နသာန်၊ မာတ် ၇
ပွိုၚ်ဍုၚ် မာန်တုၚ်၊ နသာန် ကေုာံ ပွိုၚ်ဍုၚ်နာမ္မတူ ပ္ဍဲရးသေံသၟဝ်ကျာ ကံၚ်ဇြဳပၞာန် ဒးဗလးလဝ်တဲ အပ္ဍဲပရေၚ်ပၞာန် ၁၀၂၇ တေံဂှ် စပ်ကဵုလလောၚ်တြးလဝ် နဒဒှ်တိဍာ်ပရေၚ်အုပ်ဓုပ်ပၞာန်ဂှ်တုဲ ဒပ်ပၞာန်တအာၚ် TNLA ရုပ်သီထောံယျဂှ် ပ္ဍဲဂိတုမာတ် ၆ တေံ လလောၚ်တြးကဵုလဝ်သမ္တီရ။
ပ္ဍဲဒေသသေံသၟဝ်ကျာ ကြဴနူဒေါအ်ပန်ပှော် လလအ်ပွိုၚ်ၜါဂိတုတုဲဂှ် ပ္ဍဲဂိတုမာတ်မံက်ဏံ ကံၚ်ဇြဳပၞာန် ကေုာံ ဂကောံမဟာမိတ်ကောဒေံပိဂကောံတံဝွံ ကြုက်သ္ကိုပ်သ္ကလုပ်အကြာတုဲ ဆဵုဂဗသဳကၠဳလဝ် ပ္ဍဲကဵုဍုၚ်ကူမေန် ဍုၚ်ကြုက်ရ။
ကြဴနူပရေၚ်သဳကၠဳဂှ်တုဲ ပ္ဍဲဂိတုမာတ် ၄ ဂှ် ကံၚ်ဇြဳပၞာန် ပအပ်ကဵုလဝ် သ္ကိုပ်ရး ဌာန်ဂအုပ်ပၞာန်ရးဨသာန် သွက်ဂွံရပ်စပ်စကာ အဝဵုအုပ်ဓုပ်ပၞာန် စပ်ကဵုပရေၚ်အုပ်ဓုပ် ကေုာံ ပရေၚ်စဳရေၚ်သၞောဝ်ဓဝ် အပ္ဍဲပိပွိုၚ်ဍုၚ် ရးသေံသၟဝ်ကျာ TNLA မသီဂွံလဝ်တံဂှ် လလောၚ်တြးလဝ်ရ။
ဒပ်ပၞာန်တအာၚ် TNLA ဂှ် တၚ်လလောၚ်တြး ပရေၚ်အုပ်ဓုပ်ပၞာန်ကံၚ်ဇြဳပၞာန်ဂှ်ဝွံ ဟိုတ်နူကၠောန်သ္ပဒၟံၚ် ညံၚ်ညးဍုၚ်ကွာန်ဒေသတံ ဂွံလကိုတ်တ္ၚဵုဂှ်တုဲ သီုကဵုတၚ်လလောၚ်တြးဏံ အမိၚ်သၞောတ်ဗ္ၜတ် လလောၚ်ပ္တိတ်လဝ် အပ္ဍဲပရေၚ်ပၞာန် ၁၀၂၇ တံသီုဖအိုတ်ဂှ် ရုပ်သီထောံယျဂှ် လလောၚ်ပ္တိတ်ကၠုၚ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာ ဒံက်တာလှကျဝ်ဇြဝ်ဂှ် လလောၚ်တြးပရေၚ်အုပ်ဓုပ်ပၞာန်ဂှ်ဝွံ ဒှ်သဘဴမိက်ဂွံထ္ၜးစအဆံၚ်အလံၚ်ရတုဲ ဂလာန် TNLA မအုပ်ဓုပ်ဒၟံၚ် ပ္ဍဲဒေသဏံ ဗွဲမခိုၚ်ကၠိုက်ဂှ်ဟေၚ် သာတုဲစိုပ်တရဴဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ စကစ ကလေၚ်ဗ္တိုက်မာန်ဏောၚ်ဂှ် ဟွံထေၚ်ပုဟ်။ ၜိုတ်ထ္ၜးစအဆံၚ်အလံၚ်ရဏောၚ်။ ညအ်ဂှ် ဒဒှ်ရဍေံတံ ပိုၚ်လဝ်အဝဵုအပိုၚ်အခြာကၟိန်ဍုၚ် အလုံဍုၚ်ဗၟာဂှ် ပ္တိတ်ထောံပရေၚ်အုပ်ဓုပ်ပၞာန်ရ။ လၟုဟ် အုပ်ဓုပ်ဒၟံၚ် ဗိုန်န်ဗတ်တ်ဂှ် ညးဂှ်ရောဟီုဂှ်လေဝ် တန်တဴဒၟံၚ်ဏောၚ်။ ရဲအုပ်ဓုပ်ဒၟံၚ်ဂှ် ယဝ် TNLA တှ်ေ အမိၚ် TNLA ဂှ် သာတုဲစိုပ်တရဴဏောၚ်။ လၟုဟ်ဂှ် အုပ်ဓုပ်ဒၟံၚ်ဗွဲမဗိုန်ဗတ်ဂှ် ဒှ်ဒၟံၚ် TNLA တုဲ ဂလာန်ညးတံဂှ်တှ်ေ သာတုဲစိုပ်တရဴဏောၚ်” သာ်ဝွံ သ္ဂးရ။
အပ္ဍဲပရေၚ်ပၞာန် ၁၀၂၇ တေံ ဍုၚ် ၇ ဍုၚ် ပ္ဍဲရးသေံသၟဝ်ကျာ TNLA ထိၚ်ဒက်အုပ်ဓုပ်ဒၟံၚ်ဂှ် ကမၠောန်အုပ်ဓုပ်ကောပ်ကာဲဒၟံၚ်အပ္ဍဲဒေသတံ ညိၚ်ဝတ်တောတက်ကၠုၚ်ဂှ်ရ သီုကဵုအမိၚ်တိတ်ဗ္တံဟွံဂွံ မလလောၚ်ပ္တိတ်လဝ်ဂှ် တၚ်သၞောတ်ဗ္ၜတ် မ္ဒးဒ္ဂေတ်ဗက် အပ္ဍဲကာလပရေၚ်ပၞာန်တံသီုဖအိုတ်ဂှ် TNLA ရုပ်သီလဝ်ရ။
နကဵု TNLA ပ္ဍဲကဵုဒေသဍုၚ်ကွာန် သ္ကိုပ်သ္ကအုပ်ဓုပ်ဒၟံၚ်တံဂှ် ပရေၚ်သၞောဝ်ဥပဒေအုပ်လဒံ၊ ပရေၚ်ဗ္တိုက်သရိုဟ်ဂဥုဲၜူမာဲတံကီု၊ သွက်ပရေၚ်ဒေသဂွံညိၚ်ဝတ်ၜိုဟ်သြိုဟ်၊ သွက်ဝိုၚ်ဝေၚ်လံၚ်ၛၚ်တံ ဂွံအိုတ်အး သီုကဵုကျာဖျ မပါလုပ်ဂှ် ထ္မံက်ဒၟံၚ်ရုပ်ရဴ နကဵုပရေၚ်အုပ်ဓုပ်ကောပ်ကာဲ ကေုာံ နကဵုသၞောဝ်ဥပဒေ မဗဗွဲဓဝ်တံဏောၚ်ဂှ် သ္ဂးရ။
ညးမၞုံအခေါၚ်ဟီုဂး ဂကောံညးဗြဴတအာၚ် ဖျေံသ္ဇိုၚ်ရးသေံသ္ကုတ်သၟဝ်ကျာ TWO ဂှ် ပ္ဍဲကဵုဍုၚ်မာန်တုၚ်၊ နာသာန်၊ နာမ္မတူတံဂှ် စက်ယန်အုပ်ဓုပ် TNLA တံ စဂေတ်ဒၟံၚ်ယျတုဲ သွက်ညးဍုၚ်ကွာန် ဒၟံၚ်အပ္ဍဲဍုၚ်တံ သ္ဂောံဂွံပၟတ်၊ ဍာ်တံဂှ်လေဝ် ရေၚ်တၠုၚ်ကဵုဒၟံၚ် ဗွဲမဇြိုဟ်နက်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ် ပ္ဍဲပွိုၚ်ဍုၚ်မာန်တုၚ်၊ နသာန်၊ နာမ္မတူ ပိပွိုၚ်ဍုၚ်ဏံဂှ်တှ်ေ စက်ယန်ပရေၚ်အုပ်ဓုပ် TNLA ဂှ် ဒှ်ဒၟံၚ်အကာဲအရာ စတုဲဂေတ်ဂြိပ်ဒၟံၚ်ယျဏောၚ်။ အရာအိုဿီု ဂေတ်ဂြိပ်ဒၟံၚ်ဂှ်ဟွံသေၚ်။ အဓိကဂှ်တှ်ေ ပ္ဍဲပရေၚ်အုပ်ဓုပ်၊ ပရေၚ်သၞောဝ်ဥပဒေ အုပ်ဓလီုတံဂှ်တှ်ေ လ္ပာ်ဌာနဗၠာဲသၟိၚ်တံ ရပ်စပ်သောၚ်ကလးဒၟံၚ်တံ မွဲပၠန်ဂှ် ကိစ္စဍုၚ်ကွာန်ဂွံဂဵုလဟဵုတံရ။ ကိစ္စသ္ဂောံဂွံပၟတ်ဍာ် သွက်ညးဍုၚ်ကွာန် အပ္ဍဲဍုၚ်တံဂှ်ဟီုမ္ဂးလေဝ် လၟုဟ်တှ်ေ သ္ပဇြိုဟ်နက် ရေၚ်တၠုၚ်ကဵုဒၟံၚ်တံ နွံရ” သာ်ဝွံ သ္ဂးရ။
မွဲလ္ပာ်ဂှ်ပၠန် ပ္ဍဲကဵုဂၠံၚ် ဒၞါဲညးဍုၚ်ကွာန်ဒေသတံ အာကၠုၚ်ချဳဒရာၚ်ဂၠိုၚ်တံဂှ် မာၚ်တိုပ်တိ ပစူလဝ် ပ္ဍဲဂၠံၚ်တံဂှ် နူကဵု TNLA ပသောၚ်ကဵုဒၟံၚ်မာၚ်တံတုဲ ပ္ဍဲကဵုလ္ပာ်သ္ၚိဒၟံၚ် ညးဍုၚ်ကွာန် မဗုမ် ၅၀၀ ပံၚ် ဒတုံဗ္တိုဟ်ထ္ကးလဝ်တံဂှ်လေဝ် ၜံက်ခါဲၚးတးကဵုဒၟံၚ်တံ နွံဂှ် TWO သ္ဂးရ။
သ္အာၚ်နူဂှ်ပၠန် ညးဍုၚ်ကွာန် အပ္ဍဲဒေသ TNLA ထိၚ်ဒက်လဝ်တံဂှ်ဝွံ ပ္ဍဲအရာသွံရာန်ဗၞိက် လ္ပာ်တိဍာ်ထိၚ်ဒက်ကံၚ်ဇြဳပၞာန် ထိၚ်ဒက်လဝ်တံဂှ် ဟိုတ်ခိုၚ်ၚ်ကၠိုက်က်ဟွံမွဲမွဲသာ် မၞိဟ်သွံရာန်သ္ၚုတံဂှ် ဒပ်ပၞာန် ကဵုပ္တိုန်ဒၟံၚ်သ္ၚုတံ နကဵုဗၞတ်ဗ္ၜတ်ရတုဲ လၟေၚ်ဒဒှ်ရပ်ဒက်ဍဵုဍိုက်ဂစိုတ်ဂယိုၚ်တံလေဝ် နွံဒၟံၚ်ရ။
နကဵု TNLA ကရောံမဟာမိတ်ကောဒေံသ္ကုတ်သၟဝ်ကျာတံဂှ် ဟိုတ်နူကြုက် လုပ်အကြာပ္ညဳပ္ညပ်လဝ်တုဲ ပ္ဍဲဂိတုဂျာန္နဝါရဳ ၁၁ တေံ ထ္ပက်လဝ်စၟတ်တဲ လိက်ကသုက်တုပ်စိုတ်ဟိုၚ်ဂေန် ကုကံၚ်ဇြဳပၞာန်တုဲ ပ္ဍဲကဵုဒေသတအာၚ်ကီု ဒေသသေံသ္ကုတ်သၟဝ်ကျာတံကီုဂှ် ဒေါအ်လဝ်ပန်ပှော်ရ။
ကံၚ်ဇြဳပၞာန်ဝွံ အပ္ဍဲကာလသီအဝဵုပွိုၚ်ပိသၞာံဏံ သွက်ဂွံရပ်စပ်စကာ ပရေၚ်အုပ်ဓုပ်ပၞာန် ပ္ဍဲဍုၚ်ဗၟာဂှ် ဒဵုကဵုလၟုဟ် လလောၚ်တြးလဝ် ပရေၚ်အုပ်ဓုပ်ပၞာန် စဵုကဵု ၆၁ ပွိုၚ်ဍုၚ်တုဲ ပ္ဍဲကဵုပွိုၚ်ဍုၚ်တံဏံဂှ် လၟိဟ်မၞိဟ်သ္ပဒတဴဒၟံၚ် ၈ ဒဿမ ၂ ပြကောဋိကိုဋ် နွံဒၟံၚ်ရောၚ် ဂကောံသုတေသန Data For Myanmar လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−TNLA