ဝိုၚ်မဝ်၊ မာတ် ၁၂
လ္ပာ်ပွိုၚ်ဍုၚ်ဝိုၚ်မဝ် ကေုာံ ပွိုၚ်ဍုၚ်ဖာက တွဵုရးကချေၚ်တံဂှ် အကြာဒပ်ကံၚ်ဇြဳပၞာန် ကေုာံ ဒပ်ပံၚ်ကောံမဟာမိတ်တံ ပေါဲဗ္တိုက်သ္ကာတ်မြဟ်ဒၟံၚ်ရောၚ် ဂွံတီကေတ် ဇရေၚ်ဂကောံမၚ်ရံၚ်အခေါၚ်အရာမၞိဟ် ကေုာံ ဌာနလလောၚ်ပရိုၚ် KIA တံရ။
ဒပ်ပၞာန်ဗၠးၜးကချေၚ် KIA ဝွံ စနူဂိတုမာတ် ၇ တုဲကၠုၚ်တေံတုဲ သီုဒပ်ရခေၚ် AA သီုဒပ်ပံၚ်ကောံ PDF တံ ထ္ပက်ပၞာန်ဗ္တိုက်ဒၟံၚ် ဗ္ဒိုပ်ဒပ်ကံၚ်ဇြဳပၞာန် မွဲဒမြိပ်ဂၠံၚ်ကွဳစက် မျေတ်ကျဳဏာ−ဗာန်မဝ် ကေုာံ ဗ္ဒါဲဍုၚ်လိုၚ်ဇြာရ။
ပ္ဍဲဂိတုမာတ် ၁၁ ဂှ်လေဝ် ပ္ဍဲကဵုကွာန် ပ္ဍဲပွိုၚ်ဍုၚ်ဝိုၚ်မဝ်တံဂှ် ပေါဲဗ္တိုက်နွံဒၟံၚ်တုဲ အကာဲအရာဗလးတိ ဟွံဂွံမိၚ်ကေတ်ဏီပုဟ်ဂှ် ညးဒုၚ်တာလျိုၚ်လလောၚ်ပရိုၚ် KIA သ္ကိုပ်ဗိုလ်ဇၞော်နဝ်ဗူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“စနူဂိတုမာတ် ၇ တေံရ။ လၟုဟ် ဒှ်အာ ၁၁ ယျ။ မွဲဒမြိပ်ဂၠံၚ်ကာ မျေတ်ကျဳဏာ−ဗာန်မဝ်ဂှ် ဒှ်ဒၟံၚ်ပေါဲဗ္တိုက်ဏောၚ်။ တ္ၚဲဏံ လ္ပာ်လိုၚ်ဇြာ ဗြုရမျာၚ်ပေါဲဗ္တိုက်တံ ဟွံဂွံမိၚ်ကေတ်ရ။ ဆ္ဂး ညိၚ်ဝတ်အာဖအိုတ်ဂှ်ဟွံသေၚ်။ လ္ပာ်ပွိုၚ်ဍုၚ်ဝိုၚ်မဝ် ပ္ဍဲ (အောၚ်မြေ ၁၊ အောၚ်မြေ ၂ ) ဂှ် ပေါဲဗ္တိုက်နွံဒၟံၚ်ရောၚ် ဟီုရ။ အကာဲအရာဗလးတိဂှ် ဟွံဂွံမိၚ်ကေတ်ဏီပုဟ်” သာ်ဝွံ သ္ဂးရ။
လ္ပာ်ပွိုၚ်ဍုၚ်ဖာက ဂကောံကွာန်သုက်မူ၊ ဗ္ဒါဲကွာန်နမှဝ်ဂှ်လေဝ် စနူဂိတုမာတ် ၁၁ အခိၚ်နူဂယး ၃ နာဍဳဂှ်တုဲ ဒပ်ကံၚ်ဇြဳပၞာန် ဇြဟတ်ပၞာန်အရီု ၇၀ ပြၚ်ပါဂှ်ကဵု ဒပ်ပံၚ်ကောံမဟာမိတ် KIA တံ က္တဵုဒှ်ဒၟံၚ်ပေါဲဗ္တိုက်ဂှ် ဌာန်ပရိုၚ်အပ္ဍဲဒေသတံ ထ္မံက်ထ္ၜးလဝ်ရ။
