ဘာပန်၊ မာတ် (၅)
အပ္ဍဲဂိတုဖေဖဝ်ဝါရဳပွိုၚ်မွဲဂိတုတုဲကၠုၚ်တေံ ပ္ဍဲကဵုခရိုၚ်ဘာပန် KNU ဟိုတ်နူဒပ်ပံၚ်ကောံမဟာမိတ် ကေုာံ KNLA တံ ဗိုၚ်ဗ္တိုက်လဝ်တုဲ ဗ္ဒိုပ်ဒပ်ကံၚ်ဇြဳပၞာန် ထောံလသာလဝ် ၃ ဗ္ဒိုပ်ဂှ် ဒပ်မဟာ ၅ လလောၚ်ပ္တိတ်လဝ်ရ။
ဒပ်ပံၚ်ကောံမဟာမိတ်တံဂှ် ဟိုတ်နူထပိုတ်လဝ် ဂၠံၚ်တရဴဒပ်ကံၚ်ဇြဳပၞာန် ချဳဒရာၚ်ကရောၚ်ပၞာန်တံ၊ ဂၠံၚ်တရဴပလံၚ်ဗစိုပ်ဇွောံမစၞစတံ၊ ဂၠံၚ်ကၟံက်ဍာ်သုၚ်ဍာ်လွပ်တံ အရိုဟ်ဟ်တ္ၚဲဂှ်ရ ဗ္ဒိုပ်ဒပ်ကံၚ်ဇြဳပၞာန် ၃ ဗ္ဒိုပ် ဒးထောံလသာဂြိပ်ဒဴလဝ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ဗ္ဒိုပ်ဒပ်ကံၚ်ဇြဳပၞာန် ထောံလသာဗ္ဒိုပ်ဂြိပ်တိတ်အာတံဂှ်ဝွံ ပ္ဍဲဂိတုဖေဖဝ်ဝါရဳ ၁၀ ဂှ် ဗ္ဒိုပ်(လယ်ကလေးကျိုး) ၊ ပ္ဍဲဂိတုဖေဖဝ်ဝါရဳ ၁၁ ဂှ် ဗ္ဒိုပ်ကျူလူ ကေုာံ ပ္ဍဲဂိတုဖေဖဝ်ဝါရဳ ၂၅ ဂှ် ဗ္ဒိုပ်မဝ်ဖူဗျူဟာတံ မဒှ်ရ။
ကောန်ဒပ်ကံၚ်ဇြဳပၞာန်တံ ဒးထောံလသာအာဗ္ဒိုပ်တံဂှ်ဝွံ ဟိုတ်နူဒပ်ပံၚ်ကောံမဟာမိတ် KNLA တံ ဗိုင်ဗ္တိုက်လဝ် လၟေၚ်တ္ၚဲဂှ်တုဲ ကောန်ဒပ်ကံၚ်ဇြဳပၞာန်တံ ဒှ်ဒဒိုက် စိုတ်ဓာတ်စှ်ေကၠုၚ်ဂှ် KNU သ္ဂးရ။
ဗ္ဒိုပ်ကောန်ဒပ်ကံၚ်ဇြဳပၞာန်တံ ထောံလသာအာတံဂှ် အခိၚ်ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပံၚ်ကောံမဟာမိတ်တံ လုပ်စိုပ်ၚးတးတိဍာ်ဂှ် သီဂွံလဝ် လွဟ်လက်နက်မကမ် ကေုာံ မာၚ်တံရ။
ပ္ဍဲခရိုၚ်ဘာပန် KNU ဂှ် အပ္ဍဲဂိတုဖေဖဝ်ဝါရဳမွဲဂိတု အကြာဒပ်ကံၚ်ဇြဳပၞာန်ကဵု ဒပ်မဟာ ၅ KNLA တံဂှ် ပေါဲဗ္တိုက် က္တဵုဒှ်လဝ် ၈၆ ဝါတုဲ လ္ပာ်ကံၚ်ဇြဳပၞာန် ၂၅ တၠ ပြဟ်လလုဲတုဲ ၄၅ တၠ ဇီုကပိုက်ကလိဂွံလဝ်ဝပ်ဂှ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ ခရိုၚ်ဘာပန် KNU ရ။
အပ္ဍဲပွိုၚ်မွဲဂိတုဂှ်ဂှ် ပ္ဍဲကဵုကွာန် ဒၞါဲညးဍုၚ်ကွာန်ဒေသတံ မံၚ်တန်တဴတံဂှ်ကဵု ပ္ဍဲကမၠောန်ဝါဗ္ၚတံဂှ် နကဵုတၚ်ရန်တၟံနွံနွံ ဒပ်ကံၚ်ဇြဳပၞာန် ပန်ပှော်စုတ်လဝ် လွဟ်ဇၞော် ၉ မတုဲ ညးဍုၚ်ကွာန်ကောန်အရာပ် ၂ တၠ ချိုတ်အာလဝ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−KNU