ထဝါဲ၊ မာတ် ၆
ဟိုတ်နူဒပ်အမၠံက်ကံၚ်ဇြဳပၞာန် ပ္ဍဲကွာန်ဇဟာ ပွိုၚ်ဍုၚ်ထဝါဲ ခရိုၚ်ထဝါဲ ရးတၞၚ်သဳ ဒးဒုၚ်လုပ်စိုပ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ၄ တၠ ချိုတ်အာလဝ်ဂှ် ဂွံတီကေတ် ဇရေၚ်ဒပ်ပၞာန်ဗထူရ။
တုဲကၠုၚ် ပ္ဍဲဂိတုမာတ် ၃ အခိၚ်ဇိုၚ်သဝ်တ္ၚဲ ၅ နာဍဳ ဒပ်ပၞာန်ဗထူ လုပ်စိုပ်ဗ္တိုက်လဝ် ဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ကွာန်ဇဟာဂှ် နကဵုလွဟ်ဇၞော်၊ လွဟ်ဍောတ်ရ။
ဟိုတ်နူပရေၚ်ဗ္တိုက်ဂှ်တုဲ ပေါဲဗ္တိုက်လလအ်ပွိုၚ် ၁၅ မိနေတ် က္တဵုဒှ်လဝ်တုဲ ကောန်ဒပ်ကံၚ်ဇြဳပၞာန် ၄ တၠ ချိုတ်အာလဝ်တုဲ မၞိဟ်ဇီုကပိုက်ကလိဂွံလဝ်ဝပ်တံလေဝ် နွံဂှ် ညးဒုၚ်တာလျိုၚ်လလောၚ်ပရိုၚ် ဒပ်ပၞာန်ဗထူ ကောန်သ္ဂံၚ်ထက်မျာတ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ၜိုန်ရပန်ပှော်လဝ် နကဵုလွဟ်ဇၞော်၊ လွဟ်ဍောတ်ကြာန်န် ဟွံပိုတ်သ္ကုတ်ကီုလေဝ် ဒပ်ပၞာန်ဗထူဂှ် ဇီုကပိုက်ကလိဂွံဝပ် ဟွံမွဲပုဟ်ဂှ် သ္ဂးရ။
ပ္ဍဲဂိတုမာတ် ၄ တေံဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် နူကဵုဒပ်အမၠံက်ဇဟာဂှ်တုဲ ဒတုံဗ္တိုဟ်ထ္ကးအာလဝ် အပ္ဍဲအရှာံကျာ် (မရှၚ်ဓာတ်ဝဲ) ကွာန်(မောၚ်မယ်ရှောၚ်) ဂှ်တုဲ ဇီုကပိုက်ဒးအာလဝ် စမြိုၚ်ဘာလကျာ်တံဂှ်ကဵု ညးဍုၚ်ကွာန်ကောန်အရာပ် ၂ တၠ ကလိဂွံလဝ်ဝပ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲဂိတုဖေဖဝ်ဝါရဳ ၂၉ တုဲကၠုၚ်တေံဂှ်လေဝ် သၞေဟ်ကၚ်စၟဳတ် (ဘုရားမဲ) ကွာန် (မောၚ်မယ်ရှောၚ်) ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် ၅ တၠ ချိုတ်တုဲ သီဂွံလဝ် သေနာတ် ၂ ဇကိုအ် ကဵု လွဟ်လက်နက်မကမ်တံဂှ် ဒပ်ပၞာန်ဗထူ လလောၚ်ပ္တိတ်လဝ်ရ။
ပရိုၚ်−သြၚ်လောန်တို(မ်)
ဗီု−ဒပ်ပၞာန်ဗထူ