မတ်မလီု၊ မာတ် ၇
အကြာတၚ်အခက်အခုဲ ပရေၚ်သွံရာန်ဗၞိက်ပယျဵုတံဂှ် ဟိုတ်နူဍာ်ဒကေဝ်ၜဲတံ စှ်ေကၠုၚ်တုဲ ပ္ဍဲတွဵုရးဍုၚ်မန် ဒေါအ်ဇူလဝ်ရာန်ၜဲတံဂှ်ရ ဒးဂဗဒၟံၚ်အခက်အခုဲရောၚ် ညးတဵုလွဳၜဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးတဵုလွဳၜဲတံဝွံ စနူဂိတုမာတ် သတ္တာဟပထမတုဲ သၟာဗၞိက်တံ ဟိုတ်နူဗၞတ်ဗ္ၜတ်ကၠုၚ် ပရေၚ်ရာန်ၜဲသ္ၚေက်တံကဵု ၜဲသ္ၚေက် (ယှိုဲဝါ) တံဂှ်ရ သွံတြးဟွံဂွံရတုဲ ဒှ်ဒၟံၚ်ဒဒိုက်ရ။
သၟာဗၞိက်တံဂှ် နကဵုဟိုတ် ၜဲသ္ၚေက်တံ ဍာ်ဒကေဝ်စှ်ေကၠုၚ်ဂှ် ရာန်ဒၟံၚ်ၜဲၜှ်မွဲဂကူဓဝ်ရတုဲ ၜဲစက်တံဂှ် ဟွံရာန်ဂှ်ရ ညးတဵုလွဳဂမၠိုၚ် ဒးဆေၚ်ဒၟံၚ်မုက်ကဵု ကျဗြံတံရ။
ညးတဵုလွဳၜဲမွဲတၠဂှ် ဟိုတ်နူဒေါအ်လဝ် ရာန်ၜဲသ္ၚေက်တံဂှ်တုဲ သာ်လဵုမှသွံဟွံဂွံဂှ်ရ ဒှ်ဒၟံၚ်အကာဲအရာ ကျဗြံဂၠိုၚ်ဏောၚ်ဂှ် ဟီုရ။
“ဒေၚ်ဗၞိက်တံဂှ်လေဝ် လၟုဟ်တှ်ေ ၜဲသ္ၚေက်ဂှ် မၜှ်လဝ်တံသၟးရ ကေတ်ညးသ္ကအ်အိုတ်။ ပရေံပရေံတံဂှ်တှ်ေ ဟွံရာန်ဟဂှ်ရ။ သၟာဗၞိက်တံ ဟွံရာန်တုဲ ရဲတဵုလွဳပိုယ်တံ ဂွံသွံဂှ် သာ်လဵုမှဟွံပြေပြံၚ်ရပုဟ်။ ပ္တိတ်တမ်တုဲ မတဵုလဝ်ဂှ် သွံဟွံဂွံပုဟ်ဟီုတှ်ေ ကျဗြံတၟာဂလိုၚ်ဏောၚ်။ ကျဂှ် ကျညိညဟွံသေၚ်ပုဟ်” သာ်ဝွံ သ္ဂးရ။
ဟိုတ်နူဟွံရာန်ၜဲသ္ၚေက်တံဂှ်တုဲ ၚုဟ်ၜဲသ္ၚေက်တံဂှ်လေဝ် မွဲန စှ်ေကၠုၚ် စဵုကဵု ၅၈၀၀၀ ဒ္ကေဝ်တုဲ ၜဲသ္ၚေက် (ယှိုဲဝါ) ဂှ်လေဝ် ထ္ပက်စှ်ေအာ စဵုကဵုပွဳပွူ ၇၃၀၀၀ ဒ္ကေဝ်ရ။
ဒေါအ်ဇူလဝ်ပရေၚ်ရာန် ဂကူၜဲသ္ၚေက်သၟးကီုလေဝ် ၜဲသှ်ေဒၟံၚ် ၜဲဇၞော်၊ ၜဲသဝ်ယျာ၊ ၜဲ(ဘိုကိတ်)၊ ၜဲမတ်ဗ္စံက် ကေုာံ ၜဲ(ပဲကြား)တံဂှ် ရာန်ကေတ်ဒၟံၚ် အတိုၚ်သၞောတ်တြေံရဂှ် ဂွံတီကေတ်ရ။
