မတ်မလီု၊ မာတ် ၇
ပ္ဍဲတွဵုရးရခေၚ် ဒပ်ကံၚ်ဇြဳပၞာန် ပ္ကောံလဝ်ကောန်ပၞာန်အတေၚ်အဓမ္မ ကုရိုဝ်ဟေန်ဂျာ မၞုံပ္ဍဲကွာန်တံကဵု ပ္ဍဲဗ္ဒိုပ်ညးဒဒိုက်တံ ၉၀၀ ပြၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ်ပရေၚ်ရိုဝ်ဟေန်ဂျာတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၅ တေံ ဒပ်ကံၚ်ဇြဳပၞာန်ဝွံ ကော်ဆဵုဂဗလဝ် ညးတာလျိုၚ်အုပ်ဓုပ်အရာပ် မၞုံအပ္ဍဲပွိုၚ်ဍုၚ်မာၚ်တဝ်၊ သေတ်တိုဲ၊ ဗူတဳဒံၚ်တံဂှ်သၟးဟွံက သီုကဵုညးလျိုၚ်ဗ္ဒိုပ်ညးဒဒိုက်တံဂှ်တုဲ ရိုဝ်ဟေန်ဂျာတံ ဒးယိုက်ဂၠေၚ်လျိုၚ်ပၞာန်ဏောၚ်ဂှ် ဟီုဂးကၠုၚ်လဝ်ရ။
ပ္ဍဲကဵုပေါဲဆဵုဂဗဂှ် ကံၚ်ဇြဳပၞာန်ဂှ် နူကဵုကွာန်ဇၞော်ဇၞော်တံဂှ် ရိုဝ်ဟေန်ဂျာ ၁၀၀ တၠ၊ နူကဵုကွာန်ဍောတ်တ်တံဂှ် ၅၀ တၠ သွက်ဂွံကဵုစရၚ် ဇရေၚ်ညးဇၞော်ကွာန်တံဂှ် ဟီုကၠုၚ်ရ။
ကြဴနူဂှ်တုဲ ဒပ်ကံၚ်ဇြဳပၞာန်ဝွံ နူကဵုလ္တူဍုၚ်သေတ်တိုဲဂှ် ရိုဝ်ဟေန်ဂျာ ၃၀၀ ၊ ပ္ဍဲဗူတဳဒံၚ်ဂှ် ၄၀၀ ကေုာံ ပ္ဍဲမာၚ်တဝ် ကေုာံ ဗ္ဒိုပ်ညးဒဒိုက်တံဂှ် ၂၀၀ တၠ၊ အပံၚ်ဖအိုတ် ၉၀၀ တၠ ကော်ပကောံပ္ကေဝ်လဝ် နဒဒှ်ကောန်ဒပ်တၟိတံဂှ် ဂွံတီကေတ်ရ။
ဒပ်ကံၚ်ဇြဳပၞာန်ဝွံ ကုရိုဝ်ဟေန်ဂျာ ဒးဒုၚ်ပ္ကောံလဝ် နဒဒှ်ကောန်ဒပ်တၟိတံဂှ် ကဵုဒၟံၚ်မက်ဂၠက် ကဵုအာတၞးကာဒ်ကောန်ဍုၚ်တံဏောၚ် သာ်ဝွံ စန်ဒက်ဒၟံၚ်ဂှ် ရိုဝ်နေသာန်လွေန် ညးချဳဒရာၚ်ပရေၚ်ရိုဝ်ဟေန်ဂျာ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍေံတံ ( ဒပ်စကစ) ဂှ် သွက်ဂွံစဵုဒၞါ ဗ္ဒိုပ်ညးဒဒိုက်ဇကု ဍုၚ်ကွာန်ဇကုဏောၚ် ဟီုလဝ်ရ။ တဲကၠာဂှ်တှ်ေ အတေၚ်အဓမ္မဂှ် ဟွံပပုဟ်။ ညံၚ်ရဴလုပ်ကၠောန်ကဵုဇြဟတ် ဒးလုပ်ကၠောန် နစိုတ်ဆန္ဒဇကုဇကုဏောၚ်ဂှ် ဟီုရ။ ဆ္ဂး တ္ၚဲယးဂတဂှ် ဗလးနၚ်ကွဳစက် ပ္ဍဲဗ္ဒိုပ်ညးဒဒိုက်တံ၊ ပ္ဍဲကွာန်တံဂှ်တုဲ ဒးလုပ်ဟွံဒေါအ်ဟွံဂွံဏောၚ်ဂှ် ကဵုဇြဟတ်ဂရိုဟ်ရ။ တန်ဗ္တောန်တုဲမ္ဂး ညံၚ်ကိစ္စကောန်ဍုၚ်တံ ဂွံပြေပြံၚ်ဂှ် ကၠောန်ကဵုဏောၚ်။ သြန်ဂိတုဂှ်လေဝ် ကဵုမွဲကိုဋ်ဘာ်ဏောၚ်ဂးတုဲ ဟီုလဝ် လ္ပာ်သေတ်တိုဲတံနွံရ။ ဍာံဍာံဂှ် အရာတံဏံ ဒှ်ကၠုၚ်ဏောၚ်ဟီုဂှ် မုမှဟွံဂွံတီကေတ်ဏီတုဲ ကွေံကွေံဂှ်လေဝ် မုလေဝ်ဟွံဒှ်ကၠုၚ်ဏီပုဟ်” သာ်ဝွံ ညးသ္ဂးရ။
