ဗြဝတဳ၊ မာတ် ၁၃
ညံၚ်ဍုၚ်ဗြဝတဳ တွဵုရးကရေၚ် ဍုၚ်ပယျဵုသေံ−ဗၟာဂှ် ဂွိုအ်စှ်ေအာဂှ် နူကဵုဒပ်ကံၚ်ဇြဳပၞာန် သၠုၚ်ပ္တိုန်လဝ် ပရေၚ်ဗ္တိုက်ပၞာန်ကျာတံတုဲ ပလံၚ်ဗစိုပ်ဒၟံၚ်ကဵုပၞာန်ရီု ကုက္ၜၚ်ကျာ ဟွံပိုတ်သ္ကုတ်ဂှ် ဂွံတီကေတ် အတိုၚ်ဂလာန် ပရိုၚ်တမ်ရိုဟ်ဗလးတိတေံရ။
ပ္ဍဲဒေသတေန်ဂါန်ညဳနံၚ် ဂၠံၚ်လုပ်ဍုၚ်ဗြဝတဳဂှ် စနူဂိတုမာတ် ၇ တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံမဟာမိတ် ပါလုပ်သီုကဵု ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပေါဲဗ္တိုက်ၜါလ္ပာ် က္တဵုဒှ်ဒၟံၚ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက်တေန်ဂါန်ညဳနံၚ်ဂှ် ဂကောံဇြဟတ်ပၠန်ဂတး KNLA တံ ဗ္တိုက်သီဂွံလဝ် ဗ္ဒိုပ်ဗၠာဲသၟိၚ် ကေုာံ ခမရ ၃၅၅ ဌာန်ဂအုပ်တမ်ဒပ် ဒပ်ကံၚ်ဇြဳပၞာန်တံရ။
အခိၚ်လၟုဟ်ဂှ်လေဝ် ဒပ်ပံၚ်ကောံဇြဟတ်ပၠန်ဂတးတံဝွံ ဆက်ဗ္တိုက်ဒၟံၚ် တမ်ဒပ်ခမရ ၃၅၇ ကဵု ဗျူဟာဖျေံသ္ဇိုၚ်ဗြဝတဳတံဂှ်တုဲ နူကဵုကံၚ်ဇြဳပၞာန် သီုကဵုပရေၚ်ဗ္တိုက် နကဵုပၞာန်ကျာ မသ္ကာတ်မြဟ်ဂှ် ဗပေၚ်ဒၟံၚ်ဇြဟတ်ဒပ်တံ ကၠောန်သ္ပဒၟံၚ်ရ။
ဒပ်ကံၚ်ဇြဳပၞာန်ဝွံ ညံၚ်ဍုၚ်ဗြဝတဳ ဂွိုအ်စှ်ေအာဂှ် ဇြဟတ်အရန် နူကဵုတမ်ဒပ်သၟဝ်တဲ ၝောံဒပ် ၂၂ ဖျေံသ္ဇိုၚ်ပွိုၚ်ဍုၚ်ဘာအၚ်ဂှ်ကဵု ၝောံဒပ် ၄၄ ဖျေံသ္ဇိုၚ်ပွိုၚ်ဍုၚ်ကျာ်ထဝ်တံဂှ် ပလံၚ်ဗစိုပ်ဒၟံၚ်ပၞာန်ရီု ဇရေၚ်ဍုၚ်ဗြဝတဳ ဟွံပိုတ်သ္ကုတ်ဂှ် ဂွံတီကေတ် နူကဵုပရိုၚ်တမ်ရိုဟ်ဗလးတိတံရ။
အပ္ဍဲပေါဲဗ္တိုက်တေန်ဂါန်ညဳနံၚ် ပ္ဍဲဂိတုမာတ် ၁၁ ဇိုၚ်သဝ်တ္ၚဲဂှ်လေဝ် ဒပ်ပံၚ်ကောံပၠန်ဂတးတံ ဗ္တိုက်သီဂွံလဝ် ဗ္ဒိုပ်ဖလူကံၚ်ဇြဳပၞာန် နူကဵုသၠုၚ်ကျာဍုၚ်ဗြဝတဳ ၜိုတ် ၈ မိုၚ်ဂှ်ရ။
အပ္ဍဲပေါဲဗ္တိုက်သီဗ္ဒိုပ်ဖလူဂှ် ကောန်ဒပ်ကံၚ်ဇြဳပၞာန်တံ ဖျေံလွဟ်ဒးဒုၚ်ရပ်တံ နွံဒၟံၚ်တုဲ လ္ၚဵုတံဂှ် ဂြိပ်တိတ်အာလဝ် လ္ပာ်သေံရောၚ် ဂွံတီကေတ် အတိုၚ်ဂလာန် ပရိုၚ်တမ်ရိုဟ်ပရေၚ်ပၞာန်တံရ။
ဍုၚ်ဗြဝတဳ ပယျဵုသေံ−ဗၟာဂှ်ဝွံ ဟိုတ်နူဒှ်ဍုၚ်လှာဲဂတးဗၞိက်ပယျဵုတုဲ ကံၚ်ဇြဳပၞာန်ဂှ် ညံၚ်ၝောံဒပ်ဂွိုအ်စှ်ေအာ ပန်ပှော်ဒၟံၚ် နကဵုကမ်လှောဝ် (အတွဲလိုက်ဒုံး) တံသၟးဟွံက သီုကဵုတဝ်စၞေဟ်ဒၟံၚ် နကဵုပၞာန်ကျာ ဗွဲမသ္ကာတ်မြဟ်ရ။
ပရိုၚ်−သြၚ်လောန်တိုၚ်(မ်)
ဗီု−EPA