မတ်မလီု၊ ဖေဖဝ်ဝါရဳ ၂၇
ကြဴနူၚုဟ်ထဝ် သၠုၚ်တိုန်ကၠုၚ်ၜက်အာသၞောတ်ဗ္ၜတ်တုဲဂှ် အပ္ဍဲဗွဝ်ဖျာမတ်မလီု ညံၚ်ဂွိုအ်သွံတြးထဝ်ဒကောၚ် (မဳဠေန်) တံဂှ် လ္ပာ်ကံၚ်ဇြဳပၞာန် ကၟာတ်လဒဵုလဝ်ရောၚ် ဂွံတီကေတ် အတိုၚ်ဂလာန်တၠကမၠောန်ထဝ်တံရ။
ထဝ်တံ တတ်ကၠောံပယျဵုလုပ်စိုပ်ကၠုၚ် ဟွံလုပ်ကဵုသၞောဝ်ကီု၊ အပ္ဍဲဒေသ ထဝ်လုပ်ထဝ်တိတ် တၞဟ်ခြာဒၟံၚ်နွံသၟးဟွံက ညံၚ်ၚုဟ်ထဝ်ဂွံသၠုၚ် ကၠောန်ၜိုတ်ဒၟံၚ်ဏောၚ် နကဵုတၚ်စောတ်စောဲတံဏံဂှ် ကၟာတ်လဒဵုလဝ် အခေါၚ်သွံရာန်တံရ။
အခိၚ်လၟုဟ်ဂှ်လေဝ် ပါလုပ်သီုကဵု (စသုံးလုံး) ဂှ် ဂကောံပံၚ်ကောံ ဌာနကံၚ်ဇြဳပၞာန်နာနာတံ အရိုဟ်ဒဒှ်တ္ၚဲ ကော်စၟဳတ်ဒၟံၚ် တၠဆေၚ်ထဝ်တံကဵု ကောန်လိၚ်နွံဒၟံၚ်ပ္ဍဲဆေၚ်တံရ။
ပ္ဍဲအရာစၟဳတ်သာ်ဏံဂှ်လေဝ် လ္ပာ်ကံၚ်ဇြဳပၞာန် အကာဲအရာသွံတြးထဝ် အပ္ဍဲဆေၚ်လၟေၚ်တ္ၚဲဂှ်ကီု၊ စနူကဵုအကာဲအရာ ထဝ်လုပ်ထဝ်တိတ် သောဲသောဲဗြောဲဗြောဲတံဂှ် စၟဳတ်သၟာတ်သၟုက်ဒၟံၚ်တံ ကၠောန်ဒၟံၚ်တုဲ ကော်စၟဳစၟတ်ဒၟံၚ် ဂၠိုၚ်ၚ်ကဵုဝါ နွံဒၟံၚ်ဂှ် ဂွံတီကေတ်ရ။
ၜိုန်ရကၟာတ်လဒဵုလဝ် အခေါၚ်သွံထဝ်ဒကောၚ်တံဂှ်ကီုလေဝ် ၁၄ ၜဲ၊ ၁၅ ၜဲ ကေုာံ ထဝ်သေံတံဂှ် ကဵုလဝ်အခေါၚ်သွံရောၚ် တၠကမၠောန်ထဝ်တံ ဟီုရ။
ဟိုတ်နူကံၚ်ဇြဳပၞာန် ကၟာတ်လဒဵုလဝ် အခေါၚ်သွံရာန်ထဝ်ဒကောၚ်တံဂှ်တုဲ အပ္ဍဲဗွဝ်ဖျာ ၚုဟ်ထဝ်တၞဟ်သ္အာၚ်တံလေဝ် ဆက်သၠုၚ်တိုန်ကၠုၚ်တုဲ ပရေၚ်သွံရာန်စှ်ေကၠုၚ်တီတီဂှ် သ္ဂးရ။
တ္ၚဲဏံ ပ္ဍဲဂိတုဖေဖဝ်ဝါရဳ ၂၆ ဂှ် ပ္ဍဲဗွဝ်ဖျာထဝ်ဂၠးတိ ၚုဟ်ထဝ် ကလေၚ်စှ်ေကၠုၚ်ညိညကီုလေဝ် ဗွဝ်ဖျာအပ္ဍဲဍုၚ်ဂှ် ထဝ်ဒကောၚ်(မဳဠေန်) မွဲဒကေဝ် ၚုဟ်သၠုၚ်တိုန်ဒၟံၚ် စဵုကဵု ၃၉ ကိုဋ် ၅ ဠက်ဒ္ကေဝ်ရ။
ၚုဟ်ထဝ်အပ္ဍဲဍုၚ်ဝွံ အပ္ဍဲကာလသီအဝဵုဏံ လ္ပာ်ကံၚ်ဇြဳပၞာန် ဟိုတ်နူပ္တိတ်ကၠုၚ်ဇြဟတ် သွက်ဂွံထိၚ်ဒက် ဗွဝ်ဖျာထဝ်ဂှ်ကီု၊ ဟိုတ်နူမူဝါဒဗၠေတ်တ်တံဂှ်တုဲ ၚုဟ်ထဝ်ဟွံညိၚ်ဝတ်တံ က္တဵုဒှ်ဒၟံၚ်လၟေၚ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