အခိၚ်လၟုဟ် ကံၚ်ဇြဳပၞာန်ဝွံ လ္ပာ်သေတ်တိုဲ၊ ဗူတဳဒံၚ်၊ မာၚ်တဝ်တံဂှ်လေဝ် နူကဵုသ္ကိုပ်အုပ်ဓုပ်အရာပ်တံမွဲကဆံၚ် ပ္ကောံဒၟံၚ်ရိုဝ်ဟေန်ဂျာတံ နဒဒှ်ကောန်ဒပ်တၟိတုဲ စကဵုဒၟံၚ်တန်ဗ္တောန်ယျဂှ် ဂွံတီကေတ်ရ။
ကံၚ်ဇြဳပၞာန် ကၠောန်သ္ပဒၟံၚ် သွက်ဂွံယိုက်ဂၠေၚ်လျိုၚ်ပၞာန် အဓမ္မဂှ်ဝွံ အကြာဂကူရခေၚ်တံကဵု ရိုဝ်ဟေန်ဂျာတံ ညံၚ်လညာတ်ဂွံထ္ကးပြး ကၠောန်ဒၟံၚ်ဂှ်ရ ညးဂမၠိုၚ် ကယျာန်ပါဲဒၟံၚ်အိုတ်ဂှ် ရိုဝ်နေသာန်လွေန် ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ဟိုတ်နူပန်ပှော်ဒၟံၚ်လွဟ်ဇၞော် ကုကွာန်ရိုဝ်ဟေန်ဂျာတံ နွံဒၟံၚ်ဂှ်ရ သီုကဵုကောန်ၚာ်သၟတ်တံ ပါလုပ်ဂှ် ဒးချိုတ်ဒၟံၚ်တံ နွံဒၟံၚ်ရောၚ် ဂွံတီကေတ်ရ။
ပ္ဍဲတွဵုရးရခေၚ် ဂကူရိုဝ်ဟေန်ဂျာ ဗ္ဒါဲ ၂ ကိုဋ်နွံဒၟံၚ်တုဲ နကဵုညးတံ ဒတူလိုၚ်ကရောံဒပ်ပၞာန်တုဲ စိုတ်ဂွံလုပ်ပေါဲဗ္တိုက် ဟွံမွဲပုဟ်ဂှ်လေဝ် ညးချဳဒရာၚ်ပရေၚ်ရိုဝ်ဟေန်ဂျာတံ သ္ဂးရ။
ဒပ်ပၞာန်ရခေၚ် AA ဂှ်လေဝ် ဒပ်ကံၚ်ဇြဳပၞာန် ရပ်ကော်ဒၟံၚ် သၟတ်မဿလေမ် အပ္ဍဲတွဵုရးရခေၚ်တံ အနိၚ်အပိုၚ်တုဲ စကာအာ နဒဒှ်ကောန်ဒပ်ဒုၚ်ချိုတ် ပ္ဍဲမုက်ပၞာန်တုဲ ဖန်ဗဒှ်ဒၟံၚ် ညံၚ်ပဋိပက္ခပရေၚ်ဂကူ၊ ပရေၚ်ဘာသာ ဂွံက္တဵုဒှ်ဏောၚ်ဂှ် ကဵုလဝ်သမ္တီရ။
တုဲကၠုၚ် ပ္ဍဲဂိတုဖေဖဝ်ဝါရဳ ၂၉ တေံဂှ်လေဝ် ခလရ ၅၄၂ ဖျေံသ္ဇိုၚ်ကျံက်ဖျူ ရပ်ကော်ဏာ မဿလေမ် ၁၀၇ တၠ အကြာအာယုက် ၁၈ စဵုကဵု ၃၅ သၞာံ နူဗ္ဒိုပ်ညးဒဒိုက် (ကျောက်တစ်လုံး) ပွိုၚ်ဍုၚ်ကျံက်ဖျူ အတေၚ်အဓမ္မဂှ် ဌာန်ပရိုၚ်အပ္ဍဲဒေသတံ ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Twitter