟာတ်လဒဵုသၞောဝ်တံဂှ်ကီုလေဝ် နကဵုဗော်ပရေၚ်ဍုၚ်ကွာန်ဂမၠိုၚ် ကၠောန်သ္ပပရေၚ်ချဳဒရာၚ်ပေါဲရုဲမာဲတံမာန်ဟွံသေၚ်ပုဟ်ဂှ် သ္ၚဳဂၠိပ်လဝ်ရ။
“ဖအောန်ဖျေံထောံကဵု အရာမခုတ်ပ္တုန်လဝ်တံဂှ်ဟီုတှ်ေ ဍေံတံ (စကစ) ဒဒှ်ရပရေၚ်ချဳဒရာၚ်ပေါဲရုဲမာဲတံ နွံဂှ် မိက်ဂွံထ္မံက်ထ္ၜးဏောၚ်။ ဍာံဍာံတေံ ဗ္ၜတ်ဍေံတံ ဖအောန်ဖျေံကဵုလဝ်တံဂှ်လေဝ် ဗော်ပရေၚ်ဍုၚ်ကွာန်တံ ကၠောန်ပရေၚ်ချဳဒရာၚ်ပေါဲရုဲမာဲ ဟွံမာန်ဏီပုဟ်။ ဆ္ဂး ဗီုပြၚ်ညးပလေဝ်ပလေတ်ဒၟံၚ် သွက်ပေါဲရုဲမာဲဂှ် သွက်ဂွံလလောၚ်တြးအလုံဍုၚ်မွဲမာန် တၚ်ကၟာတ်လဒဵု စပ်ကဵုဗော်ပရေၚ်ဍုၚ်ကွာန်တံဂှ် ဖအောန်ဖျေံကဵုဒၟံၚ်ရ။ ညအ်ဂှ်လေဝ် ပ္ဍဲကဵုဍေံတံဟီုကြဴဒၟံၚ်လၟိုန်ဂှ် ဒှ်တိတ်လက္ကရဴအိုတ်ရဏောၚ် အဲသ္ၚဳဂၠိပ်ကေတ်ရ“ သာ်ဝွံ သ္ဂးရ။
နကဵုကံၚ်ဇြဳပၞာန် အပ္ဍဲသီအဝဵုပွိုၚ်ပိသၞာံဏံ ပ္ဍဲကဵုပရေၚ်ပၞာန်၊ ပရေၚ်ဍုၚ်ကွာန် ကေုာံ ပရေၚ်ကလုတ်တမာန်တံဂှ် ကျကၠုၚ်ဒၟံၚ်တုဲ ဟိုတ်နူပၞာန်ထ္ပက်အလုံဍုၚ်မွဲတုဲ ကရောံဇြဟတ်ဒပ်ဍိုန်လျစှ်ေဂှ် ဒးဗလးလဝ်တဲ သီုကဵု ၃၂ ဍုၚ်ရ။
ပ္ဍဲအကာဲအရာဏံဂှ် ကံၚ်ဇြဳပၞာန်ဂှ် တ္ၚဲကၠောန်ဗဒှ်ကဵုပေါဲရုဲမာဲဂှ် ခုတ်ပ္တန်ကဵုဟွံမာန်ဏီတုဲ သွက်ဂွံပကောံပကေဝ်ဇြဟတ်ကောန်ဗော်တံကဵု သွက်ဂွံပံက်ရုၚ် မစၟတ်လဝ်တံမာန်ဂှ် ပပဵုပ္တိုန်ကဵုအခိၚ်တုဲ ပလေဝ်ကၠုၚ် သၞောဝ်ဒက်ပ္တန်ဗော်ပရေၚ်ဍုၚ်ကွာန်တံဂှ်ရ။
ပ္ဍဲကဵုသၞောဝ်ပလေဝ်ထောံလဝ် ၝောံပိုဒ် ၅ (ဇ) ဂှ် ဗော်စန်ဒက်အာ အလုံဍုၚ်မွဲဂှ်ဝွံ ဒၞါဲဒးပံက်ရုၚ် ပွိုၚ်ဍုၚ်အလုံဍုၚ်မွဲ တဲဍိုန်လၟိဟ်ကဝက်ဂှ် ပလေဝ်ပလေတ်စၞောန်ပျးကၠုၚ် နဒဒှ်ပိဂအုံမွဲဂအုံရ။
