ရေဝ်၊ မာတ် ၈
တွဵုရးဍုၚ်မန် ပွိုၚ်ဍုၚ်ရေဝ် ဗ္ဒါဲကွာန်စဳပျး လ္တူဂၠံၚ်ကာ မတ်မလီု−ထဝါဲဂှ် ဂကောံရပ်လွဟ်မွဲဂကောံ ရပ်ဒက်ဏာလဝ် ကောန်ကလောန် ကမ္ပဏဳ Mytel ၅ တၠဂှ် ဂွံတီကေတ် အတိုၚ်ဂလာန်ညးဒေသတံရ။
တ္ၚဲဏံ ဂိတုမာတ် ၇ ၜိုတ်အခိၚ်လဒေါဝ်တ္ၚဲ ၁ နာဍဳ ဂကောံရပ်လွဟ်မွဲဂကောံ ကၠုၚ်စိုပ်ရပ်ဒက်ဏာလဝ် ကောန်ကလောန် ၅ တၠ ဗ္ဂပ်စုတ်ဒၟံၚ် ဇုက်ကေဗဴမိုၚ်တေဝ် ဗ္ဒါဲဒဒန်ဇုက် ကွာန်စဳပျးဂှ်ရ။
ညးဒးဒုၚ်ရပ်ဂမၠိုၚ်ဝွံ ဂွံတီကေတ် ဒှ်ကောန်ကလောန် ကမ္ပဏဳ Mytel တံကီုလေဝ် ယၟုယၟာ ဒှ်ညးလဵုမွဲရောဟီုဂှ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
စပ်ကဵု ရပ်ဒက်ကောန်ကလောန် ကမ္ပဏဳ Mytel ဂှ်တုဲ သြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ဇရေၚ်ဂကောံဒပ်ပၠန်ဂတးဖျေံသ္ဇိုၚ်ဒေသတံကီုလေဝ် ဒဵုကဵုအခိၚ်လၟုဟ် ကလေၚ်သှ်ကဵုလဝ် ဟွံမွဲဏီရ။
သၞာဲဒဴ ကမ္ပဏဳ Mytel တံကဵု ကောန်ကလောန်တံဂှ်ဝွံ အပ္ဍဲကာလသီအဝဵုဏံ ဒးဒုၚ်ရပ်ဒၟံၚ်ကဵု ဒပ်ပၠန်ဂတးတံ မွဲဏှမွဲဏှတုဲ ဗွဲကြဴဏံ ကလေၚ်ဗလးကၠုၚ်လဝ်အိုတ်ဂှ် ဂွံတီကေတ်ရ။
ပ္ဍဲတွဵုရးဍုၚ်မန် အပ္ဍဲကာလသီအဝဵုဏံ လၟေၚ်ဒဒှ်တာဝါတိုၚ်ဖုၚ် Mytel တံ၊ ဆေၚ်သွံတြးတံ ဒးဒုၚ်ဖံက်ဗ္တိုဟ်ပလီုပလာ်ဒၟံၚ် မွဲဏှမွဲဏှတံ နွံဒၟံၚ်ရ။
တုဲကၠုၚ် ပ္ဍဲဂိတုဖေဖဝ်ဝါရဳတေံဂှ်လေဝ် ကရောၚ်ပၞာန်ဒံၚ်ညဵု ရပ်ဒက်ဏာ ဥူမာၚ်ဇြုၚ် က္ဍိုပ်သ္ကိုပ်ပၞာန်ပျဳတုသေတ် ကွာန်ကြုက်ပိ ပွိုၚ်ဍုၚ်ဇြပ်ဗု မပါလုပ် သီုကဵုကောန်ကလောန်ကၠအ်ထၜိုတ် ၅ တၠဂှ်တုဲ ဗွဲကြဴဂှ် ကလေၚ်ဗလးကဵုလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media