ဗြဝတဳ၊ မာတ် ၁၂
ဒေသတေန်ဂါန်ညဳနံၚ် ဒၞါဲပေါဲဗ္တိုက်ၜါလ္ပာ် မသ္ကာတ်မြဟ်ဒၟံၚ် ညံၚ်ဂွိုအ်စှ်ေအာဂှ် နူကဵုဒပ်ကံၚ်ဇြဳပၞာန်တံ ပါဲနူကဵုဗ္တိုက်ထောံမခတိုဟ် နကဵုက္ၜၚ်ကျာတံဂှ် ပန်ပှော်ကဵုကမ်လှောဝ် (အတွဲလိုက်ပစ်ဒုံး) တံ အရိုဟ်ဒဒှ်တ္ၚဲ ဗွဲမသ္ကာတ်မြဟ်ဂှ် ကၠောန်သ္ပဒၟံၚ်ရောၚ် ဂွံတီကေတ် အတိုၚ်တၚ်နၚ်ပရိုၚ်တမ်ရိုဟ်ဗလးတိတံရ။
ပ္ဍဲကဵုပေါဲဗ္တိုက်တေန်ဂါန်ညဳနံၚ် မရနုက်ကဵု ၅ တ္ၚဲဂှ် လ္ပာ်ဒဵုလက်ခတ် ဗ္ဒါဲဍုၚ်ဗြဝတဳ ဇြဟတ်ပၠန်ဂတး KNLA တံ သီဂွံထိၚ်ဒက်လဝ် ဂိတုဗွဲမလအ်လဂှ် ပ္ဍဲဂိတုမာတ် ၁၁ အခိၚ်နူဂယး ၜိုတ် ၁ နာဍဳ ကၠောန်သ္ပဗ္တိုက်ဂြာတ်လဝ်မခတိုဟ် နူကဵုပၞာန်ကျာတုဲ နူကဵုဗလးတိဂှ်လေဝ် ပန်ပှော်ဒၟံၚ်လွဟ်ဇၞော်၊ ကမ်လှောဝ် (အတွဲလိုက်ပစ်ဒုံး) တံဂှ် ပရိုၚ်တမ်ရိုဟ်အပ္ဍဲဒေသတံ ဟီုရ။
စပ္တံနူဂိတုမာတ် ၁၁ အခိၚ်နူဂယးပြဟ်ဂှ်တုဲ ပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန်ဂှ်ဝွံ သ္ကာတ်မြဟ်နူကဵု ပရေၚ်ဗ္တိုက်ပန်ပှော် တ္ၚဲကၠာကၠာတံဂှ်တုဲ ဂွံမိၚ်ကေတ်ဒၟံၚ်ဗြုရမျာၚ်ဗုမ်ဗ္တိုက်ထကး စဵုကဵုဍုၚ်ဗြဝတဳ ကေုာံ ဍုၚ်မာဲချံက် ထတ်တ်တုဲ သ္ၚိဒၟံၚ်ဂမၠိုၚ်လေဝ် ဒဝုဲချဳဇတဝ်အာလဝ်ဂှ် ညးဒေသဗြဝတဳတံ ဟီုရ။
သ္အာၚ်နူဂှ်ပၠန် ပ္ဍဲဂိတုမာတ် ၁၁ အခိၚ်လဒေါဝ်တ္ၚဲ ၜိုတ် ၁၂ နာဍဳ ၄၅ မိနေတ်ဂှ်လေဝ် ဒပ်ကံၚ်ဇြဳပၞာန် ဆက်ကၠောန်သ္ပဗ္တိုက်ဒၟံၚ်တရဴကျာ ပ္ဍဲဒေသတေန်ဂါန်ညဳနံၚ် ဒၞါဲပရေၚ်ပၞာန်သ္ကာတ်မြဟ်ဒၟံၚ်ဂှ်တုဲ ပွမဇီုကပိုက် အပ္ဍဲပရေၚ်ဗ္တိုက်တံဂှ် ဒဵုကဵုအခိၚ်လၟုဟ် ဟွံဂွံတီကေတ်ဏီပုဟ်ဂှ် ပရိုၚ်တမ်ရိုဟ်ဗလးတိတံ သ္ဂးလဝ်အိုတ်ရ။
