နေဗျဳဒဝ်၊ မာတ် ၆
အလုံဍုၚ်မွဲ သွက်ဂွံကော်သ္ဂောံယိုက်ဂၠေၚ်လျိုၚ်ပၞာန်ဂှ် ချူခၞံလဝ် နဲဥပဒေယိုက်ဂၠေၚ်လျိုၚ်ပၞာန် (မူအပြောံတတိယ) ကဵု လၟေၚ်ကမၠောန်တံတုဲယျတုဲ ဘာတန်ဗ္တောန်တံဂှ်လေဝ် ဖန်ဇန်ရေၚ်တၠုၚ်လဝ်တုဲယျဂှ် လ္ပာ်ကံၚ်ဇြဳပၞာန် ဟီုဂးကၠုၚ်ရ။
ပ္ဍဲကဵုကောံဓရီု ဂကောံကော်ပကောန်ပၞာန်ဗဟဵု အလန်ဒုတိယ မကၠောန်ဗဒှ်လဝ် ပ္ဍဲဂိတုမာတ် ၄ ပ္ဍဲနေဗျဳဒဝ်ဂှ် သ္ကိုပ်ဗိုလ်ဇၞော် တေန်အံၚ်သာန် သီုကဵုဒှ်ဝန်ဇၞော်ကာစဵုဒၞါဂှ် ဟီုစုတ်လဝ်ရ။
သ္ကိုပ်ဗိုလ်ဇၞော် တေန်အံၚ်သာန်ဂှ် ဂကောံကော်ပကောန်ပၞာန်တံဂှ် ကဆံၚ်ဗဟဵု၊ ရးဒေသဇၞော် ကေုာံ တွဵုရးတံ မပါလုပ် ပ္ဍဲကဵုခရိုၚ်၊ ပွိုၚ်ဍုၚ် ကေုာံ ပ္ဍဲဒေသဂွံအခေါၚ်အုပ်ဓုပ်အပိုၚ်တံဂှ် ဒက်ပ္တန်လဝ်တုဲယျဂှ်ရ သွက်ဂွံပံက်အာ တန်ဗ္တောန်ကွတ်ပၞာန်တံလၟေၚ်ၚ်မာန် ဖန်ဇန်လဝ်ဘာတန်ဗ္တောန်တံတုဲယျဂှ် သ္ဂးရ။
သ္အာၚ်နူဂှ်ပၠန် နကဵုဂကောံကော်ပကောန်ပၞာန် ဒက်ပ္တန်လဝ်တံ သွက်ဂွံကၠောန်ၜိုတ်အာကမၠောန် အတိုၚ်လၟေၚ်ကမၠောန်အစာံ ကေုာံ မူအပြောံသၞောဝ်ယိုက်ဂၠေၚ်လျိုၚ်ပၞာန် သ္ပဒတန်ချူခၞံလဝ်တံ မြက်က်ဇက်က်ဂှ်လေဝ် ကဵုကၠုၚ်ဇြဟတ်ဂရိုဟ်ရ။
ဥူကျဳမျေတ် ညးရေၚ်တၠုၚ်ဂဗုတ် ကၠတ်ထဝ်သၞောဝ်ဓဝ်ဝှ်ကြံၚ်ဂှ် ချူခၞံလၟေၚ်ကမၠောန် ကေုာံ သၞောဝ်ယိုက်ဂၠေၚ်လျိုၚ်ပၞာန် မြက်က်ဇက်က်ဂှ်ဝွံ သွက်ကံၚ်ဇြဳပၞာန် ပၟိက်ဇၞော်ဒၟံၚ်တုဲ နဲဥပဒေဟွံတုဲမွဲသာ် ပွမချူခၞံလၟေၚ်ကမၠောန်တံဂှ်ဝွံ ဗက်ကၠောန်ဒၟံၚ်ပြးဏောၚ်ဂှ် ပါ်ပါဲလဝ်ရ။
“ဍေံတံ မိက်ဂွံတံၚ်အခိၚ်တှ်ေ နဲဥပဒေ ဂှ် စွံလဝ် ၜိုတ် ၄ သၞာံ ၅ သၞာံဏောၚ်။ အလဵုအသဳတံဏံဂှ် ခိုဟ်ဒၟံၚ်ကွေံကွေံဟွံသေၚ်ပုဟ်။ နွံပၟိက်တှ်ေမွဲဗီု ဟွံမွဲပၟိက်တှ်ေမွဲဗီု အလဵုအသဳတံဏံ လေပ်ကၠောန်တဴရ။ ဍေံတံနွံကၠုၚ်ပၟိက်ယျဟီုတှ်ေ ချူဓဇက်လွာဲဂှ်ရ။ တန်တဴကဵု လ္တူဥပဒေ၊ နဲဥပဒေတံဂှ်တုဲမှ ဒးကၠောန်လၟေၚ်ကမၠောန်တံဂှ်ဏောၚ်။ လၟေၚ်ကမၠောန်ဂှ်မွဲဗီု၊ နဲဥပဒဂှ်ေမွဲဗီုတှ်ေ သာ်လဵုဂွံပရော။ မုဗက်ကၠောန်ဒၟံၚ်လေဝ် ဟွံတီပုဟ်။ ဥပဒေ၊ နဲဥပဒေတံတုဲမှ လၟေၚ်ကမၠောန်ဂှ်ကၠုၚ်ဏောၚ်။ သရုၚ်ကၠေံကဆံၚ်တုဲ ချူဓဇက်လဝ်တုဲ အေဂှ်တှ်ေ နဲဥပဒေဏံဂှ် ညံၚ်ရဴကောန်ရုပ်ရဏောၚ်၊ ဗီုမိက်ဂွံပဂှ်ပ၊ ဗီုမိက်ဂွံပလေဝ်ဂှ်ပလေဝ် ဗီုဂှ်ကၠောန်ဟွံဂွံပုဟ်။ လၟေၚ်ကမၠောန်ဟီုဂှ် လက္ကရဴအိုတ် တန်တဴကဵုနဲဥပဒေတံတုဲမှ ဒးကၠောန်ဏောၚ်။ အရာတံဏံစုၚ်တုဲမှ ဒးထ္မံက်ရုပ်ရဴနတဲဏံ။ ဗက်ကၠောန်ဒၟံၚ်ပြးဏောၚ်။ ဟိုတ်ဂှ်ရ ညးဍုၚ်ကွာန်တံကီု၊ ညးဂၠးတံကီုဂှ် ဟွံပတှ်ေဒၟံၚ်ဍေံတံပုဟ်ဟီုဂှ် မးမးဟွံသေၚ်ပုဟ်လေဝ်။ ဂတးဂတုန်ဒၟံၚ် ဥပဒေ ဗက်ကၠောန်ဒၟံၚ်ပြးဟွံဂွံပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် သၞောဝ်ယိုက်ဂၠေၚ်လျိုၚ်ပၞာန်ဝွံ နွံၜိုတ်ကဆံၚ်မူအပြောံညိကီုတုဲ ဟွံဂွံသ္ပဒတန်မွဲသာ် ကဵုထ္မံက်ရုပ်ရဴ လၟေၚ်ကမၠောန်တံဟီုဂှ်ဝွံ ဟွံဗဗွဲကဵုသၞောဝ်ဥပဒေပုဟ်ဂှ် ထံက်ထ္ၜးလဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဝှ်ကြံၚ် ဥူတာန်သဵုနာၚ်ဂှ်လေဝ် ကၠောန်ဒၟံၚ် ဂွံကော်ပကောန်ပၞာန် ဗွဲမပြဟ်ဂှ်ဝွံ ဒှ်ပြဝပ္တိတ်ဇြဟတ် သွက်ဂွံဗပေၚ် ပြသၞာဇြဟတ်အောန်စှ်ေဒၟံၚ် ပ္ဍဲကံၚ်ဇြဳပၞာန် ပြဟ်ဟ်ပြေဟ်ဟ်မာန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကံၚ်ဇြဳပၞာန်ဂှ်တှ်ေ အလုံရးသေံသ္ကုတ်သၟဝ်ကျာမွဲဂှ် ဒးဗလးတဲ ဆောံလေၚ်အာဒၟံၚ်ယျဏောၚ်။ တုဲပၠန် ပ္ဍဲရးသက်ကိုၚ်ဂှ်လေဝ် ဗ္ဒိုပ်ပၞာန်ၜိုတ် ၁၀၀ ပြၚ်ဂှ် သီဂွံအာတုဲယျ။ အပ္ဍဲကာလပၠန်ဂတးက္ညၚ်ဏံ ပ္ဍဲကဵုမုက်ပၞာန်နာနာ ဇြဟတ်ပၞာန်ယအ်စှ်ေဂှ် ၜိုတ် ၃ ဠက်နွံယျတုဲ မၞိဟ်ပြံၚ်လ္ပာ်၊ ဖျေံလွဟ်တံဂှ် ၜိုတ်မွဲဠက်ဘာ်နွံဒၟံၚ်တုဲ ပ္ဍဲဒပ်ပၞာန် ဇြဟတ်မၞိဟ်ယအ်စှ်ေတံ က္တဵုဒှ်ဒၟံၚ်ဇၞော်ကဵုဇြဟတ်ဂှ်ရ စၞောန်ပျးသၞောဝ်ယိုက်ဂၠေၚ်လျိုၚ်ပၞာန်ဂှ်တုဲ သွက်ဂွံဗပေၚ်ဇြဟတ် ဒပ်ပၞာန်နွံဒၟံၚ်ပၟိက်ဂှ် ရန်တၟံလဝ်ရ။ ဒှ်သဘဴဗပေၚ်ဒၟံၚ်ဇြဟတ် သွက်ဂွံထပ်ကၠောန်သ္ပ ပကီုပရာပ်ဍဵုဍိုက်ညးဍုၚ်ကွာန်တံမာန်ဏောၚ်ဂှ် အဲဒုၚ်ဂိုၚ်ကေတ်ရ” သာ်ဝွံ သ္ဂးရ။
ကံၚ်ဇြဳပၞာန်ဝွံ ပၠောပ်လမျီုသၞောဝ်ယိုက်ဂၠေၚ်လျိုၚ်ပၞာန်တုဲ ဟွံဂွံပေၚ်မွဲဂိတုဏီ ညံၚ်နဲဥပဒေ ကေုာံ လၟေၚ်ကမၠောန်တံ ဂွံတိတ်ကၠုၚ်ဗွဲမပြဟ် ပ္တိတ်ဒၟံၚ်ဇြဟတ် အိုတ်ဍာ်တုဲ ပ္ဍဲကဵုဒေသလ္ၚဵုတံဂှ်မ္ဂးလေဝ် ရပ်ဒက်ညးသၟတ်တံတုဲ ပ္ကောံပ္ကေဝ်ဒၟံၚ်ကောန်ပၞာန်တံ ကၠောန်ၜိုတ်ဒၟံၚ်ရ။
မွဲလ္ပာ်ပၠန်ဂှ်လေဝ် သၞာဲဒဴကံၚ်ဇြဳပၞာန် နူကဵုဌာနမဆေၚ်စပ်တံဂမၠိုၚ် နကဵုညးဍုၚ်ကွာန်တံ ဂွံလုပ်ယိုက်ဂၠေၚ်လျိုၚ်ပၞာန် သၟဝ်တဲကံၚ်ဇြဳပၞာန်ဂးတုဲ ဗက်တြးဒၟံၚ်လိက်တြးဝါဒ သွက်ဂွံလုပ်ပၞာန် ပ္ဍဲကဵုဒၞါဲမၞိဟ်ဂၠိုၚ်တံကဵု ပ္ဍဲသ္ၚိဒၟံၚ်အကြာအရာပ်တံ နွံဒၟံၚ်ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်မ္ဂး ဇၟာပ်ကောန်ဍုၚ်အဝဲစိုပ်တုဲ အောန်အိုတ် နူ ၂ သၞာံ စဵုကဵု ၅ သၞာံ ဒးလုပ်ကေတ်တာလျိုၚ်ပၞာန်ဏောၚ်တုဲ ယဝ်ရဟွံယိုက်ဂၠေၚ်လျိုၚ်ပၞာန်မ္ဂး သၠုၚ်အိုတ် ဖျေံစၟတ်ဒဏ်ထံၚ် စဵုကဵု ၅ သၞာံမာန်ဂှ် စၞောန်ပျးလဝ်ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ညးသၟတ်အပ္ဍဲဒေသဗွဲမဂၠိုၚ်ဝွံ တိတ်စ္ဍးအာဍုၚ်သ္အာၚ် ပါလုပ်သီုကဵုဍုၚ်သေံတံ လၟိဟ်ဗွဲမဂၠိုၚ်ဂၠေၚ် နွံဒၟံၚ်တုဲ ညးသၟတ်လ္ၚဵုတံဂှ်တှ်ေ လုပ်စိုပ်ဒၟံၚ် ပ္ဍဲဒပ်ပၠန်ဂတးတံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