လ္ဂုၚ်၊ မာတ် ၅
အပ္ဍဲကာလသီအဝဵုဏံ ဟိုတ်နူကောန်ရဲတဝ်ခွါဒပ်ပၞာန်တံ ပကီုပရာပ်စပ်ကဵုလိၚ် လ္တူညးဗြဴတံဂှ်တုဲ ညးဗြဴဒးဒုၚ်သ္ပအဓမ္မ ဒးဒုၚ်ပြိုက်ဂစိုတ်တံဂှ် သ္ပဒတန်ဂွံလဝ် စဵုကဵု ၁၄ တၠရောၚ် ဂွံတီကေတ် နူကဵုဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ရ။
အတိုၚ်စၟတ်သမ္တီ AAPP တံဂှ်မ္ဂး ပ္ဍဲကဵုဒးဒုၚ်ပြိုက်ဂစိုတ်တံဂှ် သ္ပအဓမ္မတုဲ ဂစိုတ်ဂယိုၚ်လဝ် ဟွံသေၚ်မ္ဂး ပြိုက်ဂစိုတ်တုဲ ဒးဒုၚ်သ္ပလဝ်အဓမ္မဂှ် ပါလုပ်သီုကဵုသၟတ်ဗြဴသၟဝ်အာယုက် ၁၈ သၞာံပိတၠဂှ် မၞိဟ်ဗြဴ စဵုကဵု ၁၄ တၠ နွံလဝ်ရ။
သ္အာၚ်နူဂှ်ပၠန် ပ္ကောံပ္ကေဝ်လဝ်တၚ်နၚ်တၞဟ်ခြာ ဒးသ္ပဒတန်ဒၟံၚ်ဏီ သၟတ်ဗြဴသၟဝ်အာယုက် ၁၈ ဒးဒုၚ်သ္ပအဓမ္မတုဲ ဒးဒုၚ်ဂစိုတ်လဝ် ၜါတၠပါလုပ်ဂှ် မၞိဟ်ဗြဴဒ္စါံတၠ နွံဒၟံၚ်ရောၚ် ထ္မံက်ထ္ၜးလဝ် ပ္ဍဲကဵုစၟတ်သမ္တီတံရ။
ညးတာလျိုၚ် ဂကောံ AAPP မွဲတၠဂှ် နတဲဏံ ဂၠိုၚ်နူဏံမာန်တုဲ အပ္ဍဲကာလသီအဝဵုဏံ ဂကောံပၞာန်တံဝွံ ကလိလောန်ကၠုၚ်ဒၟံၚ် အမှုရာဇဝတ်ပၞာန်တံကဵု ဒုဟ်ဒဏ်လ္တူဂကူမၞိဟ်တံ မံက်က်ထေၚ်ၚ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ညအ်ဂှ် တန်တဴကဵုတၚ်နၚ်စိုပ်ကၠုၚ်ဇရေၚ်ပိုယ်တံတုဲ မ္ဒးဟီုလဝ်ရ။ တၚ်နၚ်သှ်ေဒၟံၚ်ဒၞါဲတၞဟ်ဟ်တံဂှ် လၟိဟ်ဂၞန်ဂၠိုၚ်နူဏံ နွံမာန်ဏောၚ်။ ဂွံအောန်အာဂှ် ဟွံမွဲပုဟ်။ ပ္ဍဲဗလးတိဏံတှ်ေ သာဂၠိုၚ်ကၠုၚ်မာန်ဏောၚ်။ အပ္ဍဲကာလပၠန်ဂတးဏံ သ္ပအဓမ္မကီု ပွပကီုပရာပ်စပ်ကဵုလိၚ်တံဂှ် ဂကောံပၞာန်ဏံ ကလိလောန်ဒၟံၚ် အဆက်က်ဏောၚ်။ ညအ်ဂှ် အတိုၚ်တၚ်စၞောန်ပျး ရုၚ်ရာဇဝတ်ဍုၚ်နာနာတံဂှ်မ္ဂး ကလိလောန်ဒၟံၚ် အမှုရာဇဝတ်ပၞာန်ကဵု ဒုဟ်ဒဏ်လ္တူဂကူမၞိဟ်တံဏောၚ်ဟီုဂှ် ပိုယ်တံ မ္ဒးသ္ၚဳဂၠိပ်ဏာရ။ အေ ဂှ်တှ်ေ ကလိလောန်ဒၟံၚ် အမှုရာဇဝတ်ဍုၚ်နာနာတံ မံက်က်ထေၚ်ၚ်ဏောၚ်” သာ်ဝွံ သ္ဂးရ။
စနူအခိၚ်သီအဝဵုတုဲ ညးဗြဴ၊ ကောန်ၚာ်သၟတ်၊ ညးစိုတ်လိၚ်နွံတၞဟ်ခြာ ပါလုပ်သီုကဵုမၞိဟ်တြုံတံဂှ် ဒးဂဗဒၟံၚ် ပွပကီုပရာပ်စပ်ကဵုလိၚ် နူကောန်ပၞာန်သၟဝ်တဲကံၚ်ဇြဳပၞာန်၊ ဗၠာဲသၟိၚ်၊ သၞာဲဒဴက္ဍိုက်ပ်ထံၚ်စာတ် ကေုာံ ကောန်ရဲတဝ်ခွါကံၚ်ဇြဳပၞာန်တံ အလုံဍုၚ်မွဲ သ္ကာတ်တ်မြဟ်ဟ်ရ။
ညးလ္ၚဵုတံဂှ်တှ်ေ ဒးဒုၚ်ပကီုပရာပ် စဵုကဵုလမျီုအိုတ်တုဲ နကဵုညးတၠခန္ဓဒးဒုၚ်စသိုၚ် သှ်ေဂျိုၚ်တဴဒၟံၚ်တံ ကေုာံ ဂြောဝ်ဂတာညးတံ ဒးဒုၚ်စသိုၚ်ဇီုကပိုက်တဴ သီုစိုတ်သီုကာယတုဲ ပ္ဍဲအရာကလေၚ်ဒက်ပ္တန် ဘဝပရေၚ်မၞိဟ်တံဂှ်လေဝ် ဒးရုန်ဂ္စါန်တတ်ထ္ပာ်ဒၟံၚ် တၚ်ကော်ဆဴတံရောၚ်ဂှ် AAPP သ္ဂးရ။
နာန်မိုအ်မိုအ် ညးအုပ်ကာနာနာ ဂအုပ်ဂကောံညးဗြဴ WLB ဂှ် သွက်ဂွံကလိဂွံဓဝ်ဍာံ သွက်ညးဗြဴဒးဒုၚ်ပကီုပရာပ်တံကဵု ဂြောဝ်ဂတာသှ်ေၜက်တံဂှ် သီုညးဖအိုတ် ဒးပူဗိုၚ်ကၠောန်အာညးသ္ကအ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နကဵုဂကောံညးဗြဴပိုယ်တံ ဗွဲတၟေၚ် သွက်ဂွံဂွံဗဗွဲဓဝ် သွက်ညးဗြဴဒးဒုၚ်ပကီုပရာပ်တံ သွက်ဂြောဝ်ဂတာသှ်ေၜက်ဒၟံၚ် မဒးဂိအာလဝ်တံဂှ် ပိုယ်တံဒးဂိုတ်ဂ္စါန်ဏောၚ်။ မွဲလ္ပာ်ပၠန်ဂှ်လေဝ် မၞိဟ်ကလိလောန်ဒုဟ်တံဂှ် ညံၚ်ပရေၚ်ဒုၚ်လျိုၚ် ကေတ်လျိုၚ်ဂွံနွံ ဒးကဵုဒုဟ်ကေတ်အရေဝ်ဏောၚ်။ ဆ္ဂး မွဲလ္ပာ်ဂှ်ပၠန် ပ္ဍဲအရာကၠောန်ကၠုၚ်သာ်ဏံဂှ် နကဵုဂကောံညးဗြဴတံ ကၠောန်ဂှ်တှ်ေ ဒှ်ကိစ္စတုဲဒှ်အာဟွံသေၚ်ပုဟ်။ ကိစ္စအံၚ်ဇၞးအာလေဝ် ဟွံသေၚ်ပုဟ်။ ဣဏံဂှ် သီုညးဖအိုတ် နွံပၟိက်ဒးဘိုၚ်ကၠောန်ၜိုတ်အာညးသ္ကအ်ဏောၚ်။ ဗွဲတၟေၚ် အခိၚ်ဒှ်ကၠုၚ်သာ်ဏံတှ်ေ သွက်ညးဗြဴဒးပြဟ်လလုဲအာ ဒးဆောံလေၚ်အာတံဂှ် နူကဵုညးဍုၚ်ကွာန်တံ ဒးကေတ်ကဵုဗဗွဲဏောၚ်” သာ်ဝွံ သ္ဂးရ။
