ဗြဝတဳ၊ မာတ် ၈
ဒပ်ပံၚ်ကောံ KNLA တံ လုပ်စိုပ်ဗ္တိုက်ဒၟံၚ် တမ်ဒပ်ကံၚ်ဇြဳပၞာန် ခမရ စၟတ် (၃၅၅) ဖျေံသ္ဇိုၚ်တေန်ဂါန်ညဳနံၚ် ပွိုၚ်ဍုၚ်ဗြဝတဳ တွဵုရးကရေၚ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရောၚ် ဂွံတီကေတ် နူကဵုပရိုၚ်တမ်ရိုဟ်ဗလးတိတံရ။
တမ်ဒပ် ခမရ ၃၅၅ ဂှ် စနူဂိတုမာတ် ၇ လဒေါဝ်တ္ၚဲ ၁၂ နာဍဳဂှ်တုဲ ဒပ်ပၞာန်ဗၠးၜးကောန်ဂကူကရေၚ် KNLA မပါလုပ် ဒပ်ပံၚ်ကောံ ဒပ်ပၞာန်စဵုဒၞါညးဍုၚ်ကွာန် PDF တံ လုပ်စိုပ်ဗ္တိုက် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရ။
ပေါဲဗ္တိုက်ဂှ်ဝွံ ဆက်က္တဵုဒှ်ဒၟံၚ် စဵုကဵုဇိုၚ်သဝ်တ္ၚဲ ၄ နာဍဳတုဲ လ္ပာ်ကံၚ်ဇြဳပၞာန်လေဝ် ညံၚ်တမ်ဒပ်ဂွိုအ်စှ်ေအာ ဗ္တိုက်ဒၟံၚ်ကဵုပၞာန်ကျာတံ ဟွံပိုတ်သ္ကုတ်တုဲ ပရေၚ်ဇီုကပိုက်ချိုတ် သောဲသောဲဗြောဲဗြောဲဂှ် ဟွံဂွံတီကေတ်ဏီရ။
ဟိုတ်နူပေါဲဗ္တိုက်ၜါလ္ပာ်တုဲ ညးဒေသတေန်ဂါန်ညဳနံၚ်တံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ပရေၚ်သွံရာန်ဗၞိက်ပယျဵု သေံ−ဗၟာဂှ်လေဝ် ဒေါအ်ဒေၚ်အာယျဂှ် ဂွံတီကေတ် အတိုၚ်ဂလာန်ညးဒေသတံရ။
ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ဥက္ကဌ KNU ကဵုလဝ်အမိၚ် သွက်ဂွံသီ ဒပ်ခမရ ၃၅၅ ဖအိုတ်ဂှ်ကီု ပြဟ်ဟ်ဏံ ဒပ်ပံၚ်ကောံ KNLA တံ လုပ်စိုပ်ထ္ပက်ကၠုၚ် စဵုကဵု (ဘုရားကုန်း) ယျဂှ် ချူထ္မံက်ထ္ၜးဒၟံၚ်တံ နွံဒၟံၚ်ရ။
ပ္ဍဲကဵုဍုၚ်ဗြဝတဳ ပယျဵုသေံ−ဗၟာဂှ် ဒပ်ခမရ ၃၅၅ ၊ ဒပ်ခမရ ၃၅၆ ကေုာံ ဒပ်ခမရ ၂၇၅ ကံၚ်ဇြဳပၞာန်တံ မပါလုပ်ဂှ် တမ်ဒပ် ၃ ဒပ်နွံတုဲ ခမရ ၃၅၅ ဂှ်ဝွံ သွက်ပရေၚ်ပၞာန် ဒှ်တမ်ဒပ်ပၟိက်ဇၞော်မွဲလေဝ် မဒှ်ရ။
တုဲကၠုၚ် ပ္ဍဲဂိတုဂျာန္နဝါရဳ ၂၉ တေံလေဝ် က္ၜၚ်ကျာသၞေၚ်ဝဲပၞာန်မွဲဖ္ဍိုက် ကၠုၚ်စိုပ်သွက်ဂွံလှာဲတာလျိုၚ်သ္ကိုပ်ဗျူဟာ ဇရေၚ်ဗျူဟာဗြဝတဳဂှ် ဒးဒုၚ်ပန်ဖျေံလဝ်တုဲ သီုကဵုသ္ကိုပ်ဗျူဟာကံၚ်ဇြဳပၞာန် သ္ကိုပ်ဗိုလ်ဇၞော် အေမေန်နံၚ် ပါလုပ်ဂှ် သၞာဲဒဴ ၅ တၠ ချိုတ်အာလဝ်ရောၚ် KNU ဗဟဵု လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−KNU