လွိုၚ်ကဝ်၊ မာတ် ၃
ပ္ဍဲတွဵုရးကရေၚ်ဍာဲ စနူဒပ်ပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳ ၁ ဂှ်တုဲ စဵုကဵုသၞာံဏံ ဂိတုဂျာန္နဝါရဳ အပ္ဍဲပွိုၚ်ပိသၞာံ ကောန်ဒပ်ပၠန်ဂတး ဗ္ဒါဲ ၅၀၀ ဒးပြဟ်လလုဲအာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံဇြဟတ်ညးဍုၚ်ကွာန်ကရေၚ်ဍာဲ PKPF ရ။
ကောန်ဒပ်ပၠန်ဂတးကရေၚ်ဍာဲတံဝွံ ပ္ဍဲသၞာံ ၂၀၂၁ ဂှ် ၄၁ တၠ၊ သၞာံ ၂၀၂၂ ဂှ် ၁၇၀ တၠ၊ သၞာံ ၂၀၂၃ ဂှ် ၂၂၈ တၠ ကေုာံ သၞာံ ၂၀၂၄ ဏံ ၅၀ တၠ အပံၚ်ဖအိုတ် ၄၈၉ တၠ ဒးပြဟ်လလုဲအာလဝ်ရ။
ကောန်သ္ဂံၚ်ပြဟ်လလုဲအာတံဝွံ နူကဵုဂကောံပၠန်ဂတး မံက်ဂတဝ်ကၠုၚ် ကြဴနူဒပ်ပၞာန်သီအဝဵုတုဲတံဂှ်လေဝ် ပါလုပ်တုဲ မၞိဟ်ပြံၚ်ကၠုၚ်လ္ပာ် နူကဵုပၞာန်ပျဳတုသေတ်တံကဵု ဂကောံရပ်လွဟ် နွံဒၟံၚ်ကၠာတေံ တုဲတုဲဂှ်လေဝ် ပါလုပ်ရ။
ကောန်သ္ဂံၚ်ဗွဲမဂၠိုၚ်ဝွံ ဟိုတ်နူကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ နကဵုမခတိုဟ် ၅၀၀ ပံၚ်ဂှ်ကီု၊ ပန်ပှော်ကဵုလွဟ်ဇၞော်တံသၟးဟွံက ဟိုတ်နူမာၚ်တိုပ်တိတံတုဲ ဒးပြဟ်လလုဲအာလဝ်ရ။
အတိုၚ်စရၚ် PKPF တံဂှ်မ္ဂး အပ္ဍဲပွိုၚ်ပိသၞာံ ပ္ဍဲကဵုတွဵုရးကရေၚ်ဍာဲဂှ် ပေါဲဗ္တိုက်အပံၚ် က္တဵုဒှ်လဝ် စဵုကဵု ၉၈၅ ဝါတုဲ ကံၚ်ဇြဳပၞာန် ပန်ပှော်ဗ္တိုက်လဝ် နကဵုက္ၜၚ်ကျာ စဵုကဵုပွဳပွူ ၁၃၀၀ ဝါရ။
ပ္ဍဲသၞာံ ၂၀၂၃ ဂှ် ပေါဲဗ္တိုက်က္တဵုဒှ်ဂၠိုၚ်လဝ်ရောၚ် ပ္ဍဲစရၚ်ဂမၠိုၚ် ထ္မံက်ထ္ၜးလဝ်တုဲ က္ၜၚ်ကျာကံၚ်ဇြဳပၞာန် ၂ ဖ္ဍိုက်ဂှ် ဒပ်ပၠန်ဂတးတံ ပန်ဖျေံလဝ်တုဲ သီုကဵုကွဳစၚ်ခြပ်ပသဲပါလုပ်ဂှ် ယာန်အရပ်စပ်ပၞာန် ၆၈ ဖ္ဍိုက်လေဝ် ပလီုပလာ်လဝ်မာန်ဂှ် ဂွံတီကေတ်ရ။
အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန် ၃၁၃၃ တၠ ချိုတ်အာလဝ်ရောၚ် ဂွံတီကေတ်တုဲ ပ္ဍဲဗလးတိဏံ လၟိဟ်ဂၠိုၚ်နူဏံမာန်ဂှ် ကောန်သ္ဂံၚ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ် အပ္ဍဲတွဵုရးကရေၚ်ဍာဲ ဒေသမေဝ်သေအ်၊ ယှာတဝ်၊ မဝ်ချဳ ကေုာံ ဒေသယဲတေတ်တံဂှ် လ္ပာ်ဒပ်ပၠန်ဂတးတံ ထိၚ်ဒက်လဝ်သီုဖအိုတ်တုဲ လ္ပာ်ဒဳမအ်သဵု၊ ဖရူသဵု ကေုာံ လွိုၚ်ကဝ်တံဂှ်တှ်ေ လုပ်ဒၟံၚ်ပေါဲဗ္တိုက်သီဍုၚ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNDF