ကျောန်သု၊ မာတ် ၁၃
ဗ္ဒိုပ်ဒပ်ပံၚ်ကောံ ပျူသဝ်ထဳ ကေုာံ ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲကွာန်ဂျဵုဒံၚ် ပွိုၚ်ဍုၚ်ကျောန်သု ရးတၞၚ်သဳ ဟိုတ်နူဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် ဟွံအောန်နူကဵု ၁၀ တၠ ချိုတ်အာလဝ်ဂှ် ဂွံတီကေတ် နူကဵုဒပ်ပံၚ်ကောံ စဵုဒၞါညးဍုၚ်ကွာန်ခရိုၚ်ဗိက်−၂ ရ။
ပ္ဍဲဂိတုမာတ် ၁၁ နူဂယးၜိုတ် ၅ နာဍဳဝိုက် ဒပ်ပံၚ်ကောံစဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ် ဗ္ဒိုပ်ဒပ်ပံၚ်ကောံ ပျူသဝ်ထဳ ကေုာံ ဒပ်ကံၚ်ဇြဳပၞာန် ဖျေံလဝ်ဒပ်ယာယဳ ပ္ဍဲကွာန်ဂျဵုဒံၚ် နကဵုဇြဟတ် ပွဳပွူ ၅၀ ဂှ်ရ။
ပေါဲဗ္တိုက်ၜါလ္ပာ် စက္တဵုဒှ်လဝ် နူပယျာံဂယးပြဟ်ဂှ်ဝွံ သ္ကာတ်မြဟ်လဝ် စဵုကဵုဇိုၚ်သဝ်တ္ၚဲ ၆ နာဍဳဝိုက်တုဲ အပ္ဍဲပေါဲဗ္တိုက် ကောန်ဒပ်ကံၚ်ဇြဳပၞာန် ဟွံအောန်နူကဵု ၁၀ တၠ ချိုတ်အာလဝ်ဂှ် ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန်ပံၚ်ကောံ ဒပ်စဵုဒၞါညးဍုၚ်ကွာန်ခရိုၚ်ဗိက်−၂ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ကြပ်မွဲတ္ၚဲဂှ် လ္ပာ်ဒပ်ပံၚ်ကောံစဵုဒၞါညးဍုၚ်ကွာန်တံ ဇီုကပိုက်ဒးဘဲဟွံမွဲ ဆုတ်ကလေၚ်မာန်လဝ်ရောၚ် သ္ဂးရ။
ပရေၚ်ဗ္တိုက်ဏံဂှ် တမ်ဒပ်ခရိုၚ်ဗိက် ၂၊ ဒပ်စြေက် ၂၊ ဂကောံဒပ်ဒမၠုက်စဵုဒၞါတၞၚ်သဳ၊ ဂကောံ (တောဗုံးကြီး) ၊ ဂကောံ ( ရိုးမ) ၊ ဂီုကၠီုပကဖရး၊ ပကဖကျောန်သု၊ ပကဖပဠဝ်၊ ဂကောံ (တောၚ်ပံနီ) ကေုာံ ဂကောံဒရုၚ်တံ သ္ကိုပ်သ္ကဗ္တိုက်လဝ်ရ။
ပ္ဍဲပွိုၚ်ဍုၚ်ကျောန်သုဂှ် ဟိုတ်နူပေါဲဗ္တိုက်ၜါလ္ပာ် စက္တဵုဒှ်လဝ် နူဂိတုမာတ် ၅ တေံဂှ်တုဲ ညးဍုၚ်ကွာန်ဒေသ နူကဵုကွာန် (မၚ်းဂုတ်၊ ရတောၚ် ကေုာံ ကွာန်ဂျဵုဒံၚ်) တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံဂှ် ဂွံတီကေတ်ရ။
တုဲကၠုၚ် ပ္ဍဲဂိတုမာတ် ၅ တုဲကၠုၚ်တေံဂှ်လေဝ် ဗ္ဒိုပ်ပံၚ်ကောံ ပျူသဝ်ထဳ ကေုာံ ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကွာန်ဂျဵုဒံၚ် ပွိုၚ်ဍုၚ်ကျောန်သု ဒးဒုၚ်ဗ္တိုက်တုဲ သၞာဲဒဴမွဲတၠ မပါလုပ် ကောန်ဒပ်ကံၚ်ဇြဳပၞာန် ၆ တၠ ချိုတ်အာလဝ်ဏီရ။
ပရိုၚ်−သြၚ်လောန်တိုၚ်(မ်)
ဗီု−MOI