ဘာပန်၊ ဖေဖဝ်ဝါရဳ ၂၇
ပ္ဍဲတိဍာ်ထိၚ်ဒက်ခရိုၚ်ဘာပန် ဗော်သွးကောန်ဂကူကရေၚ် KNU ဂှ် ဗ္ဒိုပ်ဒပ်ဗျူဟာမဝ်ဖူ ကံၚ်ဇြဳပၞာန် ကၠုၚ်စိုပ်ဖျေံလဝ်ဒပ် ဗ္ဒါဲ ၃၀ သၞာံ ထောံလသာဂြိပ်ဒဴအာ အတိုၚ်ဗ္ဒိုပ်မွဲဂှ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ KNU ကဵု ဂကောံဒပ်ဒရုၚ် FFD တံရ။
ဗ္ဒိုပ်ဒပ်မဝ်ဖူ မဒှ်ဗ္ဒိုပ်ဗျူဟာ ဒပ်ကံၚ်ဇြဳပၞာန် ခမရ ၃၄၉ ဂှ်ဝွံ ပ္ဍဲဂိတုဖေဖဝ်ဝါရဳ ၂၅ အခိၚ်နူဂယး ၜိုတ် ၆ နာဍဳဂှ် ထောံလသာဗ္ဒိုပ်တုဲ ဆုတ်ကလေၚ်အာ ပ္ဍဲဗ္ဒိုပ်ဒပ်ကူခိုဝ် မၞုံအပ္ဍဲဂကောံကွာန် ဖလာတ်ခိုဝ် ပွိုၚ်ဍုၚ်လူတဝ် ခရိုၚ်ဘာပန်ရ။
ဗ္ဒိုပ်မဝ်ဖူ ထောံလသာဗ္ဒိုပ် ဂြိပ်တိတ်အာဂှ်ဝွံ ဒှ်ဗ္ဒိုပ်ဗျူဟာ ကံၚ်ဇြဳပၞာန် ၜက်ၜေတ်တိဍာ်တုဲ ကၠုၚ်စိုပ်ဖျေံလဝ်ဒပ် ပ္ဍဲတိဍာ် KNU ပွိုၚ် ၂၇ သၞာံမွဲရောၚ်ဂှ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ KNU ထ္မံက်ထ္ၜးလဝ်ရ။
ပ္ဍဲကဵုတိဍာ်ဒပ်မဟာ ၅ ခရိုၚ်ဘာပန် KNU ဂှ် တုဲကၠုၚ်ပ္ဍဲဂိတုဖေဖဝ်ဝါရဳ ၁၀ ကဵု ၁၁ တေံ ဗ္ဒိုပ်လေဝ်ကလေ ကေုာံ ဗ္ဒိုပ်ကျူလူ ကံၚ်ဇြဳပၞာန် ၂ ဗ္ဒိုပ် ထောံလသာဂြိပ်ဒဴတုဲ ကလေၚ်ဆုတ်အာ လ္ပာ်ဗ္ဒိုပ်ဗျူဟာမဝ်ဖူ ဂွံၜိုတ်ဘာ်ဂိတုဂှ် နူဗ္ဒိုပ်ဗျူဟာမဝ်ဖူ ထပ်ဆုတ်ကလေၚ်အာ လ္ပာ်ဗ္ဒိုပ်ဒပ်ကူခိုဝ်ရ။
စနူဂိတုဖေဖဝ်ဝါရဳ ၁၇ တုဲကၠုၚ်တေံတုဲ ဒပ်ဒရုၚ် FFD ထောံမဗုမ် ၄၀ မပြၚ် နကဵုဒရုၚ် ကုဗ္ဒိုပ်မဝ်ဖူကံၚ်ဇြဳပၞာန် သၟဝ်ပၠတရဴပရေၚ်ပၞာန် ဒပ်ပၞာန်ဗၠးၜးကောန်ဂကူကရေၚ် KNLA ဂှ်တုဲ လ္ပာ်ဒပ် KNLA လေဝ် ကဵုဇြဟတ်ဂရိုဟ်ဗ္တိုက်လဝ် နကဵုသနာ်ပါဂှ် Force for Federal Democracy – FFD လလောၚ်ပ္တိတ်လဝ်ရ။
ကဵုဇြဟတ်ဂရိုဟ်ပရေၚ်ပၞာန် ကုဗ္ဒိုပ်မဝ်ဖူတုဲ ဂွံမွဲသတ္တာဟဂှ် ကောန်ဂကောံဒပ်ကံၚ်ဇြဳပၞာန် ဇြဟတ်ၜိုတ် ၄၀ ဂှ်ဝွံ ဟွံဂံၚ်ဆက်မံၚ် ပ္ဍဲဗ္ဒိုပ်ဂှ်ရတုဲ ဟိုတ်နူဆုတ်ကလေၚ်အာတုဲ လုပ်စိုပ်ပသောၚ်ၚးတးတိဍာ်ဂှ် သီဂွံလဝ် မဗုမ် ၆၀ မမ ၜိုတ် ၆၀ မ ကေုာံ မာၚ် (ရှေ့ထွက်မိုင်း) ၃ မဂှ် ဂွံတီကေတ် အတိုၚ်တၚ်လလောၚ်တြးရ။
ဂကောံဒပ်ပံၚ်ကောံ KNLA တံ ထပိုတ်လဝ် ဂၠံၚ်တရဴပလံၚ်ဗစိုပ်ဇွောံမဗလးတိ ကေုာံ ဍာ်သုၚ် ကုဗ္ဒိုပ်ဒပ်ကံၚ်ဇြဳပၞာန် မၞုံအပ္ဍဲခရိုၚ်ဘာပန်တံ ဗွဲမလအ်လဂှ်ကီု၊ ဟိုတ်နူပန်ပှော်ဗ္တိုက်ဒၟံၚ်ဗ္ဒိုပ် အရိုဟ်ဟ်တ္ၚဲတုဲ ပ္ဍဲသၞာံ ၂၀၂၄ ဏံ ဗ္ဒိုပ်ကံၚ်ဇြဳပၞာန် ဟွံအောန်နူကဵု ၃ ဗ္ဒိုပ် ထောံလသာဂြိပ်ဒဴအာလဝ်ရ။
အတိုၚ်ဂလာန် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳဂှ်မ္ဂး စနူသၞာံ ၂၀၂၃ တုဲကၠုၚ်တေံတုဲ ဒပ်ကံၚ်ဇြဳပၞာန်တံဝွံ ထ္ပက်ကရောၚ်ပၞာန်ဗလးတိတံ ကၠောန်ဟွံမာန်ရတုဲ နူကဵုဗ္ဒိုပ် ဟွံဂံၚ်တိတ်မ္ၚးရတုဲ စိုပ်အာကဆံၚ်ပၞာန်ဒုၚ်ယျဂှ် ဂွံတီကေတ်ရ။
အတိုၚ်တၚ်နၚ် ဂကောံဗော်သွးကရေၚ်တံဂှ်မ္ဂး အပ္ဍဲကာလသီအဝဵုဏံ အပ္ဍဲတိဍာ် KNU ဒးဒုၚ်ဗ္တိုက်သီတံကဵု ဗ္ဒိုပ်ဒပ်ကၚ်ဇြဳပၞာန် ထောံလသာဂြိပ်ဒဴအာတံ ဟွံအောန်နူကဵု ၇၀ နွံဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြးရ။
ပရိုၚ်−သြၚ်လောန်တိုၚ်(မ်)
ဗီု−FFD