သဓီု၊ မာတ် ၁၂
ဥူယှိုဲလှဥူ ဥက္ကဌဗော် NLD ကွာန်မျာတ်သာန်ကျဳ ဂကောံကွာန်(ထောၚ်မှူး) ပွိုၚ်ဍုၚ်သဓီု တွဵုရးဍုၚ်မန်ဂှ်ဝွံ ဟိုတ်နူဒးဒုၚ်ပန်ဂစိုတ်လဝ် ကဵုသေနာတ်ဂှ်ရ ချိုတ်အာလဝ်ဂှ် ဂွံတီကေတ် ဇရေၚ်ညးမစုက်လုက်ကဵုဗော်တံရ။
ပ္ဍဲဂိတုမာတ် ၁၀ အခိၚ်ဗ္တံ ၜိုတ် ၁၁ နာဍဳ ဥက္ကဌကွာန်အရာပ် ဗော် NLD ဥူယှိုဲလှဥူ အာယုက် ၆၀ သၞာံ အခိၚ်နွံဒၟံၚ်သၟဝ်သ္ၚိဂှ် မၞိဟ်တြုံရပ်လွဟ်ၜါတၠ လုပ်ကၠုၚ်သ္ၚိတုဲ ပန်ပှော်ဏာလဝ် နကဵုသေနာတ်ရ။
ဟိုတ်နူဒးဒုၚ်ပန်ပှော်လဝ် ကဵုသေနာတ်တုဲ ဥူယှိုဲလှဥူဝွံ ကလိဂွံဝပ်မကမ် ပ္ဍဲသြိုဟ်၊ ပ္ဍဲဒူစးတံဂှ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ဥူယှိုဲလှဥူဝွံ နူစသီအဝဵုတုဲ ဆက်ကၠောန်ၜိုတ်လဝ် လၟေၚ်ကမၠောန်ဗော် NLD တံ ဟွံမွဲတုဲ ကၠောန်ၜိုတ်ဒၟံၚ် ပရေၚ်ပိုန်ဒြပ်ဂြောဝ်ဂတာညးသၟးရဂှ် သ္ဂးရ။
ရဲထံက်ဂလာန်ဒပ်ပၞာန်တံဂှ် ဒပ်စဵုဒၞါညးဍုၚ်ကွာန် PDF တံ ပန်ပှော်ဏာလဝ် ဥူယှိုဲလှဥူ နကဵုသေနာတ်ရောၚ် စောဲစပ်ဟီုဂးဒၟံၚ်တံလေဝ် နွံဒၟံၚ်ရ။
စပ်ကဵုပရေၚ်ပန်ပှော်ဏံတုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ဂကောံဒပ် PDF ဒေသတံကီုလေဝ် ဒဵုကဵုအခိၚ်လၟုဟ် ကလေၚ်သှ်ကဵုလဝ် ဟွံမွဲဏီရ။
အတိုၚ်လိက်ဒုၚ်စဳရေၚ် ဗော် NLD ဂှ်မ္ဂး အပ္ဍဲကာလသီအဝဵုဏံ သီုညးစၞးဗော် NLD တံ သီုကောန်ဗော်တံဂှ် ၁၀၀ ပြၚ် ဒးဒုၚ်ဂစိုတ်လဝ်ရောၚ် လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ ၈ တုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)
ဗီု−ထလဳဂရာမ် တြးဝါဒကံၚ်ဇြဳပၞာန်