ရေဝ်၊ မာတ် ၆
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် မဂယိုၚ်ပ္တိုန်လဝ်လွာဲဂှ်တုဲ မၞိဟ်ဆက်စၠောံကၠုၚ် ဇရေၚ်ဒပ်ပၠန်ဂတးရပ်လွဟ်မန်တံ နွံဒၟံၚ်ကဵုလ္ၚီဂှ် ညးတာလျိုၚ် ဂကောံမဆေၚ်စပ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၞောဝ်ယိုက်ဂၠေၚ်လျိုၚ်ပၞာန် မစၞောန်ပျးလဝ် ပ္ဍဲလက်ထက်ဥူတာန်ယှိုဲ တၠအဝဵုပၞာန်တြေံဂှ် ဂွံ ၁၄ သၞာံတုဲ ပ္ဍဲဂိတုဖေဖဝ်ဝါရဳ ၁၀ တုဲကၠုၚ်တေံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် စပၠောပ်လဝ်လမျီု ရ။
ဗွဲကြဴဏံ ဒပ်ပၠန်ဂတးကောန်ဍုၚ်အရၚ် ဂကူမန် မမံက်ဂတဝ်ကၠုၚ် ပ္ဍဲပၠန်ဂတးဏံဂမၠိုၚ်ဝွံ သၟတ်ဍောတ်တ်တံ စိုပ်ကၠုၚ်ဇရေၚ်ညးတံတုဲ သွက်ဂွံလုပ်ပေါဲဗ္တိုက် ပ္ဍဲပရေၚ်ထပိုတ်ရိုဟ်ကၞက်သၞောတ်တၠအဝဵုပၞာန် မွဲကရောံမွဲစွံဂှ် ကော်ဘိက်လဝ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဖျေံသ္ဇိုၚ်ဍုၚ်မန်ဂှ် မၞိဟ်ဆက်စၠောံကၠုၚ် ဇရေၚ်ညးတံ ၜိုတ် ၅၀၀ နွံတုဲ ဟိုတ်နူအကာဲအရာနာနာတုဲ ဂွံဒုၚ်လဝ်တဲ ၜိုတ်တၟံကၠံညိညရမာန်လဝ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ဟွံလုပ်ဟွံဂွံဂှ်တုဲ နူကဵုတွဵုရးဍုၚ်မန်မွဲသၟးဟွံက ညးသၟတ်နူကဵုဒေသတၞဟ်သ္အာၚ် အပ္ဍဲဍုၚ်တံဂှ်လေဝ် တၟာဂလိုၚ်ဏောၚ်၊ သွက်ဂွံလုပ်ပ္ဍဲ MSRF ပိုယ်တံဂှ် ဟီုကၠုၚ်ကီု၊ ကေတ်ကၠုၚ်အဆက်တံ နွံဒၟံၚ်တၟာဂလိုၚ်ဏောၚ်။ ပ္ဍဲကဵုသတ္တာဟပြဟ်ဟ်တေံ တမ်ဝါဒိတေံဂှ်တှ်ေ မၞိဟ်ၜိုတ် ၅၀၀ နွံဏောၚ်ဂှ် အဲထေၚ်ကေတ်ရ။ ပိုယ်တံ ဒးကလေၚ်သှ်ကဵုလဝ် တၟာလှ်ေဂှ်လေဝ် နွံ။ လ္ၚဵုဂှ်တှ်ေ ကလေၚ်သှ်ကဵုလဝ်ဟွံမာန်တံဂှ်လေဝ် နွံ။ Admin ပိုယ်တံ ဇြဟတ်အောန်လေဝ် ပါကီုဏောၚ်။ အေ ဂှ်တှ်ေ ဟိုတ်နူအကာဲအရာနာနာတုဲ ဂွံဒုၚ်လဝ်တဲ ၜိုတ်ညးကေတ်ကၠုၚ်အဆက် တၟံကၠံညိညရဂှ် အဲမိက်ဂွံဟီုရ” သာ်ဝွံ ညးသ္ဂးရ။
