ပ္ဍဲမတ်မလီု ရပ်ဒက်သၟတ်တံတုဲ ပ္ကောံပ္ကေဝ်ကၠုၚ်ကောန်ပၞာန်တံ နွံကၠုၚ်

မတ်မလီု၊ မာတ် ၃

ပ္ဍဲတွဵုရးဍုၚ်မန် လ္တူဍုၚ်မတ်မလီု ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ်တံ ထ္ၜးဟိုတ်နာနာ ရပ်ဒက်ဒၟံၚ် ညးသၟတ်တံတုဲ ပ္ကောံပ္ကေဝ်ကၠုၚ်ကောန်ပၞာန်တံ နွံကၠုၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ်တံဝွံ ၜိုတ်အခိၚ်ဇိုၚ်သဝ်တ္ၚဲတှ်ေ ထ္ၜးဟိုတ်ပရေၚ်ဂီုကၠီုတုဲ စၟဳတ်ဒၟံၚ်ဒၞါဲပြးဇးတုဲ ရပ်ဒက်ဒၟံၚ်သၟတ် နွံဒၟံၚ်လ္တူဂၠံၚ်တံ ဗီုနွံပၟိက်ရ။ 

သၟတ်ဒးဒုၚ်ရပ်တံဂှ် ကော်ဏာ ပ္ဍဲဗ္ဒိုပ်ပ္ကောံပ္ကေဝ်ကောန်ပၞာန် ဗ္ဒါဲတိုက်ထ္ၜးပျးယေန်သၞာၚ်မန် ဍုၚ်မတ်မလီုဂှ်တုဲ ရဲကဵုလှုဲမာန်တံဂှ် ကလေၚ်ဗလးကဵုနွံဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။

အတိုၚ်ဂလာန်ညးမစုက်လုက်ကဵု သ္ၚိကၟိန်ဂြောဝ်ဂတာ ဒးဒုၚ်ရပ်စပ်တုဲ ကဵုလှုဲတုဲ ဗၠးစဴကၠုၚ် နူကဵုဒဒှ်မပ္ကောံပ္ကေဝ်ကောန်ပၞာန်ဂှ်မ္ဂး ညးသၟတ်မွဲတၠမ္ဂး အာတ်မိက်ဒၟံၚ် အောန်အိုတ် နူ ၄ ကိုဋ်ဒ္ကေဝ် စဵုကိုဋ်ကဵုစှော် နွံဒၟံၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ကောန်ၚာ်ၜါတၠဂှ် ၜိုတ်ဗ္တံ ၈ နာဍဳ ၉ နာဍဳညိကီု ရဲသ္ၚိ စကာဏာ ကဵုရာန်ကပေါတ်မွဲမွဲသာ်။ ဍေံတံကလေၚ်စဴကၠုၚ် ပ္ဍဲကဵုဒၞါဲ(မီးပွိုင့်) အထက စၟတ် (၆) ဂှ် ကော်စၟဳတ်ဒၟံၚ်ဍေံတံ။ စၟဳတ်တုဲ ကော်သၟာန်ဖုၚ်တံမုတံတုဲ ဗ္ဒါဲတိုက်ထ္ၜးပျးယေန်သၞာၚ်မန် လက္ကရဴဂှ်ဂှ် ဒၞါဲပ္ကောံကောန်ပၞာန်နွံဒၟံၚ်။ ကော်ဏာကောန်ၚာ်ၜါဂှ်တုဲ ကဵုဂ္ဇအ်ဒၟံၚ်။ ကၠာဍေံတံဂွိုအ်စိုပ်ဂှ် ၜိုတ် (၁၀) တၠ နွံဏောၚ်။ ကဵုပရိုၚ်ရဲသ္ၚိတုဲ ရဲသ္ၚိတံဗက်အာ တ္ၚဲယးတ္ၚဲတၟးဂှ် မွဲတၠဂှ် ဒးနုက်ပ္တိတ်လဝ် နကဵု ၄ ကိုဋ်။ ကဵုလှုဲဟွံမာန်တှ်ေ ဒှ်သဘဴဂွံကော်အာဂှ်နွံဏောၚ်။ မၞိဟ်ကဵုလှုဲတံဂှ် ကလေၚ်ဗၠးကၠုၚ်ရ” သာ်ဝွံ သ္ဂးရ။

လ္ပာ်ကံၚ်ဇြဳပၞာန်တံ စွံပွန်ရပ်ဒက်ကၠုၚ် ညးသၟတ်တံ သွက်ဂွံလုပ်ပၞာန်ဂှ်ကီု၊ ရပ်ဒက်ဘပဠ အာတ်ဒၟံၚ်လှုဲတံဂှ်တုဲ အကြာညးဍုၚ်ကွာန်ဒေသတံဂှ် ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရ။

ညးသၟတ်ဒေသမွဲတၠဂှ် ကံၚ်ဇြဳပၞာန် ဟိုတ်နူပ္ကောံပ္ကေဝ်ကၠုၚ် ကောန်ပၞာန်တံ အပ္ဍဲအခိၚ်မဍန်ဂၠေံတံမာန်ဂှ်ရ နကဵုညးသၟတ်တံ အာဍုၚ်သ္အာၚ်ကီု ဟွံသေၚ်မ္ဂး အာစိုပ် ပ္ဍဲတိဍာ်ဇြဟတ်ပၠန်ဂတးတံကီုဂှ် ဒးဖျေံသ္ဂုတ်သွာတ်ရဏောၚ် ဟီုရ။