သၟာဗၞိက်ၜဲမွဲတၠဂှ် ဟိုတ်နူဍာ်ဒကေဝ်ၜဲသ္ၚေက်တံ စှ်ေကၠုၚ်ကီု၊ ပရေၚ်သွံရာန်ဗၞိက် ခက်ခုဲကၠုၚ်ကီု၊ နူကဵုဂၠံၚ်ဍာ်တံမွဲကဆံၚ် ဟိုတ်နဒးပၠောပ်ဒၟံၚ် ပ္ဍဲဍုၚ်ကြုက်တံဂှ်ရ ဗၞတ်ဗ္ၜတ်လဝ်ပရေၚ်သွံရာန်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂွံပလံၚ်ပရေၚ်သွံရာန်ဗၞိက်တံဂှ် အခက်အခုဲနွံဒၟံၚ်။ ဂၠံၚ်ဒံၚ်ကျဳ−မာၚ်လာဂှ် ဒၟါနူဂၠံၚ်သွံရာန်ဗၞိက်အဓိက ဟွံသေၚ်တုဲ ကွဳစက်တံဂှ် ၜေတ်ဒၟံၚ်ကွေံကွေံ။ အာဂတလေဝ်ဟွံဂွံ ဆုတ်ကလေၚ်လေဝ်ဟွံဂွံ။ မုကၠောန်ဟွံဂွံတုဲ လ္ပာ်ဏံဂှ်လေဝ် ကွဳစက်တံဟွံစိုပ်တုဲ လှုဲဂှ်ဟွံဂွံပုဟ်။ ဟွံဂွံလှုဲတုဲ သွက်ဂွံဆက်ရာန်လ္ပာ်ဏံဂှ်လေဝ် ဒှ်ဟွံမာန်ပုဟ်။ အကာဲအရာလၟုဟ်ဂှ်တှ်ေ ဗီုကၠာတေံဟွံသေၚ်ပုဟ်။ ဒှ်ဒၟံၚ်ပြသၞာပရေၚ်သွံရာန်ဗၞိက်တံရ။ အခက်အခုဲနွံဒၟံၚ်ညိည” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာပလံၚ်ပ္တိုန် ၜဲသ္ၚေက်တံ နူကဵုဂၠံၚ်ဍာ်မွဲကဆံၚ်ဂှ်လေဝ် ဟိုတ်နူအခိၚ်လအ်လကီု၊ ခရိတ်အိုတ် သာအိုတ်ဂၠိုၚ်သၟးဟွံက ဗွဲမဂတာပ်အခိၚ် ဟွံစိုပ်တံဂှ်တုဲ ဍာ်ဒကေဝ်စှ်ေတုဲ ၚုဟ်တံလေဝ် ဒးစှ်ေကၠုၚ်ဂှ် ညးဆက်ဟီုရ။
ၜဲသ္ၚေက်တိတ်နူဒေသတံဂှ် ဍုၚ်ကြုက်တံ ရာန်ကေတ်ဒၟံၚ် အဓိကတုဲ ၚုဟ်ၜဲသ္ၚေက် ဂွံကလေၚ်ခိုဟ်တိုန်ကၠုၚ်ဂှ် သၞေဟ်ကၚ်ပယျဵု ကြုက်−ဗၟာတံ ဒးကလေၚ်ဒှ်အတိုၚ်သၞောတ်တြေံဏောၚ်ဂှ် သၟာဗၞိက်ၜဲတံ ဟီုဂးဒၟံၚ်အိုတ်ရ။
ပ္ဍဲတွဵုရးဍုၚ်မန် နဒဒှ်သတ်မုဟ်ကျာဂှ် တဵုလွဳဒၟံၚ် ၜဲဇၞော်၊ ၜဲသ္ၚေက်၊ ၜဲသဝ်ယျာ ၊ ပဲသ္ၚေက် (ယှိုဲဝါ) တံ အဓိကတုဲ တိဨကတဵုလွဳဂှ် ၁၇၀၀၀၀ ပြၚ် နွံဒၟံၚ်တုဲ လၟေၚ်သၞာံ ၜဲနာနာ လျိုၚ်တာန် ပွဳပွူ ၂၀၀၀၀ တိတ်ဒၟံၚ်ရ။
ၜဲနာနာ တိတ်ကၠုၚ်တံဂှ် ပလံၚ်ပ္တိုန်သွံတြးဒၟံၚ် ဍုၚ်ကြုက် ကဵု ဍုၚ်အိန္ဒိယတံ အဓိကတုဲ နူကဵုကဏ္ဍၜဲဂှ် လၟေၚ်သၞာံ ဒဝ်ဠာအမေရိကာန် ဂၠိုၚ်ကဵုပြကောဋိကိုဋ် လုပ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