ကံၚ်ဇြဳပၞာန် လလောၚ်ပ္တိတ် နဲဥပဒေဒပ်အရန် သ္ဂောံကော်အာ ကောန်ပၞာန်တြေံတြေံဂမၠိုၚ်

နေဗျဳဒဝ်၊ မာတ် ၁၂

ကံၚ်ဇြဳပၞာန် ကျဒၟံၚ်ပၞာန် အပ္ဍဲပေါဲဗ္တိုက်အလုံဍုၚ်မွဲဂှ်ဝွံ သွက်ဂွံကလေၚ်ကော် ညးကေၚ်ယိုက်ဂၠေၚ်လျိုၚ်ပၞာန် ဒေါအ်ဇူလဝ် နူကဵုဒပ်ပၞာန်တံ ဗွဲမပြဟ်မာန် ပ္ဍဲဂိတုမာတ် ၁၁ ဂှ် လလောၚ်တြးကၠုၚ် နဲဥပဒေဒပ်အရန်ရ။

သၞောဝ်ဒပ်အရန်ဂှ် စၞောန်ပျးလဝ် ပ္ဍဲသၞာံ ၂၀၁၀ လက်ထက်ဥူတာန်ယှိုဲ တၠအဝဵုတြေံဂှ်တုဲ က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် စဂယိုၚ်ပ္တိုန်လဝ်လမျီု ပ္ဍဲဂိတုဖေဖဝ်ဝါရဳ ၁၃ တေံရ။

ကံၚ်ဇြဳပၞာန်ဝွံ ပၠောပ်လမျီု သၞောဝ်ဒပ်အရန်ဂှ်တုဲ ဟွံဂွံပေၚ်မွဲဂိတုဏီ သွက်ဂွံကော်အာကောန်သ္ဂံၚ်တြေံတြေံတံ ဗွဲမပြဟ်မာန် လလောၚ်တြးလဝ် နဲဥပဒေတံရ။

အတိုၚ်တၚ်လလောၚ်တြး ကံၚ်ဇြဳပၞာန်ဂှ်မ္ဂး ပ္ဍဲကဵုသၞောဝ်နဲဥပဒေ ဒပ်အရန်ဂှ် အခန် (၇) အခန်၊ ပိုဒ်နဲဥပဒေ ၂၇ ပိုဒ် ကေုာံ ဗီုပြၚ်အဆက်လက္ကရဴ ၈ ပါလုပ်ရောၚ် သ္ဂးလဝ်ကီုလေဝ် တၚ်နၚ်ဗွဲလစှ်ေ ဂှ် လလောၚ်ပ္တိတ်လဝ် ဟွံမွဲရ။

ညးရေၚ်တၠုၚ်ဂဗုတ် ကၠတ်ထဝ်သၞောဝ်ဓဝ်ဝှ်ကြံၚ် ဥူကျဳမျေတ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်ကၠုၚ် နဲဥပဒေ ဒပ်အရန်ဏံ မြက်က်ဇက်က်ဂှ်ဝွံ သွက်ဂွံကော်အာ ကောန်ပၞာန်တြေံတြေံတံ နကဵုအမိၚ် ဗွဲမပြဟ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပ္ဍဲကဵုသၞောဝ် ကောန်ပၞာန်ဍေံတံသၟးရ ဒးယိုက်ဂၠေၚ်လျိုၚ်ပၞာန်ဂှ် ဍေံတံ ကော်အာနနဲသာ်လဵုရော။ ကဵုအခေါၚ်အရာသာ်လဵုရော။ ဒးဒ္ဂေတ်ဗက် သာ်လဵုဏောၚ်။ စၞောန်ပျးလဝ် မတံဏံရ။ ကော်ကဵုအမိၚ်ဏောၚ်။ ယဝ်ဟွံဒ္ဂေတ်ဗက်တှ်ေ ဒးထံၚ် ၅ သၞာံဏောၚ်။ ကော်ကဵုအမိၚ်ဏံတုဲ ပ္ကောံကောန်ပၞာန်တံဟီုတှ်ေ ဒးဟီုတပ်ပ်တှ်ေ ဟွံမိက်ဗ္တိုက်ပၞာန်ရပုဟ်။ ဍေံတံဗ္တိုက်တှ်ေ လၟုဟ်ရဂှ် ကျဗြံဒၟံၚ်ဂှ် ကောန်ပၞာန်တြေံတြေံတံဂှ် ဟွံမိက်ဗ္တိုက်ရပုဟ်လေဝ်။ ညအ်ဂှ် ကော်ကဵုအမိၚ်ဏောၚ်။ ဟိုတ်ဂှ်ရ ချူခၞံလဝ် ဗွဲမပြဟ်ရ” သာ်ဝွံ သ္ဂးရ။