အပ္ဍဲပေါဲဗ္တိုက်တေန်ဂါန်ညဳနံၚ် ဒပ်ကံၚ်ဇြဳပၞာန် ဒးဂိတုဲ ဒးဗလးတဲဆောံလေၚ်လဝ် ဗ္ဒိုပ်တမ်ဒပ်ဂမၠိုၚ်တုဲ မ္ဒးဒုၚ်ဗ္တိုက်ဒၟံၚ် စဵုကဵုကုန်ဗျူဟာပၞာန်တံဂှ်ဝွံ ညံၚ်ဗျူဟာပၞာန် ကေုာံ တမ်ဒပ်ဂမၠိုၚ် ဂွိုအ်စှ်ေအာဂှ် အရိုဟ်တ္ၚဲ ဗ္တိုက်ဒၟံၚ် နကဵုလွဟ်ဇၞော် ကေုာံ ပၞာန်ကျာတံ ဗွဲမသ္ကာတ်မြဟ်တုဲ နူကဵုဌာန်ဂအုပ် ၝောံဒပ် ၂၂ ပလံၚ်ဗစိုပ်ဒၟံၚ် ဇြဟတ်ဒပ် ပ္ဍဲဍုၚ်ဗြဝတဳ နကဵုက္ၜၚ်ကျာသၞေၚ်ဝဲဂှ် ဂွံတီကေတ်ရ။
နူကဵုဘာအၚ်မွဲကဆံၚ် ဗပေၚ်ဒၟံၚ်ဇြဟတ်ဒပ်တံဂှ်ဝွံ ညံၚ်ဗျူဟာပၞာန် တေန်ဂါန်ညဳနံၚ် ဂွိုအ်စှ်ေအာ ဒှ်မာန်တုဲ သွက်ဂွံစဵုဒၞါ ဍုၚ်ဗြဝတဳလေဝ် ဒှ်မာန်ဂှ် ညးမတီကေတ်အကာဲအရာပရေၚ်ပၞာန်ပယျဵုတံ ဟီုဂးလဝ်အိုတ်ရ။
အပ္ဍဲပေါဲဗ္တိုက်ပွိုၚ် ၅ တ္ၚဲဂှ် ဂကောံဇြဟတ်ပၠန်ဂတး KNLA တံ ဗ္တိုက်သီဂွံလဝ် ဗ္ဒိုပ်ဗၠာဲသၟိၚ်တေန်ဂါန်ညဳနံၚ် ကေုာံ တမ်ဒပ်ကံၚ်ဇြဳပၞာန် ခမရ ၃၅၅ ဂှ်တုဲ အခိၚ်လၟုဟ်ဂှ်လေဝ် ဆက်ဗ္တိုက်ဒၟံၚ် တမ်ဒပ် ခမရ ၃၅၇ ကေုာံ ကုန်ဗျူဟာဂှ် ပရိုၚ်တမ်ရိုဟ်ဗလးတိတံ သ္ဂးရ။
အပ္ဍဲပေါဲဗ္တိုက်တေန်ဂါန်ညဳနံၚ်ဂှ် ဟိုတ်နူပရေၚ်ဗ္တိုက်ပန်ပှော် ကံၚ်ဇြဳပၞာန်တုဲ ညးဗြဴ ကေုာံ ညးအာယုက်ဇၞော်ဇၞော်တံ မပါလုပ် ညးဍုၚ်ကွာန်ကောန်အရာပ် ဟွံအောန်နူကဵု ၄ တၠ ချိုတ်အာလဝ်တုဲ ၁၀ တၠ ကလိဂွံလဝ်ဝပ်တုဲ ညးဍုၚ်ကွာန်ဂၠိုၚ်ကဵုလ္ၚီ ဒးပါဲဒလေတ်ဒၟံၚ်ဘဲပၞာန်ဂှ် ဂွံတီကေတ် အတိုၚ်ဂလာန်ညးဒေသတံရ။
ကွာန်တေန်ဂါန်ညဳနံၚ် နွံဒၟံၚ်လ္တူဂၠံၚ်ဇၞော်အာယှ မဒှ်ဂၠံၚ်လှာဲဂတးဗၞိက် ပယျဵုသေံ−ဗၟာဂှ်ဝွံ ကဵုဍုၚ်ပယျဵု ဍုၚ်ဗြဝတဳ၊ ဍုၚ်မာဲချံက်တံဂှ် ဟွံသ္ၚောဲစကွေံတုဲ ဟိုတ်နူအသိၚ်အလိုန်ပေါဲဗ္တိုက်တုဲ ဒပ်ပၞာန်သေံ သၠုၚ်ပ္တိုန်ဖျေံစၟတ်လဝ် ဂီုကၠီုပၞောန်ပယျဵုဂှ် ဂွံတီကေတ် အတိုၚ်တၚ်လလောၚ်တြး သၟိၚ်တၠအဝဵုသေံတံရ။
ပရိုၚ်−သြၚ်လောန်တိုၚ်(မ်)
ဗီု−social media