မတ်မလီု၊ မာတ် ၆
ပ္ဍဲဍုၚ်ဗၟာ အပ္ဍဲကာလသီအဝဵုပေၚ်ပိသၞာံဏံ ပွိုၚ်ဍုၚ် လလောၚ်တြးလဝ် ပရေၚ်အုပ်ဓုပ်ပၞာန် နွံကၠုၚ် စဵုကဵု ၆၁ ပွိုၚ်ဍုၚ်ဂှ် ဂွံတီကေတ် အတိုၚ်တၚ်လလောၚ်တြး ဂကောံသုတေသန Data for Myanmar ရ။
အတိုၚ်တၚ်လလောၚ်တြး ပရေၚ်အုပ်ဓုပ်ပၞာန် ကံၚ်ဇြဳပၞာန်ဂှ်မ္ဂး ပ္ဍဲသၞာံ ၂၀၂၁ ဂှ် ၈ ပွိုၚ်ဍုၚ်၊ ပ္ဍဲသၞာံ ၂၀၂၃ ဂှ် ၄၈ ပွိုၚ်ဍုၚ် ကေုာံ ပ္ဍဲသၞာံ ၂၀၂၄ ဂှ် ၅ ပွိုၚ်ဍုၚ် လလောၚ်တြးလဝ် နဒဒှ်ပရေၚ်အုပ်ဓုပ်ပၞာန်ရ။
ပ္ဍဲကဵုဏံ ပ္ဍဲဂိတုမာတ် ၄ တေံ ပွိုၚ်ဍုၚ်မာန်တုၚ်၊ နသာန် ကေုာံ နာမ္မတူ တွဵုရးသေံ မလလောၚ်တြးလဝ် နဒဒှ်ပရေၚ်အုပ်ဓုပ်ပၞာန်ဂှ်ဝွံ အပ္ဍဲပရေၚ်ပၞာန် ၁၀၂၇ ဂှ် ဒှ်ပွိုၚ်ဍုၚ် ဒပ်ပၞာန်ဗၠးၜးကောန်ဂကူတအာၚ် TNLA တံ သီဂွံလဝ်တံရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန်၊ ပရေၚ်ပၞာန်တံဂှ် လ္ပာ်ကံၚ်ဇြဳပၞာန် လလောၚ်တြးပရေၚ်အုပ်ဓုပ်ပၞာန် ကုပွိုၚ်ဍုၚ် ၃ ပွိုၚ်ဍုၚ် နူကဵု TNLA မသီဂွံလဝ်တံဂှ်ဝွံ ဒဒှ်ရလလောၚ်တြး ကလေၚ်ဗ္တိုက်ပၞာန်ဒှ်မာန်ဂှ် သ္ၚဳဂၠိပ်ဟီုဂးဒၟံၚ်တံ နွံဒၟံၚ်ရ။
အတိုၚ်စရၚ်လၟိဟ်မၞိဟ်သ္ဂါဗ္တံ ၂၀၁၄ ဂှ်မ္ဂး ပ္ဍဲဍုၚ်ဗၟာ ပွိုၚ်ဍုၚ် ၃၃၀ နွံဒၟံၚ်ဂှ် ပ္ဍဲကဵုပွိုၚ်ဍုၚ် ၆၁ ပွိုၚ်ဍုၚ် ကံၚ်ဇြဳပၞာန် လလောၚ်တြးလဝ်ပရေၚ်အုပ်ဓုပ်ပၞာန်ဂှ် မၞိဟ်သ္ပဒတဴ ၈ ဒဿမ ၂ ပြကောဋိကိုဋ်နွံဒၟံၚ်ရောၚ် ဂွံတီကေတ်ရ။
ပ္ဍဲကဵုပွိုၚ်ဍုၚ် လလောၚ်တြးလဝ် ပရေၚ်အုပ်ဓုပ်ပၞာန်တံဂှ် ကဵုလဝ်အခေါၚ်အုပ်ဓုပ်၊ စဳရေၚ်ဂဗုတ် ကုသ္ကိုပ်ရးပၞာန် ကံၚ်ဇြဳပၞာန်တံ ပေၚ်ၚ်တုဲ အခေါၚ်ဂွံအာတ်ဒုၚ်ဂုဏ်လေဝ် ဟွံမွဲတုဲ ဖျေံစၟတ်ဒုဟ်ဒဏ်သၠုၚ်အိုတ် စဵုကဵုဒဏ်ဂစိုတ်ဂွံဒၟံၚ်ရောၚ် မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media