မတ်မလီု၊ မာတ် ၁၀
အပ္ဍဲထံၚ်စာတ် အလုံဍုၚ်မွဲတံ အပ္ဍဲသၞာံဏံ ဟိုတ်နူဟွံဂွံအခေါၚ်လွဳယဲတုဲ ကောန်ထံၚ်ပရေၚ်ဍုၚ်ကွာန် ၇ တၠ ချိုတ်အာလဝ်ဂှ် ဂွံတီကေတ် အတိုၚ်တၚ်လလောၚ်တြး ဇာဇၞိက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာ PPNM ရ။
လၟိဟ်ကောန်ထံၚ်ပရေၚ်ဍုၚ်ကွာန်တံ ဒးချိုတ်အာလဝ်ဂှ်မ္ဂး အပ္ဍဲသၞာံဏံ နူဂိတုဂျာန္နဝါရဳ စဵုကဵုဂိတုမာတ် စၟတ်တ္ၚဲ ၈ ဂှ် နူထံၚ်ကျာ်မြဟ်ဂှ် ၂ တၠ၊ နူထံၚ်ဒိုက်ဥူဂှ် ၂ တၠ၊ ထံၚ်အိုဝ်ဗိုဝ်၊ ထံၚ်ကလေဝ် ကေုာံ ထံၚ်မဂွဵုတံဂှ် မွဲတၠစၟအ်အ် အပံၚ်ဖအိုတ် ၇ တၠ ချိုတ်အာလဝ်ရ။
ကောန်ထံၚ်ပရေၚ်ဍုၚ်ကွာန်ဂမၠိုၚ်ဝွံ ကြဴနူဒးဒုၚ်ပျဲပျာဲ ပ္ဍဲဒၞါဲစၟဳတ်တံ ဗွဲမသ္ကာတ်မြဟ်တုဲ ဟိုတ်နူဟွံဂွံအခေါၚ်လွဳလွတ် ဍိုက်က်ပေၚ်ၚ်တုဲ ဒးချိုတ်ဒၟံၚ် ဂၠိုၚ်အိုတ်ရောၚ်ဂှ် ညးမၞုံအခေါၚ်ဟီုဂး PPNM ကိုဝ်သိုက်ထောန်ဥူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္အာၚ်နူဂှ်ပၠန် ပ္ဍဲအရာပလံၚ်ဇွောံမစၞစ ပ္ဍဲထံၚ်တံဂှ် ဒးဒုၚ်ကၟာတ်လဒဵုအခေါၚ်ပလံၚ်ဂဥုဲဇဗဍုၚ်သ္အာၚ်တံကီု၊ ညးယဲက္ဍၚ်တံဂှ် ပလံၚ်ရုၚ်ဂဥုဲမ္ၚး ဗွဲမဂတာပ်အခိၚ် ဟွံဂွံတံဂှ်တုဲ ကောန်ထံၚ်တံ ဒးချိုတ်ဒၟံၚ်ရ။
ရုၚ်ဂဥုဲပ္ဍဲထံၚ်ဂမၠိုၚ်ဝွံ လွဳလွတ်ကဵုညးယဲ ပရေၚ်ထတ်ယုက်ဟွံခိုဟ်တံတုဲ စၞးဒးဒှ်ဒၞါဲဒးပြာ်ကဵုလမျီုဂှ် သာ်ဏံဟွံဒှ်မွဲသာ် ဒှ်ဒၟံၚ်ဒၞါဲ စွံလဝ်ကောန်ထံၚ်တံ ကၠာဂွိုအ်ချိုတ်ဏောၚ်ဂှ် PPNM သ္ဂးရ။
အတိုၚ်တၚ်နၚ် ဇာဇၞိက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာ PPNM ပ္ကောံပ္ကေဝ်လဝ်ဂှ်မ္ဂး အပ္ဍဲသၞာံ ၂၀၂၃ တုဲကၠုၚ်ဏံ ဟိုတ်နူဟွံဂွံအခေါၚ်လွဳယဲတုဲ ကောန်ထံၚ်ပရေၚ်ဍုၚ်ကွာန် ၁၇ တၠ ဒးချိုတ်အာလဝ် အပ္ဍဲထံၚ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု− ကိုဝ်ပျေအ်ဖျဵုအံၚ် သၞာဲဒဴသိုဟ်ပၠိုတ်ပၟတ် CDM ဟွံဂွံအခေါၚ်လွဳယဲ ပ္ဍဲထံၚ်ကျာ်မြဟ်တုဲ မဒးပြဟ်လလုဲအာ။