မတ်မလီု၊ မာတ် ၅
စၟအ်ကောန်ဍုၚ်အဝဲစိုပ်တုဲ ဒးယိုက်ဂၠေၚ်လျိုၚ်ပၞာန်ဏောၚ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်တုဲ သၟတ်ဟွံမိက်လုပ်ပၞာန် ၄၀၀ ပြၚ် လုပ်စိုပ်ကၠုၚ် ဇရေၚ်ခရိုၚ်သဓီု KNU ဂှ် ညးဒုၚ်တာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၞောဝ်ယိုက်ဂၠေၚ်လျိုၚ်ပၞာန် မစၞောန်ပျးလဝ် ပ္ဍဲသၞာံ ၂၀၁၀ လက်ထက်ဥူတာန်ယှိုဲ တၠအဝဵုပၞာန်တြေံဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ပ္ဍဲဂိတုဖေဖဝ်ဝါရဳ ၁၀ တုဲကၠုၚ်တေံ စဂယိုၚ်ပ္တိုန်လဝ်ရ။
လလောၚ်တြး ဒဒှ်ရပၠောပ်လမျီုသၞောဝ်ယိုက်ဂၠေၚ်လျိုၚ်ပၞာန်တုဲ အပ္ဍဲကြပ်ပွိုၚ်မွဲဂိတုဂှ် သၟတ်အလုံဍုၚ်မွဲ သွက်ဂွံလုပ်စိုပ် ပ္ဍဲခရိုၚ်သဓီု KNU ဗော်သွးကောန်ဂကူကရေၚ်ဂှ် ၆၀၀ တၠပြၚ်ကေတ်လဝ်အဆက်တုဲ ပ္ဍဲကဵုဏံ ညးသၟတ် ၄၀၀ ပြၚ် စိုပ်ကၠုၚ်ယျဂှ် ဂွံတီကေတ်ရ။
သၟတ်လုပ်စိုပ်ကၠုၚ်တံဂှ် ထိၚ်ဒဝ်ရံၚ်စံၚ်လဝ်ကဵု အတိုၚ်အစဳဇန်ခရိုၚ်သဓီု KNU တုဲ လက္ကရဴ ရီုဗၚ်ရေၚ်တၠုၚ်အာကဵု အတိုၚ်ဆန္ဒညးတံဏောၚ်ဂှ် ညးဒုၚ်တာလျိုၚ် PDF ခရိုၚ်သဓီု ကိုဝ်အေမေန်ထောန် ဟီုရ။
“စၟဳစၟတ်ဒၟံၚ်ဖိုဟ်ရ။ တိုန်တန်ဗ္တောန်ဟာ၊ ပ PDF ဟာ၊ အတိုၚ်ဏံ ဟွံမိက်ယိုက်ဂၠေၚ်လျိုၚ်ပၞာန်တုဲ ကၠုၚ်ဇူဒီုဟာ။ ဂြောဝ်ဂတာဆုဲပြံၚ်တံလေဝ် ပါကၠုၚ်လဝ်ကီုဏောၚ်တှ်ေ။ ဗီုတံဏံဂှ်တှ်ေ ဒးစၟဳတ်ဒၟံၚ်ချိုတ်တ်ပၠိုတ်တ်ရ။ ဗီုလဵုဂွံကၠောန်ရောဟီုဂှ် ပိုယ်တံ ချပ်ဂၞန်ကဵုဂကောံဗော်သွးနွံဒၟံၚ်အဏံတုဲ အတိုၚ်ဗီုပြၚ်ဍေံတံမိက်ဂွံဒှ် ဒးကၠောန်ကဵုဏောၚ်။ ဗွဲမဂၠိုၚ်ဂှ်တှ်ေ ညးကၠောန်သွက်ပၠန်ဂတး သာဂၠိုၚ်ဏောၚ်ဂှ် ထေၚ်ကေတ်ရ” သာ်ဝွံ သ္ဂးရ။
သၟတ်လုပ်စိုပ်ကၠုၚ် ပ္ဍဲခရိုၚ်သဓီု KNU ဂှ်ဝွံ ကေတ်နၚ်အဆက် နူကဵုဇြဟတ်ဒပ်ပၠန်ဂတးတံတုဲ လုပ်စိုပ်ကၠုၚ်တုဲ ပ္ဍဲကဵုဏံ မၞိဟ်တြုံဗွဲမဂၠိုၚ် ပါလုပ်ဒၟံၚ်တုဲ ညးဗြဴပါလုပ် ၜိုတ် ၂ တၟံကၠံ နွံဒၟံၚ်ရောၚ် ဂွံတီကေတ်ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်မ္ဂး မၞိဟ်တြုံ နူအာယုက် ၁၈ စဵုကဵု ၄၅ သၞာံ၊ မၞိဟ်ဗြဴ နူအာယုက် ၁၈ စဵုကဵု ၃၅ သၞာံ၊ အောန်အိုတ် နူ ၂သၞာံ စဵုကဵု ၅ သၞာံ ဒးယိုက်ဂၠေၚ်လျိုၚ်ပၞာန်ဏောၚ် မဒှ်ရ။
ကံၚ်ဇြဳပၞာန်ဂှ် လၟေၚ် (၁) ယိုက်ဂၠေၚ်လျိုၚ်ပၞာန်ဂှ် အတးလောန်မ္ဂး စအာဏောၚ် ကဵုလဝ်သမ္တီတုဲ မွဲမွဲလၟေၚ် မၞိဟ် ၅၀၀၀ ၊ မွဲသၞာံ မၞိဟ် ၆၀၀၀၀ ဂွံကော်အာ အစဳဇန်နွံရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ညးသၟတ်တံဝွံ လုပ်စိုပ်ပ္ဍဲဒပ်ပၠန်ဂတးတံကီု၊ နူကဵုဂၠံၚ်လုပ်သၞောဝ်သၟးဟွံက နူကဵုဂၠံၚ်ဓလုက်တံဂှ်လေဝ် တိတ်အာဒၟံၚ် ဍုၚ်သ္အာၚ်တံ ဍုၚ်သေံတံ နကဵုလၟိဟ်ဗွဲမဂၠိုၚ်ဂၠေၚ်ရ။
ဇြဟတ်ဒပ်ပၠန်ဂတး ပါလုပ်သီုကဵုဗော်သွးကောန်ဂကူကရေၚ် KNU ဂှ် အလုံညးဍုၚ်ကွာန်မွဲ ဒစဵုဒစး သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်အိုတ်တုဲ သွက်ဂွံလုပ်စိုပ်ကၠုၚ် ပ္ဍဲဒပ်ပၠန်ဂတးတံဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− PDF ခရိုၚ်သဓီု