ကောန်ဒပ်ကံၚ်ဇြဳပၞာန်တံဝွံ ပ္ဍဲကဵုဒေသထ္ပက်ကၠုၚ်ကရောၚ်ပၞာန်တံဂှ် သ္ပအဓမ္မ ကုညးဗြဴအရာပ်တံဂှ်တုဲ ပြိုက်ဂစိုတ်ထောံ ဓဇန်ဓဇန် ပြဝဏံသၟးဟွံက ပ္ဍဲလၟေၚ်ဒဒှ်မွဲဂှ်မ္ဂး ဒးဒုၚ်သ္ပအဓမ္မတုဲ ပ္ဍဲကဵုအၚ်္ဂဇာတ်မၞိဟ်ဗြဴ ဒးဒုၚ်ဂစိုတ်ဂှ် သိက်စုတ်လဝ်အရာဝတ္ထု ပြဝဓဇန်ကြံကြတံဂှ် ကလိလောန်လဝ်ရောၚ် ထ္မံက်ထ္ၜးလဝ်ရ။
မွဲလ္ပာ်ဂှ်ပၠန် အပ္ဍဲထံၚ်စာတ်တံဂှ် နကဵုတၚ်ထ္ၜးဟိုတ်ပရေၚ်ဂီုကၠီုဂှ် ပ္ဍဲကဵုဗ္ဒမ်ကောန်ထံၚ်ဗြဴဗြဴတံ မံၚ်တံဂှ် သၞာဲဒဴတံ စုတ်ကမ္မရာဂီုကၠီုတုဲ မၚ်ရံၚ်ဒၟံၚ်ကောန်ထံၚ်ပရေၚ်ဍုၚ်ကွာန် ဗြဴဗြဴတံ လၟိုန်တုဲ ပွမဟီုဂးဆက်ဆောံ ညံၚ်စိုတ်သ္ဂောံဒှ်ပလာပ်ပထုဲ စပ်ကဵုလိၚ်တံဂှ်လေဝ် နွံဒၟံၚ်ရ။
သ္အာၚ်နူဂှ်ပၠန် ပွမၜုၚ်တက် ညံၚ်သိက္ခာဂွံလီု၊ ပကီုပရာပ်စပ်ကဵုလိၚ်၊ ဂတမတ်မၞိဟ် သ္ပပွဆက်ဆောံစပ်ကဵုလိၚ် အရာဟွံသ္ဍိုက်မၠိုက်တံဂှ်ကီု၊ အပ္ဍဲအၚ်္ဂဇာတ် ကေုာံ အပ္ဍဲဝစ္စမဂ်တံဂှ် ဂၠံက်နကဵုတဲ ဂၠိုက်ဂၠါဲစၟဳတ်တုဲ ဘပဠဂဍိုက်ဂဝ မပါလုပ် ဍဵုဍိုက်ဒၟံၚ် နဲကဲစုၚ်ဇဳဂှ် AAPP သ္ဂးရ။
ဂကောံပၞာန် မကလိလောန်ဒၟံၚ် အမှုရာဇဝတ် ဗွဲမဓဇန်ကြမ်ကြသာ်ဏံဂှ် လ္ဂောံကဵုသၞောဝ်ဍုၚ်သ္အာၚ် သွက်ဂွံကေတ်အရေဝ် ဗွဲမစိုပ်တရဴမာန် AAPP ဖ္တိုက်ဖ္အောဝ် ဗွိုၚ်ဍုၚ်သ္အာၚ်တံရ။
နူစပၞာန်သီအဝဵု စဵုကဵုဂိတုဖေဖဝ်ဝါရဳသၞာံဏံ အလုံဍုၚ်မွဲ ကံၚ်ဇြဳပၞာန် ရပ်ဒက်လဝ် ညးဗြဴ ၅၄၀၀ ပြၚ် နကဵုဟိုတ်ပရေၚ်ဍုၚ်ကွာန်တုဲ မၞိဟ်ဗြဴ ၈၀၀ ပြၚ်ဂှ်လေဝ် ပြိုက်ဂစိုတ်လဝ်ဂှ် ထ္မံက်ထ္ၜးလဝ် ပ္ဍဲကဵုစၟတ်သမ္တီ AAPP ရ။
ပရိုၚ်−သြၚ်လောန်တိုၚ်(မ်)
ဗီု−Social Media