ဟိုတ်နူလလောၚ်တြးလဝ် နဲဥပဒေ ဒပ်အရန်တံဂှ်တုဲ အပ္ဍဲကာလခြာဟွံလအ်ဏံ ကော်အာကောန်ပၞာန်တြေံတြေံတံ ဗွဲမပြဟ်ဏောၚ်တုဲ ကောန်ပၞာန်တြေံဗွဲမဂၠိုၚ်ဂှ်ဝွံ ပရေၚ်ထတ်ယုက်ဟွံခိုဟ်ကီု၊ ဒးဆောံလေၚ်လဝ် အဝဲအၚ်္ဂဇိုၚ်တဲတံဂှ်သၟးဟွံက သီုကဵုအာယုက်လေဝ်ဇၞော်ဒၟံၚ်တုဲ စိုပ်တရဴဟွံသေၚ်ပုဟ်ဂှ် ဥူကျဳမျေတ် သ္ၚဳဂၠိပ်လဝ်ရ။

ညးယိုက်ဂၠေၚ်လျိုၚ်ပၞာန်မွဲတၠဂှ်လေဝ် ကောန်ပၞာန်တြေံဂမၠိုၚ်ဝွံ အာယုက်ဇၞော်အာအိုတ်ကီု၊ ဟိုတ်နူအဆက်ပိုတ်အာကဵု ဒပ်ပၞာန်ကီုဂှ်တုဲ ဂွံကော်ကောန်ပၞာန်တြေံတံဂှ် ဟွံလောဲသွာတုဲ ကလေၚ်ကဵုယိုက်ဂၠေၚ်လျိုၚ်ပၞာန်ပၠန်ဂှ်လေဝ် ညံၚ်ညးကဵုအာပထောံ ကာဂစိုတ်တုပ်ပ်ရဂှ် ဟီုရ။

“အာယုက်တံဂှ်လေဝ် ဇၞော်အိုတ်ယျလေဝ်။ ရဲအဆက်ပိုတ်အာကဵု ဒပ်ပၞာန်ဂှ်လေဝ် ပိုတ်အာယျ။ ဟွံလောဲစအှ်ေပုဟ်။ ဥပမာ ကြိုအ်တိုန်ညးသ္ကအ်အိုတ်ယျ၊ ကဵုလဝ်ဌာန်ဒၟံၚ် ဒၞါဲဏံကီုလေဝ် အာနွံဒၟံၚ် ဒၞါဲတၞဟ်ဟ်လေဝ် ဒှ်မာန်ဏောၚ်။ ဟွံသေၚ်မ္ဂးလေဝ် ဗွဲမဂၠိုၚ်ဂှ် ဒှ်အာရဲပရေၚ်ထတ်ယုက်ဟွံခိုဟ်တံအိုတ်ရ။ မၞိဟ်တံဏံဂှ် ယဝ်ရကဵုတန်ဗ္တောန်ဏောၚ်ဟီုမ္ဂး ကျာတ်ညိဏောၚ်ထေၚ်ရ။ နကဵုစိုတ်အဲတှ်ေ ညံၚ်ညးကဵုအာပထောံ ကာဂစိုတ်ရဏောၚ်” သာ်ဝွံ သ္ဂးရ။