ဥက္ကဌ ဗော်ကောန်ဂကူရခေၚ် ဥူတာထောန်လှဂှ် ဆၜိုတ်ဖအောန်ဖျေံထောံကဵုသာ်ဏံဂှ် သွက်ဗော်ကောန်ဍုၚ်အရၚ်ဇြဟတ်ဇၞော် ဖျေံသ္ဇိုၚ်တွဵုရးတံဂှ် မုအခေါၚ်အရာမှ ဂွံကၠုၚ်ဟွံသေၚ်ပုဟ်ဂှ် ဟီုရ။
“ဗော်ကောန်ဂကူရခေၚ်ဟီုဂှ် ဒှ်ဗော်ဂွံလဝ်အခေါၚ်စန်ဒက် အလုံဍုၚ်မွဲဏောၚ်။ အတိုၚ်သၞောဝ်ကံၚ်ဇြဳနစကဂှ်မ္ဂး ဂွံဒတူလိုၚ် နဒဒှ်ဗော်စန်ဒက် အလုံဍုၚ်မွဲဂှ် ဝါတ်ဂါတ်အာယျဏောၚ်။ ဆ္ဂး လၟုဟ်ဆၜိုတ်ဖအောန်ဖျေံထောံကဵု ဇြဟတ်ကောန်ဗော် မသုန်ဠက်၊ ဆန္ဒမာဲ ပိဂအုံမွဲဂအုံဓဝ်ဂှ် သွက်ဗော်ကောန်ဍုၚ်အရၚ် ဇြဟတ်ဇၞော် ဖျေံသ္ဇိုၚ်တွဵုရးတုဲ ချဳဒရာၚ်ဒၟံၚ်ဂှ် မုအခေါၚ်အရာမှ ဂွံကၠုၚ်ဟွံသေၚ်ပုဟ်ဂှ် အဲမိက်ဂွံဟီုရ” သာ်ဝွံ သ္ဂးရ။
ဗော်ကောန်ဂကူရခေၚ်ဝွံ ဟိုတ်နူသၞောဝ်ဒက်ပ္တန်ဗော်ပရေၚ်ဍုၚ်ကွာန် ကံၚ်ဇြဳပၞာန် မစၞောန်ပျးလဝ်ဂှ်တုဲ အာတ်ပ္တိုန်လဝ်စရၚ် နဒဒှ်ဗော်ဂွံအခေါၚ်စန်ဒက်ကဆံၚ်တွဵုရးတုဲ ဒဵုကဵုအခိၚ်လၟုဟ် အခေါၚ်ဒက်ပ္တန်ဗော် ဟွံစှ်ေဏီရ။
ကံၚ်ဇြဳပၞာန်ဝွံ စနူအခိၚ်ပ္တိတ်ဇြဟတ် သွက်ဂွံသီအဝဵုကၟိန်ဍုၚ် နကဵုဇြဟတ်လွဟ်လက်နက်တုဲ ဒဵုကဵုအခိၚ်လၟုဟ် ရေၚ်တၠုၚ်လၟေၚ်ကမၠောန်အဓာန်ဂတတေံတုဲမ္ဂး ကၠောန်ဗဒှ်ပေါဲရုဲမာဲတုဲ သွက်ဂွံလှဲပအပ်အဝဵု ကုဗော်ဂွံအဝဵုဂှ် ကညာၚ်ကမြေဲဒၟံၚ်လၟိုန်ရ။
ဗော်ပရေၚ်ဍုၚ်ကွာန်တံဂှ်လေဝ် သွက်ဂွံလုပ်ပြိုၚ် ပ္ဍဲပေါဲရုဲမာဲ မကၠောန်ဗဒှ်အာတံမာန်ဂှ် ပ္ဍဲဂိတုဂျာန္နဝါရဳ ၂၆ သၞာံတုဲကၠုၚ်တေံ ကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်ဂှ် စၞောန်ပျးလဝ် သၞောဝ်ဒက်ပ္တန်ဗော်ပရေၚ်ဍုၚ်ကွာန်ရ။