“အပ္ဍဲအခိၚ်ဍန်န်ဂၠေံဂၠေံဏံလေဝ် ဍေံတံကၠောန်မာန်တုဲ ၜိုတ်ဂိတုမေ၊ ဂျောန်၊ ဂျူလိုၚ် ဂိတုတံဏံဂှ်လေဝ် အရာဍေံတံကၠောန်ဂှ် နွံဒၟံၚ်တၟာဂလိုၚ်ဏီဏောၚ်။ အေ ဂှ်တှ်ေ ပ္ဍဲကဵုသၟတ်ပိုယ်တံဂှ် သ္ဇက်ဂွံရုဲစှ်ဂှ် နွံၜါသာ်ရဏောၚ်။ မွဲဂှ် ဒၞါဲတိဍာ်ဗၠးၜး။ ဥပမာအာဍုၚ်သ္အာၚ်ဟာ ဟွံသေၚ်မ္ဂး အာပ္ဍဲတိဍာ် ဂကောံဇြဟတ်ပၠန်ဂတး မဆေၚ်စပ်တံ နွံဂှ်ဟာ။ မွဲပၠန်ဂှ် အဲမိက်ဂွံကဵုဒှ်ဂှ်တှ်ေ ပံၚ်တောဲကဵုဂကောံဇြဟတ်ပၠန်ဂတးဏံတုဲ ပိုယ်တံ သွက်ဂွံဗ္တိုက်ပ္တိတ် စကစဏံရဏောၚ်။ ညအ်ဂှ် ဒှ်နဲကဲခိုဟ်အိုတ်ရဏောၚ်ဂှ် အဲမိက်ဂွံဟီုကဵု ညးသၟတ်တံရ” သာ်ဝွံ သ္ဂးရ။

ဒပ်ကံၚ်ဇြဳပၞာန် ကေုာံ ဂကောံဒပ်ဗၠာဲသၟိၚ်တံ စွံပွန်ရပ်စပ်ကၠုၚ် ညးသၟတ်တံ နွံမာန်ဂှ်ရ အခိၚ်ဗ္တံ စနူ ၈ နာဍဳတုဲ မၞိဟ်တိတ်မ္ၚးအာကၠုၚ် အပ္ဍဲဍုၚ်ဂှ် ယအ်စှ်ေကၠုၚ် တီတီဂှ် ဂွံတီကေတ် အတိုၚ်ဂလာန်ညးဒေသတံရ။

မွဲလ္ပာ်ပၠန်ဂှ် ဌာနမဆေၚ်စပ်သၟဝ်တဲကံၚ်ဇြဳပၞာန်တံဂှ် နကဵုသၟတ်ဒေသ မၞုံအပ္ဍဲတွဵုရးဍုၚ်မန်တံ သွက်ဂွံလုပ်ပၞာန် ပ္ဍဲကံၚ်ဇြဳပၞာန်ဂးတုဲ စနူဂိတုဖေဖဝ်ဝါရဳ ၂၂ တုဲကၠုၚ်တေံတုဲ ပ္ဍဲကဵုဒၞါဲမၞိဟ်ဂၠိုၚ်တံ စဵုကဵုအပ္ဍဲသ္ၚိဒၟံၚ် အပ္ဍဲအရာပ်တံဂှ် ဗက်တြးဒၟံၚ်လိက်အုပ်တြးဝါဒတံရ။

ပ္ဍဲကဵုလိက်အုပ်သၟတ်တြးဝါဒဂှ် စပ်ကဵုသၞောဝ်ယိုက်ဂၠေၚ်လျိုၚ်ပၞာန်တုဲ ညးဍုၚ်ကွာန်တံ လ္ပဂွိၚ်ဂှ်ကီု၊ တိုန်စိုပ်ဘာပၞာန်တုဲမ္ဂးလေဝ် ပ္ဍဲကဵုဒေသ ဆန္ဒမၞုံတံဂှ်ဟေၚ် ဒးကေတ်လျိုၚ်သၟးဟွံက သီုကဵုကလိဂွံ သြန်ဂိတု ကေုာံ အခေါၚ်ဒုၚ်စသိုၚ်တံဏောၚ်ဂးတုဲ တြးဒၟံၚ်ဝါဒတံ နွံဒၟံၚ်ရ။

အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်မ္ဂး ဇၟာပ်ကောန်ဍုၚ် အဝဲစိုပ်တုဲတံဂှ် ဗွဲတွဵုမအောန် နူ ၂ သၞာံ စဵုကဵု ၅ သၞာံ ဒးကေတ်လျိုၚ်ဏောၚ်တုဲ ယဝ်ရဟွံယိုက်ဂၠေၚ်လျိုၚ်ပၞာန်မ္ဂး သၠုၚ်အိုတ် ဖျေံစၟတ်ဒဏ်ထံၚ် စဵုကဵု ၅ သၞာံမာန်ဂှ် စၞောန်ပျးလဝ်ရ။

အခိၚ်လၟုဟ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ သၟတ်အပ္ဍဲဒေသဗွဲမဂၠိုၚ်ဝွံ မ္ၚးနူကဵုဍုၚ်သေံဂှ် တိတ်စ္ဍးဒၟံၚ် ဍုၚ်မကြပ်တံကဵု တိဍာ်ဗၠးၜးတံ နကဵုလၟိဟ်ဗွဲမဂၠိုၚ်ဂၠေၚ်ရ။

သၞောဝ်ယိုက်ဂၠေၚ်လျိုၚ်ပၞာန်ဂှ်ဝွံ စၞောန်ပျးလဝ် ပ္ဍဲသၞာံ ၂၀၁၀ လက်ထက်ဥူတာန်ယှိုဲ တၠအဝဵုပၞာန်တြေံဂှ်တုဲ က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်ဂှ် စနူဂိတုဖေဖဝ်ဝါရဳ ၁၀ တုဲကၠုၚ်တေံတုဲ အဝဵုစတန်အာဏောၚ်ဂှ် လလောၚ်တြးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