ပ္ဍဲကဵုညးသၟတ် ကေတ်ကၠုၚ်အဆက် ဇရေၚ်ဒပ်ပၠန်ဂတးဍုၚ်မန်တံဂှ် နူကဵုတွဵုရးမန် ကေုာံ လ္ဂုၚ်တံ ဂၠိုၚ်အိုတ်တုဲ ဒေသဨရာဝတဳ ကေုာံ ဗဂေါတံလေဝ် ပါလုပ်တုဲ သၟတ်မန်ကၠောန်ဒၟံၚ်ကလောန် ပ္ဍဲဍုၚ်သေံတံလေဝ် ဆက်စၠောံကၠုၚ်နွံဂှ် နာဲနဂါ လဴထ္ၜးလဝ်ရ။
ဒပ်ပၠန်ဂတးဍုၚ်မန် MSRF ဝွံ ပံၚ်တောဲကဵု ဒပ်ပၠန်ဂတးမဟာမိတ် မၞုံသ္ကုတ်သၠုၚ်ကျာကၟိန်ဍုၚ်ဂှ်တုဲ တဝ်စၞေဟ်ဗ္တိုက်ဒၟံၚ် ဒပ်ကံၚ်ဇြဳပၞာန်တုဲ ဒတူလိုၚ်ဒၟံၚ် သၟဝ်ပၠတရဴ ပရေၚ်ပၞာန်၊ ပရေၚ်ဍုၚ်ကွာန် ကံၚ်ဇြဳဖေဝ်ဒရာဍုၚ်မန် MSFC ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ဂယျိုၚ်ပ္တိုန်လဝ်လမျီုဂှ်မ္ဂး မၞိဟ်တြုံ နူအာယုက် ၁၈ စဵုကဵု ၄၅ သၞာံ၊ မၞိဟ်ဗြဴ နူအာယုက် ၁၈ စဵုကဵု ၃၅ သၞာံ အောန်အိုတ် နူ ၂ သၞာံ စဵုကဵု ၅ သၞာံ ဒးယိုက်ဂၠေၚ်လျိုၚ်ပၞာန်ဏောၚ်ဂှ် ပါလုပ်ရ။
လ္ပာ်ကံၚ်ဇြဳပၞာန် သွက်ဂွံယိုက်ဂၠေၚ်လျိုၚ်ပၞာန်ဂှ် မွဲမွဲလၟေၚ် သွက်ဂွံကော်အာ ညးဒေသကွာန်၊ အရာပ်တံ အကြာမွဲတၠ ကဵုၜါတၠ လၟေၚ်လၟေၚ်ဂိတု ဟီုလဝ်ဂှ်ရ ပ္ဍဲကဵုတွဵုရးဍုၚ်မန်ဂှ် အရာပ်၊ ကွာန် ဗ္ဒါဲ ၄၇၀ နွံဒၟံၚ်တုဲ ညးဒေသ ၄၇၀ ဝွံ စိုပ်ဒၟံၚ်ဒဒှ် ဒးလုပ်ပၞာန်ဏောၚ် မဒှ်ရ။
အကာဲအရာသာ်ဏံဂှ် ညးပါဲဒလေတ်ကၠုၚ် ဟွံမိက်ယိုက်ဂၠေၚ်လျိုၚ်ပၞာန် သၟဝ်ကံၚ်ဇြဳပၞာန်တံဂှ် ကံၚ်ဇြဳဖေဝ်ဒရာဍုၚ်မန် ဒုၚ်အာတဲ သွက်ပရေၚ်စသုၚ်မံၚ်စံၚ်တံဏောၚ်တုဲ ကုညးမိက်ဂွံလုပ်စိုပ် ပ္ဍဲဂကောံပၠန်ဂတးတံဂှ်လေဝ် ကေတ်ကဵုအဆက်ဏောၚ်ဂှ် ကဵုလဝ်ဒမြိပ်အရေဝ်ရ။
ဒပ်စဵုဒၞါဍုၚ်မန် MSDF ဂှ်လေဝ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ သွက်ဂွံလုပ်ပေါဲဗ္တိုက် ထပိုတ်ရိုဟ်ကၞက် သၞောတ်တၠအဝဵုပၞာန် ကရောံညးတံဂှ် ဒုၚ်ဒၟံၚ်တဲကောန်သ္ဂံၚ်တံရောၚ် လလောၚ်တြးလဝ်ရ။