ညးတာလျိုၚ် ဂကောံမၚ်ရံၚ်အခေါၚ်အရာမၞိဟ်ကချေၚ် KHRW မွဲတၠဂှ် ပွဳပွူကြပ်ကွာန် (အောၚ်မြေ ၁၊ အောၚ်မြေ ၂ ) ပွိုၚ်ဍုၚ်ဝိုၚ်မဝ်ဂှ် ကံၚ်ဇြဳပၞာန်တံ ထောံမခတိုဟ်ဗ္တိုက်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တ္ၚဲဏံ ၜိုတ်လဒေါဝ်တ္ၚဲဂှ်တှ်ေ ကံၚ်ဇြဳပၞာန် ထောံမခတိုဟ်ဗ္တိုက်ဂှ်နွံ။ ဗ္ဒါဲကွာန်တံဂှ် သ္ၚိဒၟံၚ်လ္ၚဵု ဇီုကပိုက်လီုလာ်တံ နွံဒၟံၚ်ရ။ အေ ဂှ်တှ်ေ ဇီုကပိုက်ကလိဂွံဝပ်ဂှ် ပိုယ်တံ ဟွံဂွံတီကေတ် ချိုတ်တ်ပၠိုတ်တ်ဏီပုဟ်။ အကာဲအရာလၟုဟ်ဂှ် ပ္ဍဲကဵု (အောၚ်မြေ ၁) ဗ္ဒိုပ် IDP Camp ဂှ် ကံၚ်ဇြဳပၞာန် မၚ်ရံၚ်ဒၟံၚ်ကဵုဒရုၚ်ဂှ် ဂွံလဝ်ပရိုၚ်ရ” သာ်ဝွံ သ္ဂးရ။
ပ္ဍဲတ္ၚဲအကြာတုဲကၠုၚ်တေံဂှ်လေဝ် ပ္ဍဲကဵုကွာန် (အောၚ်မြေ ၁၊ အောၚ်မြေ ၂ ) ကေုာံ ကွာန် ယှိုဲညံၚ်ပေန်တံဂှ် ဟိုတ်နူပေါဲဗ္တိုက်တုဲ ညးဒေသကောန်အရာပ် ဂၠိုၚ်ကဵုကၠံ ဂွံအာဇူတန်တဴ ဒေသတၞဟ်သ္အာၚ်တံဂှ် တိတ်ဟွံဂွံတုဲ က္တဵုဒှ်ဒၟံၚ်အခက်အခုဲ ကုစၞစသုၚ် ကေုာံ ဍာ်သုၚ်တံဂှ် ဂွံတီကေတ် နူကဵု KHRW ရ။
ပ္ဍဲဂိတုမာတ် ၉ ဂှ်လေဝ် KIA ဗ္တိုက်လဝ် ကုန်ဗ္ဒိုပ်ဖျေံသ္ဇိုၚ်ကံၚ်ဇြဳပၞာန် ခမရ ၁၁၉ နူကွာန်တာမခါန် ပွိုၚ်ဍုၚ်ဖာကဂှ်တုဲ ကောန်ဒပ်ကံၚ်ဇြဳပၞာန်တံ ထောံလသာအာလဝ်ဗ္ဒိုပ်တုဲ သီဂွံလဝ်ရ။
နကဵု KIA သီဂွံလဝ် ဗ္ဒိုပ်ဒပ်ကံၚ်ဇြဳပၞာန်ဍောတ်တ် ကေုာံ ကုန်ဗ္ဒိုပ်ဒပ် အပ္ဍဲဍုၚ်ဝိုၚ်မဝ်၊ ဗာန်မဝ်၊ မျေတ်ကျဳဏာ၊ ဒအ်ဖုၚ်ယာန်၊ မိုဝ်မံက် မွဲဒမြိပ်ဂၠံၚ်ကွဳစက် မျေတ်ကျဳဏာ−ဗာန်မဝ်ဂှ် ၂၀ ပြၚ်တုဲ ပ္ဍဲကဵုဏံ ခလရ ၁၄၂ လ္တူဍုၚ်ဒအ်ဖုၚ်ယာန်လေဝ် ပါလုပ်ရ။
ပရိုၚ်−သြၚ်လောန်တိုၚ်(မ်)
ဗီု−AFP