စၞောန်ပျးသၞောဝ်ဏံတုဲ ခြာဟွံလအ်ဂှ် လလောၚ်ပ္တိတ်နဲဥပဒေတုဲ နကဵုညးမိက်ဂွံဒက်ပ္တန်ဗော်ပရေၚ်ဍုၚ်ကွာန်ဂမၠိုၚ် အပ္ဍဲပွိုၚ် ၆၀ တ္ၚဲ သွက်ဂွံကၠုၚ်စိုပ်အာတ်ပ္တိုန်လဝ်ဂှ် ကမ္မယှေန်ပေါဲရုဲမာဲ သၞာံ ၂၀၂၃ ဂိတုဂျာန္နဝါရဳ ၃၁ တေံ ကဵုသမ္တီလလောၚ်ပ္တိတ်လဝ်ရ။
ကြဴနူဂှ်တုဲ ဗော်ပရေၚ်ဍုၚ်ကွာန် အာတ်ပ္တိုန်လဝ်စရၚ် ကေုာံ အခေါၚ်ဒက်ပ္တန်ဗော်တံဂှ် စဵုကဵု ၆၀ ပြၚ် နွံတုဲ ဗော်ပရေၚ်ဍုၚ်ကွာန် ၄၀ ပြၚ် ဟွံကၠုၚ်စိုပ်အာတ်ပ္တိုန်အခေါၚ်ဒက်ပ္တန်ဗော် ဇရေၚ်ကံၚ်ဇြဳပၞာန်တံဂှ် နဒဒှ်ဗော်ဂှ် လီုအာအလဵုအလဵုဍေံရောၚ် လလောၚ်တြးလဝ်ရ။
အတိုၚ်ၝောံပိုဒ် (၁၉) ပ္ဍဲကဵုသၞောဝ်ဗော်ပရေၚ်ဍုၚ်ကွာန် ကံၚ်ဇြဳပၞာန် ကလေၚ်ပလေဝ်လဝ်တံဂှ်မ္ဂး ဟွံကလေၚ်ပ္တိုန်စရၚ်မွဲသာ် ဗော်ပရေၚ်ဍုၚ်ကွာန် ဒးဒုၚ်စၟတ်ကေတ် ဒဒှ်ရလီုအာ နူကဵုနဒဒှ်ဗော်ပရေၚ်ဍုၚ်ကွာန်တံဂှ်ဝွံ ကပေါတ်ဗော်ပိုၚ်ပြဳတံဂှ် သီဂိုၚ်အာ နဒဒှ်ကၟိန်ဍုၚ်ပိုၚ်ဏောၚ် သ္ဂးရ။
စပ်ကဵုကိစ္စလ္တူဏံတုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ဇရေၚ်ညးဒုၚ်တာလျိုၚ် ဂအုပ်ဗော်ဒဳမဝ်ကရေဇြဳကောန်ဍုၚ်အရၚ်သေံ SNLD ဟွံကလေၚ်ပ္တိုန်လဝ်စရၚ် ဇရေၚ်ကံၚ်ဇြဳပၞာန်ဂှ်ကီုလေဝ် ဟွံဂွံလဝ်အဆက်ရ။
အခိၚ်လၟုဟ် နူကဵုကမ္မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ခါန်ကၞက်ဂှ် ပၞောဝ်ကဵုဗော်ပ္တိုန်လဝ်စရၚ် ကေုာံ ပ္တိုန်လဝ်အခေါၚ်ဒက်ပ္တန်ဗော်ဂမၠိုၚ်ဂှ် ဖျေံကဵုလဝ်အခေါၚ်ဒက်ပ္တန်ဗော် နဒဒှ်ဗော်ပရေၚ်ဍုၚ်ကွာန်ဂှ် ၄၅ ဗော်မဒှ်ရ။
ပရိုၚ်−သြၚ်လောန်တို(မ်)
ဗီု−