အတိုၚ်သၞောဝ်ဒပ်အရန်ဂှ်မ္ဂး ညးဂွံအခေါၚ်နုက်တိတ် နူကဵုဒပ်ပၞာန်တံကဵု ဂွံအခေါၚ်ဇူတံဂှ် စနူအခိၚ်ကလိဂွံအခေါၚ်တိတ်ဂှ်တုဲ စဵုကဵု ၅ သၞာံ သွက်ဂွံယိုက်ဂၠေၚ်လျိုၚ်ပၞာန် ပ္ဍဲဒပ်အရန် တာလျိုၚ်နွံတုဲ နကဵုသ္ကိုပ်က္ဍိုက်ပ်ပၞာန် အတိုၚ်ပၟိက်ဆန္ဒညး ခါန်ကၞက်ပ္တိုန် နဒဒှ်ကောန်ဒပ်အရန်မာန်ဂှ် စၞောန်ပျးလဝ်ရ။

နကဵုကောန်ဒပ်အရန်မွဲတၠ ရန်ကဵုဒတုဲဖဵုဍုၚ်ကွာန်တုဲ သွက်ဂွံဆက်ပအပ်ကဵုတာလျိုၚ် နွံပၟိက်မ္ဂး သ္ကိုပ်က္ဍိုက်ပ်ကာစဵုဒၞါ ကဵုတာလျိုၚ် လ္တူ ၅ သၞာံ မစၟတ်လဝ်ဂှ်ဂွံတုဲ မၞိဟ်ဒးဒုၚ်ကော် သွက်ဂွံယိုက်ဂၠေၚ်လျိုၚ်ပၞာန်ဂှ်ဝွံ အခိၚ်လုပ်ယိုက်ဂၠေၚ်လဝ်တာလျိုၚ် ပ္ဍဲဒပ်ပၞာန်တေံ ကဆံၚ်အလံၚ်လက္ကရဴအိုတ်ဂှ်ကဵု ကယိုၚ်ပၞာန်တံဂှ် အခေါၚ်ရပ်စပ်နွံရောၚ် သ္ဂးရ။

နကဵုကောန်ပၞာန်တြေံဂမၠိုၚ် ညးဒးဒုၚ်ကော် လ္ဂောံကဵုသၞောဝ်ဒပ်အရန်တံဂှ်ဝွံ အပ္ဍဲဒၞါဲ၊ အခိၚ်မစၟတ်လဝ်ဂှ် ဒးကၠုၚ်စိုပ် ယိုက်ဂၠေၚ်လျိုၚ်ပၞာန်ဏောၚ်တုဲ ယဝ်ရဟွံကၠုၚ်စိုပ်မ္ဂး ဒးဒုၚ်ဖျေံစၟတ်ဒဏ်ထံၚ် သၟဝ် ၃ သၞာံ၊ ဒဏ်သြန် ဟွံသေၚ်မ္ဂး သီုၜါသာ် ဒှ်မာန်ဂှ်လေဝ် ထ္မံက်ထ္ၜးလဝ်ရ။

မွဲလ္ပာ်ဂှ်ပၠန် ဇၟာပ်ကောန်ဍုၚ် သွက်ဂွံယိုက်ဂၠေၚ်လျိုၚ်ပၞာန်တုဲ ကလေၚ်ပၠောပ်လဝ်လမျီု သၞောဝ်ယိုက်ဂၠေၚ်လျိုၚ်ပၞာန်ဂှ်သၟးဟွံက ကံၚ်ဇြဳပၞာန်ဝွံ သွက်ဂွံကော်အာ ညးဍုၚ်ကွာန်တံ ဗွဲမပြဟ်ဂှ်လေဝ် ချူခၞံလဝ် နဲဥပဒေ (မူတတိယ) ကဵု လၟေၚ်ကမၠောန်တံတုဲယျဂှ် ထ္မံက်ပ္တိတ်ဟီုဂးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI