ကောန်ထံၚ်ပရေၚ်ဍုၚ်ကွာန် ၃ တၠ ဒးဒုၚ်ကၟာတ်တိုက် ပ္ဍဲထံၚ်ကျာ်မြဟ်ဂှ် ထပ်ဒးဒုၚ်ဖျေံစၟတ် ဒဏ်ထံၚ်ပပဵုပ္တိုန်ပၠန်

ကျာ်မြဟ်၊ မာတ် (၃)

ကောန်ထံၚ်ပရေၚ်ဍုၚ်ကွာန် ၃ တၠ ဒးဒုၚ်ကၟာတ်လဝ်တိုက် နကဵုတၚ်စောဲစပ် ဂွံဆဵုကေတ်ဖုၚ် ပ္ဍဲကဵုထံၚ်စာတ်ကျာ်မြဟ် တွဵုရးဍုၚ်မန်ဂှ် ကံၚ်ဇြဳပၞာန် ထပ်ပပဵုပ္တိုန်လဝ် ဒဏ်ထံၚ် မၞိဟ်မွဲတၠ ၆ ဂိတုဂှ် ညးမစုက်လုက်ကဵု ကောန်ထံၚ်ပရေၚ်ဍုၚ်ကွာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဂျာန္နဝါရဳ ၂၈ တေံ ဂကောံပံၚ်ကောံကံၚ်ဇြဳပၞာန်တံ ကၠုၚ်စိုပ်စၟဳတ်ဂၠိုက်ဂၠါဲလဝ် ထံၚ်ကျာ်မြဟ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ်တုဲ ဂွံဆဵုကေတ်လဝ်ဖုၚ် ပ္ဍဲကဵုကောန်ထံၚ်ပရေၚ်ဍုၚ်ကွာန် ၃ တၠဂးတုဲ ပ္ဍဲဂိတုဖေဖဝ်ဝါရဳ ၄ တၠဂှ် ရပ်ဒက်ၜုၚ်တက်တုဲ ကၟာတ်လဝ်တိုက်ရ။

သက်သဳဟွံခိုၚ်ကၠိုက်မွဲသာ် စပ်ကဵုရပ်ဒက်ၜုၚ်တက် ကၟာတ်လဝ်တိုက် ကောန်ထံၚ်ပရေၚ်ဍုၚ်ကွာန် ၃ တၠဂှ်တုဲ ပပ္တံနူကဵုဂိတုဖေဖဝ်ဝါရဳ ၆ ဂှ် ကောန်ထံၚ်ပရေၚ်ဍုၚ်ကွာန် ဗ္ဒါဲ ၅၀ အေၚ်ပုၚ်ထ္ၜးဆန္ဒ အာတ်မိက်လဝ်တုဲ ပ္ဍဲဂိတုဖေဖဝ်ဝါရဳ ၁၁ ဂှ် ပရေၚ်အာတ်မိက်ကောန်ထံၚ်ပရေၚ်ဍုၚ်ကွာန်တံ အံၚ်ဇၞးလဝ်ရ။

ဗွဲကြဴဂှ် ကံၚ်ဇြဳပၞာန်ဝွံ ကောန်ထံၚ်ပရေၚ်ဍုၚ်ကွာန် ဒးဒုၚ်ကၟာတ်လဝ်တိုက် ၃ တၠဂှ် ပ္ဍဲဂိတုဖေဖဝ်ဝါရဳ အပ္ဍဲသတ္တာဟတတိယဂှ် ထပ်ဖျေံစၟတ်လဝ်ဒဏ်ထံၚ် မၞိဟ်မွဲ ၆ ဂိတု ဟိုတ်နူဖံက်စေဝ်ပၞောန်ထံၚ် မဒှ်ရ။

အတိုၚ်ဂလာန် ညးမစုက်လုက်ကဵု ကောန်ထံၚ်ပရေၚ်ဍုၚ်ကွာန်တံဟီုဂှ်မ္ဂး ကောန်ထံၚ်ပရေၚ်ဍုၚ်ကွာန် ဒးဒုၚ်ဖျေံစၟတ်ဒဏ်ထံၚ် ၆ ဂိတုစၟအ်အ်တံဂှ်ဝွံ သွက်ဒုဟ်ဒဏ်တံဏံဂှ် ဂွံအာအခေါၚ်ဖအောန်ဖျေံကဵုဒုဟ်ဒဏ်တံ ဟွံသေၚ်ပုဟ်ဂှ် ဂွံတီကေတ်ရ။

ပ္ဍဲထံၚ်ကျာ်မြဟ်ဂှ် ဒပ်ကံၚ်ဇြဳပၞာန် ထ္ၜးဟိုတ်နာနာ ရပ်ဒက်လဝ်တုဲ ကောန်ထံၚ်ပရေၚ်ဍုၚ်ကွာန် ဒးဒုၚ်ဖျေံစၟတ်လဝ်ဒဏ်ထံၚ်တံဂှ် ဟွံအောန်နူကဵု ၄၀၀ နွံဒၟံၚ်ရောၚ် ဂွံတီကေတ် အတိုၚ်ဂလာန် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ကောန်ထံၚ်ပရေၚ်ဍုၚ်ကွာန်တံရ။

ပရိုၚ်−သြၚ်လောန်တိုၚ်(မ်)

ဗီု−Social Media