ညးအုပ်ကာနာနာ ကမ္မတဳက္ဍိုက်ပ်ပရေၚ်ပၞာန်၊ ပရေၚ်ဍုၚ်ကွာန် ဒပ်စဵုဒၞါဍုၚ်မန် MSDF နာဲကိုဝ်တူဂှ် သၟတ်ကေတ်ကၠုၚ်အဆက် ဇရေၚ်ညးတံဂှ် စၟဳတ်ဒုၚ်ဒၟံၚ်တဲတုဲ ညံၚ်ဂွံတိုန်ဘာပၞာန်သ္ဇိုၚ်မာန်ဂှ်လေဝ် စဳဇန်ကဵုဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကံၚ်ဇြဳပၞာန် ကြဴနူစၞောန်ပျးသၞောဝ်ယိုက်ဂၠေၚ်လျိုၚ်ပၞာန်တုဲဂှ် အဓိကဆက်စၠောံကၠုၚ်ပိုယ်တံဂှ်တှ်ေ သၟတ်နူကဵုတွဵုရးဍုၚ်မန်တံ နွံဏောၚ်။ တုဲတှ်ေ သၟတ်နူကဵုရးလ္ဂုၚ်တံ ကေတ်ကၠုၚ်အဆက်နွံဏောၚ်။ သၟတ်ကေတ်ကၠုၚ်အဆက်သာ်ဏံဂှ် ပိုယ်တံ စၟဳတ်ချိုတ်တ်ပၠိုတ်တ်တုဲ ဒုၚ်ကဵုဒၟံၚ်တဲရ။ တုဲပၠန် ညံၚ်ဂွံတိုန်ဘာပၞာန်သ္ဇိုၚ်မာန်ဂှ်လေဝ် ပိုယ်တံ စဳဇန်ကဵုဒၟံၚ်ရ။ ပ္ဍဲကဵုဒပ်စဵုဒၞါဍုၚ်မန်ဂှ်လေဝ် ညံၚ်ဂွံယိုက်ဂၠေၚ်လျိုၚ်ပၞာန်မာန်ဂှ် ပိုယ်တံ ဂ္စါန်ရေၚ်တၠုၚ်ဒၟံၚ်ရ” သာ်ဝွံ သ္ဂးရ။
အပ္ဍဲပရေၚ်သီအဝဵုဏံ ပ္ဍဲကဵုပၠန်ဂတးရပ်လွဟ်မန်တံဂှ် ဒပ်ပၠန်ဂတးဖျေံသ္ဇိုၚ်တွဵုရးဍုၚ်မန် MSRO ၊ ဒပ်စဵုဒၞါဍုၚ်မန် MSDF ၊ ဒပ်ပၠန်ဂတးဍုၚ်မန် MSRF ကေုာံ ဒပ်ပၞာန်ဗၠးၜးဍုၚ်မန် MLA တံ မံက်ဂတဝ်ကၠုၚ်ရ။
ပ္ဍဲကဵုဏံ ဒပ်ပၞာန်ဗၠးၜးဍုၚ်မန် MLA ဝွံ ကတ်လဝ်ကွတ်ပၞာန် ပ္ဍဲဒပ်ပၞာန်တအာၚ် TNLA ဂကောံမဟာမိတ်သ္ကုတ်သၟဝ်ကျာတံဂှ်တုဲ ကော်ဒၟံၚ်ကောန်သ္ဂံၚ်တၟိတၟိ ညံၚ်ဍုၚ်မိတိမ ဂွံဗၠးၜး ညးမိက်ဂွံလုပ်ပေါဲဗ္တိုက်ဍာံဍာံတံရောၚ်ဂှ် ကဵုလဝ်သမ္တီရ။
ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) NMSP-AD လလောၚ်တြးလဝ် ဗ္တိုက်အာဒပ်ပၞာန်သီအဝဵု ကရောံဇြဟတ်ပၠန်ဂတးတံဂှ်လေဝ် ဂကူဘာသာဟွံရုဲ သၟတ်တံ သွက်ဂွံလုပ်ယိုက်ဂၠေၚ်လျိုၚ်ပၞာန် ဇရေၚ်ညးတံဂှ် ကော်ဘိက်လဝ်ရ။
ပရိုၚ်−သြၚ်လောန်ုတိၚ်(မ်)
ဗီု−MSDF