ရေဝ်၊ မာတ် ၇
ပ္ဍဲသၞေဟ်ကၚ်ဒပ်ပၞာန်စဵုဒၞါၜိုဟ်လလမ်ဂကူမန် ကွာန်အစေန် ပွိုၚ်ဍုၚ်ရေဝ် တွဵုရးဍုၚ်မန်ဂှ် ပ္ဍဲဂိတုမာတ် ၅ အခိၚ်ဇိုၚ်သဝ်တ္ၚဲ ၜိုတ် ၁၀ နာဍဳ မၞိဟ်တြုံဒေသမွဲတၠ ဒးဒုၚ်ပန်ဂစိုတ်ကဵုသေနာတ်တုဲ ၅ တၠ ဒးဒုၚ်ရပ်ဒက်လဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဥူမံၚ်မိုဝ် ဒၟံၚ်ကွာန်အစေန် မပါလုပ် မၞိဟ်တြုံဒေသ ၆ တၠဝွံ ဂၠံၚ်အာကွာန်အၜဝ် (အဘော်ကျားတန်း) ကြပ်စိုပ်သၞေဟ်ကၚ်စၟဳတ်ဒပ်ပၞာန်စဵုဒၞါၜိုဟ်လလမ်ဂကူမန် ဗ္ဒါဲဘာဗ္တောန်လိက်ကွာန်အစေန်ဂှ် ဒးဒုၚ်ပန်ဂစိုတ်လဝ် ကဵုသေနာတ်ရ။
ဟိုတ်နူဒးဒုၚ်ပန်ဂစိုတ်လဝ်ကဵုသေနာတ်တုဲ ဥူမံၚ်မိုဝ်ဝွံ ကလိဂွံဝပ် ဒးအာမကမ် ပ္ဍဲကအ်တုဲ ဟိုတ်နူဒးဂွိၚ်ကဵုအန္တရာယ်လမျီုတံဂှ်တုဲ နူကဵုရုၚ်ဂဥုဲဍုၚ်ရေဝ်မွဲကဆံၚ် ဒးဆုဲပြံၚ်လွဳကဵုဒၟံၚ် ဇရေၚ်ရုၚ်ဂဥုဲမတ်မလီုရ။
အတိုၚ်ဂလာန် ညးဒေသတံဂှ်မ္ဂး ညးဒေသ ၆ တၠ ပါလုပ်သီုကဵု ဥူမံၚ်မိုဝ်ဂှ်ဝွံ ဟွံဂွံအခေါၚ်တတ်ကၠောံအာကၠုၚ်တုဲ နူကဵုအရေဝ်ဂၠိုၚ် ပ္ဍဲကဵုသၞေဟ်ကၚ်စၟဳတ်ဒပ်ပၞာန်စဵုဒၞါၜိုဟ်လလမ်ဂကူမန်ဂှ် ဒးဒုၚ်ပန်ဂစိုတ်လဝ်ကဵုသေနာတ်ရောၚ် သ္ဂးရ။
ကြဴနူပန်ပှော်စုတ် ဥူမံၚ်မိုဝ် နကဵုသေနာတ်တုဲ ဒပ်ပၞာန်စဵုဒၞါၜိုဟ်လလမ်ဂကူမန်ဂှ်ဝွံ ရပ်ဒက်ညးဒေသ ၅ တၠ မပါဗက်ကၠုၚ်ကရောံညးဂှ်တုဲ လှဲပြံၚ်ကဵုလဝ် ဇရေၚ်ဒပ်ဗၠာဲသၟိၚ်တံဂှ် ဂွံတီကေတ်ရ။
အခိၚ်လၟုဟ် ညးဒးဒုၚ်ရပ် ၅ တၠဂှ် ရပ်ချုက်လဝ် ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ရေဝ်တုဲ ကွဳလိုန်ဓာတ်တံဂှ်လေဝ် လ္ပာ်ဗၠာဲသၟိၚ်တံ သီဏာလဝ်ဂှ် ညးဒေသတံ ဟီုရ။
ဒပ်ပၞာန်စဵုဒၞါၜိုဟ်လလမ်ဂကူမန်ဂှ်ဝွံ ပါ်တိတ်နူဗော်ဍုၚ်မန်တၟိတုဲ ပ္ဍဲသၞာံ ၂၀၁၀ ဂိတုအံက်တဝ်ဗာ ၁၀ ဂှ် လုပ်ဖျေံလဝ်လွဟ် ဇရေၚ်ဌာန်ဂအုပ်ပၞာန်ရးအဂၞဲ နကဵုဇြဟတ်ဒပ် ၂၆၈ တၠ၊ လွဟ်ဇၞော် လွဟ်ဍောတ် ၇၂ ဇကိုအ်ရ။
ဖျေံလွဟ်တုဲ ဂွံ ၁၂ သၞာံ ပ္ဍဲသၞာံ ၂၀၂၂ ဂိတုအံက်တဝ်ဗာ ၁၀ ဂှ် ဒပ်ပၞာန်စဵုဒၞါၜိုဟ်လလမ်ဂကူမန် လလောၚ်တြးလဝ် ဒဒှ်ရပြံၚ်လှာဲဒက်ပ္တန်အာ နဒဒှ်ပၞာန်ပျဳတုသေတ် ကံၚ်ဇြဳပၞာန်ရ။
ကောန်သ္ဂံၚ် ဒပ်ပၞာန်စဵုဒၞါၜိုဟ်လလမ်ဂကူမန် ၃ တၠ ပြံၚ်လှာဲလဝ် နဒဒှ်ပၞာန်ပျဳတုသေတ် ကံၚ်ဇြဳပၞာန်ဂှ် ပ္ဍဲဂိတုဂျာန္နဝါရဳ ၂၈ တေံ ဂကောံလကိုဟ်ဍုၚ်ရေဝ် ပန်ပသောၚ်လဝ် ဗ္ဒါဲခဠာတ်မခၞံကျာ ကွာန်ဇီုပရိုက် ပွိုၚ်ဍုၚ်ရေဝ်ရ။
ဒပ်ပၞာန်စဵုဒၞါၜိုဟ်လလမ်ဂကူမန်ဂှ်ဝွံ ပံၚ်တောဲကဵုကံၚ်ဇြဳပၞာန်တုဲ ကေတ်ဂီုကၠီု အကြာကွာန်အရာပ်တံကီု၊ ပံက်သၞေဟ်ကၚ်စၟဳတ်တံတုဲ ဗက်ကံၚ်ဒၟံၚ်သြန်တံ ကၠောန်ၜိုတ်ဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−Social Media